Read Khoekhoegowab ǂHanuǂhanu-aogu 6 Bible Online

ǂHanuǂhanu-aogu 6 - Khoekhoegowab bible

ǂHanuǂhanu-aogu 6

¹Tsî Israeli ôan ge ǃKhūb mûǁae a ǂkhabana gere dī; ob ge ǃKhūba ǁîna Midiaǁîn ǃomǁae ge mā, hû kuriga.

²Tsî Midianǁîn di ǃommi ge Israeli ǂama ǀgaisao, on ge Israeli ôana Midiaǁîn xa ǁnā ǁhoagu, ǃhomgu ǃnâ hâgu tsî ǁhāgu tsî ǁaposa hâǃkhaigu tsîga ge dībasen.

³Israeli ge tsoro-o, o i ge ge ī, Midiaǁîn tsî Amalekǁîn tsî aiǂoas din tsîn ǁîba ge hāǂam ǃkhaisa.

⁴Tsîn ge ǁîb ǃoa-ai ǁgoe tsî ǃhūb di ūǀkhīna hā ge hapu, Gasas tawats ra sīs kōse; tsîn ge Israeli ǃnâ ûixū-i xare-e ǃgau tama ge i, ǀgoa-i xas kas, goma-i xas kas, esel-i xas kas hoasa.

⁵ǁÎn di ǀgoan tsî ǁîn di tentomdi tsîn ǀkhan ge ǃapahā xui-ao; ǂhoms a ǂgui khamin ge ge hā, ǁîn tsî ǁîn di ǃnain ge ǃgôahe ǁoa is kōse; tsîn ge ǃhūb ǃnâ ge hā, hîǀhuru bin nîse.

⁶Nētib ge Israela kaise ge ǀgâ kaihe Midianni xa. ǃNubain ge Israeli ôana ǃKhūb ǃoa ge ǂgai.

⁷Tsî i ge ge ī, Israeli ôan ge ǃKhūb ǃoa ǂgaio Midiaǁîn di ǃkhais xa,

⁸ob ge ǃKhūba khoeb hîa kēbo-aoba Israeli ôan ǃoa ge sî, nēti ǁîna ǃoa ra mîba: Nētib ra mî ǃKhūb, Israeli di Eloba: Tita ge sado Egipteba xu doeǃapa kai tsî khobosis omma xu sado ge ǂgaeǂguiǂui;

⁹tsî Tita ge sado ge ore Egipteǁîn di ǃomǁaeba xu tsî sado ge ǁgâiǀān hoan di ǃomǁaeba xu; tsî tita ge ǁîna sadu ais aiǃâba xu doeǁgaǂui tsî ǃhūb âna sado ge mā;

¹⁰tsî ta ge sadu ǁga ge mî: Tita ge ǃKhūta, sadu Elota, tā ǃao Amorǁîn, ǃhūb ân ǃnâ du ǁan hân di eloga, xawe sadu ge dommi âtaba ǁnâuǀnam tama ge i.

¹¹ǃNubaib ge ǀhomǃgāb ǃKhūb diba hā tsî ge ǂnû terpentinhais Ofras tawa hâs hîa Joab, Abieserǁîb di ge is ǃgao; tsî ǀgôab âb Gideonni ge ǃhoroba ra dāǃnâ ǀāǃnâǃoreb tawa, ǁîbab nî gaugause Midiaǁîn di ais aiǃâba xu.

¹²ǃNubaib ge ǀhomǃgāb ǃKhūb diba ǁîb tawa ǂhai tsî ǁîb ǃoa ge mî: ǃKhūba ab hâǀkhā tsi, ǃgari ǁē-aotse!

¹³Ob ge Gideonna ǁîb ǃoa ge mî: Okha, ǃkhūkhoetse, ǃKhūb ga sida ǀkha hâo, tare xū-i ǃaroma da kha ǁnâi nēn hoan xa go hāǂamhe? Tsî mapan kha ǁnâi hâ ǁîb di buruxa dīn, sida îgu ge ǁîn xa ǃhoaba dana, mî rase: ǃKhūba Egipteba xu ǂgaeǂguiǃapa da tamab hâ? Xawe nēsib ge ǃKhūba ǁnāxū da tsî Midianni ǃomǁae ge mā da.

¹⁴ǃNubaib ge ǃKhūba ǁîb ǃoa dabasen tsî ge mî: ǃGû satsa nē ǀgaib âts ǃnâ îts Israela Midianǁîn ǃomǁaeba xu ore! Tita ǁî tama ta, satsa ra sî ta?

¹⁵Ob ge ǁîb ǃoa ge mî: Okha, ǃKhūtse, tare xū-i ǀkha ta ǁnâi Israela nî ore? Ti ǃhaoǃnās ge hoadi xa a ǀgâsa Manaseb ǃnâ, tsî tita ge ǂkham ta ti îb di ommi ǃnâ.

¹⁶Ob ge ǃKhūba ǁîb ǃoa ge mî: Tita ge sats ǀkha nîra hâ, xui-aots ge Midiaǁîna nîra ǂnau, ǀgui khoeb ǀguib ase.

¹⁷Ob ge ǁîb ǃoa ge mî: ǀKhomma ta ga hō io sa mûǁae, ǁnâi sao-e dība te re, sats a ǁî, tita ǀkha ra ǃhoatsa ǃkhaisa.

¹⁸Tā ǂgō nēpa xu, sa tawa hā tsî ta nî ǀkhaexū-e ūǀkhība tsi tsî mâi-aiǃâ tsis kōse. Ob ge ǁîba: Tita ge nî hâ, ǁkhawats nî hās kōse, ti ge mî.

¹⁹Ob ge Gideonna ǂgâ tsî piriro-i tsî ǀkhuruoǃnâ amperedi tsîna ge ǁāǁā, ǀgui efab tsampereb xa; ǁgan-eb ge ǀharu-i ǃnâ ge ǂgā tsî surobab ge sū-i ǃnâ ge ǂnâǂgā; tsîb ge ǁîna ǁîb ǃoa ge ūǂoa haiǃgaos tawa, tsî ǁnāpa ge ǁgui-aiǃâba bi.

²⁰Ob ge ǀhomǃgāb ǃKhūb diba ǁîb ǃoa ge mî: Ū ǁgan-i tsî ǀkhuruoǃnâ amperedi tsîna, îts ǁîna ǁnā ǃhaob ai ǁgui îts suroba ǂnâxū. Ob ge ǁnāti ge dī.

²¹Ob ge ǃKhūb di ǀhomǃgāba ǁnā ǀkharus, ǁîb di ǃomǁae hâs di ǀamsa ǀhōǂui tsî ǁgan-i tsî ǀkhuruoǃnâ amperede ge tsâǀkhā. ǁGoasis ge ǀaesa ǃhaoba xu ǀkhī tsî ǁgan-i tsî ǀkhuruoǃnâ amperedi tsîna ge hapu. Tsî ǀhomǃgāb ǃKhūb dib ge ǁîb di mûra xu ge kā.

²²ǃNubaib ge Gideonna ge mû ǃKhūb di ǀhomǃgāb a ǃkhaisa. Ob ge Gideonna ge mî: Okha, ǃKhūtse, ǃKhūtse, ǃKhūb di ǀhomǃgā-e ta kom aisa xu ais ǃoa go mûo.

²³Ob ge ǃKhūba ǁîb ǃoa ge mî: ǂKhîba ab hâǀkhā tsi! Tā ǃao, ǁōts ge tide.

²⁴ǃNubaib ge Gideonna ǁnāpa altarsa ǃKhūba ge ǂnubiba, tsîb ge ǁîsa: ǃKhūb a ǂkhî, ti ge ǂgai; ǁîs ge nētsēs kōse ganupe hâ Ofras Abieserǁîb dis ǃnâ.

²⁵Tsî i ge ge ī, ǁnā tsuxub ǁkhāb ǃnâ, ob ge ǃKhūba ǁîb ǃoa ge mî: ǁGōba ū ǁnā goman sa îb din xa tsî ǀgamǁî ǁgōb, hû kurigu â-iba, îts Baali di altars hîa sa îb disa khôaǁnâ, îts haixaǃkhais, ǁîs tawa hâsa ǁhāǁnâ,

²⁶îts ǃKhūb, sa Eloba altarsa ǂnubiba ǀgaib di ǀgapib ai, anu ǃkhai-i tawa; îts ǀgamǁî ǁgōba ū îts ǁîba khauǁguibase ǁguiba ǁnā hain haixaǃkhais din hîats nî ǁhāǁnân ǀkha.

²⁷ǁGoasib ge Gideonna disi khoegu ǁîb ǃgāgu diga ū tsî ge dī, ǃKhūb ge ǁîb ǃoa ǃhoa xase. Tsî i ge ge ī, ǁîb ommi tsî ǃās di aogu tsînab ra ǃao amagab ge ǁîsa tsēas di amǃnâs ai tsuxuba ge dī.

²⁸Tsî ǁnā ǃās di khoegu ge ǃnauǁgoaga khâio, mû, os ge altars Baali disa khôaǁguihe ge hâ i, tsî haixaǃkhais, ǁîs tawa hâs ge ge ǁhāǁnâhe hâ i, tsî ǁnā ǀgamǁî ǁgōb ge ǂnubihe hâ altars ai ge ǁguibahe hâ i.

²⁹On ge nē-e nau-i ǃoa ge mî: Tari-e nē dīǃkhai-e go dī? Tsî ôaǃnâ tsîn ge dîǂuio, on ge ge mî: Gideonni, Joab ôab ge nē ǃkhaisa go dī.

³⁰O gu ge aogu ǁnā ǃās diga Joab ǃoa ge mî: Sa ôaba ūǂoaxa, îb ǁō, altars Baali disab go ǃgauǁgui tsî haixaǃkhais, ǁîs tawa hâsab go ǁhāǁnâ xuige.

³¹Xawe Joab ge ǁîb tawa mân hoan ǃoa ge mî: Baala du nî ǂnoaguba? ǁÎba du nî hui? ǁÎba ga ǂnoaguba-i ge nari nî ǃgamhe. Elob kao, ab ǁî-aitsama ǂnoagubasen, altars âban go ǃgauǁgui xuige.

³²ǁNā-amagab ge ǁnātsē Jerubbaal ti ge ǂgai bi, mî raǃâ: Ab Baala ǂnoagubasen, altars âbab ge ǃhanǁgui amaga.

³³Tsî Midiaǁîn tsî Amalekǁîn hoan tsî aiǂoas di ôan tsîn ge ǀhû tsî Jordanna ǃgâu tsî ge ǁgoe, Jesreels di ǃgoaǃnāb ǃnâ.

³⁴ǃNubaib ge ǃKhūb di Gagaba Gideonna ge ǃkhō, tsîb ge xâiǁnâba ge xâi, on ge Abieserǁîna ǁîb khaoǃgâ ge ǂgaiǀhûhe.

³⁵Tsîb ge sîsabega ge sî Manaseb hoab ǃnâ, on ge ǁîn ona ge ǂgaiǀhûhe ǁîb khaoǃgâ; ǁnās ǁkhās xaseb ge sîsabega ge sî Aseri, Sebulonni tsî Naftalib ǃnâ; on ge ǁîba ge ǃoa.

³⁶Ob ge Gideonna Elob ǃoa ge mî: Israelats ga satsa ti ǃomǁaeba xu ore ǂgao-o, sats go mî xase,

³⁷mû, o ta ge tita ǀûxa khō-e ǃhūb ai nî ǁgui; ǀaub ga khōb ǀguib ai hâo, tsî ǃhūb hoab ga ǂnâsao, o ta ge nî ǂan, Israelats nî ti ǃomǁaeba xu ore ǃkhaisa, sats go mî khami.

³⁸Tsî i ge ǁnāti ge ī: Sao ra tsēs aib ge ǃnauǁgoaga khâi tsî khōba ǀāo, ob ge ǀauba ge ǀāǂui, xapasǀoab kōse ǁgam-i xa.

³⁹Ob ge Gideonna Elob ǃoa ge mî: Sa ǁaiba ab tā ǂhubi tiǀî, î ta nē ǃnās ǀguisa ǃhoa; î ta nē ǃnās ǀguis ai dītsâ khōb ǀkha: Ab khōb ǀguiba ǂnâsa, îb ǃhūb hoaba ǀauxa.

⁴⁰Ob ge Eloba ǁnā tsuxub ǁkhāb ǃnâ ǁnāti ge dī: Khōb ǀguib ai i ge ge ǂnâsa i, tsî ǃhūb hoab ge ge ǀauxa i.