Read Khoekhoegowab ǂHanuǂhanu-aogu 7 Bible Online

ǂHanuǂhanu-aogu 7 - Khoekhoegowab bible

ǂHanuǂhanu-aogu 7

¹ǃNubaib ge Jerubbaala, ǁnāb ge Gideonna, ǃnauǁgoaga ge khâi tsî ǁnā toroǁaes, ǁîb ǀkha hâs hoasa; tsîn ge ǀaus Harods tawa ge ǁgoe; ob ge toroǂnubis Midiaǁîn disa ǀapasǀî ge ūhâ i ǃnoms, Mores dis ǃgâb ai, ǃgoaǃnāb ǃnâ.

²Tsî ǃKhūb ge Gideonni ǃoa ge mî: ǁAes, sa ǀkha hâs, ge ǀgausa ǃnā hâ, Midiaǁîna ta nî ǁîn ǃomǁae mās ǃgâ-ai; Israeli ti ǃoagu koasen tsî: Ti ǃommi go ore te, ti mî tidega.

³Îts ǁnâi ǂgai kai ǁaes di ǂgaedi aiǃâ, mî raǃâ: ǃAo tsî ga ǂkhabuǂâi-i hoa-e a-i oa î-i ǃhaese ǂnan Gileadi ǃhomma xu. ǃNubai gu ge ǁaes di ǀgamdisiǀgamǀaǀoadisiga ge oa, disiǀoadisigu ǀguigu ge ǃgaus kōse.

⁴Tsî ǃKhūb ge Gideonni ǃoa ge mî: Goroses ǃnā hâ toroǁaes di ǀgausa; ǁîna ǁgôa kai ǁgam-i ǃoa, o ta ge tita ǁnāpa ǁîna nî ǃâitsâ, tsî i ge nîra ī, ǁîb xa ta ga tita sa ǃoa: Nēb ge sa ǀkha nî ǃgû, ti a mîb, ǁîb ge sa ǀkha nî ǃgû, xawe ǁîb xa ta ga tita sa ǃoa: Nēb ge sa ǀkha ǃgû tide, ti a mîb, ǁîb ge ǃgû tide.

⁵Ob ge toroǁaesa ge ǁgôa kai, ǁgam-i ǃoa. ǃNubaib ge ǃKhūba Gideonni ǃoa ge mî: Nams âb ǀkha ga ǁgam-i xa ari-i ra tsā xase ǂnapinammi hoab, ǁîbats ge ǀguri nî mâi; ǁnās ǁkhās xase ǁnāb, ǁgoakha âb ai ga ǁnāb hoaba, ā nîse.

⁶ǃNubais ge ǀgaus, ǃommi âgu ǀkha ǁîgu di ams ǃnâ goro ǂnapinamgu disa ǃnonakaidisi khoe ge i. Naugu ǁaes digu hoagu ge ǁgoagu âgu ai ge ǁgoe, ǁgam-i xa nî āse.

⁷Ob ge ǃKhūba Gideonni ǃoa ge mî: Nē ǃnonakaidisi khoegu, hîa goro ǂnapinamgu ǀkha ta ge tita sado nîra ore tsî Midiaǁîna sa ǃomǁae nîra mā; ǁnā-amaga nē toroǁaes hoasa ǃgû kai, mâb hoaba ǁîb di ǃkhais ǃoa.

⁸Os ge toroǁaesa daob ǂûna ǁîgu ǃomǁae ge ū tsî xâiǁnâgu ona; tsîb ge ǁnā khoegu Israeli digu hoaga ge ǃgû kai, mâb hoaba tentoms âb ǃoa; xawe ǁnā ǃnonakaidisi khoegab ge ge ūǀgara hâ i. Tsî toroǂnubis Midiaǁîn dis ge ǁîb ǃnaga ǃgoaǃnāb ǃnâ ge hâ i.

⁹Tsî i ge ǁnā tsuxub ǁkhāb ǃnâ ge ī, ǃKhūb ǁîb ǃoa ge mî ǃkhaisa: Khâi îts ǁgôa ǁgoeǃkhais ǃnâ, tita ge ǁîsa sa ǃomǁae go mā xuige.

¹⁰Tsî ganupets ga ǁgôasa ǃao-o, î kho ǁnâi sats tsî Purab, sa ǃgāb tsîkho ǁgôa ǁgoeǃkhais ǃoa.

¹¹Ots ge tare-en ra ǃhoasa nî ǁnâu, tsî ǁnās khaoǃgâ kha ge sa ǃomkha nî ǀgaiǀgaihe, tsîts ge ǁgoeǃkhais ǃnâ nî ǃgûǁgôa. ǃNubaib ge Purab, ǁîb di ǃgāb ǀkha ǀkhâuǀams ai hâ ǃûitoro-aogu, ǁgoeǃkhais ǃnâ hâgu kōse ge ǁgôa.

¹²Tsî Midiaǁîn tsî Amalekǁîn tsî aiǂoas di ôan hoan ge ǂhoms a ǂgui khami ge ǁgoe ǃgoaǃnāb ǃnâ, tsî ǁîn di ǃnain ge ǃgôaheǁoasase ge ǂgui i, ǀgopab hurib amǃgâ ǁgoeb ī khami.

¹³Tsî Gideonni ge sīo, mû, ob ge khoeba ge hâ i hîa horesab âba ǁhapo-e ǃhoaba tsî ra mîba: Mû, tita ge goro ǁhapo, tsî mû, ǃgupu gerstperes ge ǁgoeǃkhais Midiaǁîn dis ǃnâ gabasenhā tsî tentoms kōse sī tsî ge ǂnau si, ǁnā tsîs ge dawaǃkhapuhes kōse, os ge tentomsa ǁnāti ge ǁgoe.

¹⁴Ob ge horesab âba ǃeream tsî ge mî: ǀNî xū tama i ge nē-e, Gideonni, Joab ôab, Israelǁî-aob di gôab ge; Elob ge Midiaǁîn tsî nē ǁgoeǃkhais hoasa ǁîb ǃomǁae go mā.

¹⁵Tsî i ge ge ī, Gideonni ge nē ǁhapos tsî ǁguiǃās âsa ǁnâuo, ob ge ge ǀgoreǀî; tsîb ge ǁkhawa Israeli di ǁgoeǃkhais ǃoa oa tsî ge mî: Khâi, ǃKhūb ge Midiaǁîn di ǁgoeǃkhaisa sadu ǃomǁae go mā xuige.

¹⁶Ob ge ǃnonakaidisi khoega ǃnona ǃâdi ǃnâ ge ǀgora; tsîb ge mâb hoaba ǀgui xâiǁnâba ǃomǁaeb âb ǃnâ ge mā tsî ǀkhaiǃnâ ǂgoaxapade tsî ǃamamǀaede xapadi ǃnâ.

¹⁷Tsîb ge ǁîgu ǃoa ge mî: Tita kō, î go ǁnāti dī; tsî mû, tita ga ǁgoeǃkhais di ǀkhâuǀams tawa sīo, o i ge nî ǃnae, tita nî dī khami ǁnāti go ǁkhāti nî dī ǃkhaisa.

¹⁸Tita ga xâiǁnâsa xâio, tita tsî ti ǀkha hâgu hoagu, o go ge ǁkhāti xâiǁnâsa nî xâi ǁgoeǃkhais hoas ǂnamipe tsî go ge: ǃKhūb tsî Gideonni tsîkha di gôab, ti nî mî.

¹⁹Nētib ge Gideonni tsî ǀguikaidisi khoegu, ǁîb ǀkha hâgu tsîga ge sī ǁgoeǃkhais di ǀkhâuǀams kōse, tsuxuǃgâǃûiǁaeb di tsoatsoas ǃnâ, ǃûi-aogan ǀase mâi hâ hîa, tsî gu ge xâiǁnâde ge xâi tsî xapadi, ǁîgu ǃomǁae hâde ge ǂnauǂkhūkhū.

²⁰Nēti di ge ǁnā ǃnona ǂnubide xâiǁnâde xâi tsî xapade ge khôa; tsî gu ge ǁîgu di ǁareǀkhāb ǃommi ǀkha ǃamamǀaede ge ǃkhō, tsî amǀkhāb ǃommi ǀkha xâiǁnâde, xâi nîse; tsîn ge: ǃKhūb di gôab tsî Gideonni dib, ti ge ǂgai.

²¹Tsî gu ge ge mâ i, mâb hoaba ǃkhais âb ai, ǁgoeǃkhais ǂnamipe. ǃNubais ge ǁgoeǃkhais hoasa ge ǃkhoeǃā tsîn ge ǃau tsî ge ǃhū.

²²Tsî ǁnā ǃnonakaidisigu ge xâiǁnâde xâio, ob ge ǃKhūba gôaba ge unu, nēb diba naub dib ǃoagu ǁgoeǃkhais hoas ǃnâ, tsî ǁgoeǃkhais din ge ge ǁhâ Bet-Sitas ǃoa Sereras kōse, Abel-Meholas, Tabats ǀgapise ǁgoes di ǀkharib kōse.

²³ǃNubai gu ge Israeli di aoga ge ǂgaiǀhûhe Naftaliba xu tsî Asera xu tsî Manaseb hoaba xu; tsî gu ge Midiaǁîna ge sauruǃgon.

²⁴ǁKhātib ge Gideonna sîsabega ge sîǂui Efraimmi hoab ǃnâ, mî raǃâ: ǁGôa î du Midiaǁîna ǃoa, î du ǁîna ǁgamma xu ǃkhai, Bet-Baras tsî Jordanǃāb kōse; nētib ge Efraimmi di aob hoaba ge ǂgaiǀhûhe, tsî gu ge ǁîna ǁgamma xu ge ǃkhai, Bet-Baras tsî Jordanǃāb kōse.

²⁵Tsî gu ge ǀgam gaosakha Midiaǁîn dikha, Oreb tsî Seeb tsîkha ge ǃkhō, tsî gu ge Oreba Oreb di ǃhaob ai ge ǃgam tsî Seeba gu ge Seeb di ǀāǃnâǃoreb ǃnâ ge ǃgam, tsî gu ge Midiaǁîna ge ǃgôaǃgon; tsî gu ge Oreb tsî Seeb tsîkha di danara Gideonni ǃoa ge ūsī Jordanǃāb nauǃanib ai.