Read Khoekhoegowab ǂHanuǂhanu-aogu 8 Bible Online

ǂHanuǂhanu-aogu 8 - Khoekhoegowab bible

ǂHanuǂhanu-aogu 8

¹ǃNubai gu ge Efraimmi di aoga ǁîb ǃoa ge mî: Mâ dīǃkhai-e kha nē-e, sigets go dī-ū-e, sigets ǂgai tama ǃkhaisa, ǃgû tsîts go Midiaǁîna ǃkhamū ǃnubai? Tsî gu ge ǀgaisase ǁîb ǀkha ge ǂnoagu.

²Ob ge ǁîgu ǃoa ge mî: Tare-e ta ǁnâi go dī sago khami? Efraimmi di khaoǃorade Abieseri di ǂauxûiǂûǃgaos ǃgâ-ai ǃgâi tama di hâ?

³Elob ge Midianni di gaosakha Oreb tsî Seeb tsîkha sago ǃomǁae go mā; tita kha sago go dī xase dī ǁkhā ta go i? ǁGoasib ge ǁîgu di ǁaib ǁîb ǃoagu gu ūhâba ge toa, nē mîsab ge ǃhoao.

⁴Tsî Gideonni ge Jordanǃāb tawa sīo, ob ge ge ǃgâu ǁnā ǃnonakaidisi khoegu, ǁîb ǀkha hâgu ǀkha, tsau hâǃâ xawe ra ǃgôaǃgonse.

⁵Ob ge Sukots di khoen ǃoa ge mî: ǀNî perega mā ǁaes, ti dāǃharode ra saosa, tsau gu hâ xuige; tsî tita ge Sebaxi tsî Salmunab tsîkha, Midiaǁîn di gao-aokha ra sauruǃgon.

⁶O gu ge Sukots di ǂamsaga ge mî: ǀNaib kha ǃomǃnāb Sebaxi tsî Salmunab tsîkha diba sa ǃomǁae hâ, o da sa ǂnubisa pereba nî mā?

⁷ǃNubaib ge Gideonna ge mî: ǁNā-amaga, ǃKhūb ga Sebaxi tsî Salmunab tsîkha ti ǃomǁae māo, o ta ge sadu di ǁgansa nî dāǂkhū ǃgaroǃhūb di ǁkhūgu ǀkha tsî ǀgamin tsîn ǀkha.

⁸Tsîb ge ǁnāpa xu Penuels ǃoa ǃapa tsî ǁnās ǁkhās xase ǁîna ǃoa ge ǃhoa. On ge Penuels khoena ǁîba ge ǃeream, Sukots khoen ge ǃeream bis ǁkhās khami.

⁹Ob ge ǁkhāti Penuels khoen ǃoa ge mî: ǂKhîb ǀkha ta ga oao, o ta ge nē ǂgō-omma nî ǃgauǁgui.

¹⁰Tsî Sebaxi tsî Salmunab tsîkha ge Karkors tawa ge hâ i tsî toroǂnubis âkha ǁîkha ǀkha, disikoroǀaǀoadisi nî ī khoegu aiǂoas ôan di toroǂnubis xa ge ǃgaugu hoaga; tsî ǁnā ge gu ge ǀguikaidisi tsî ǀgamdisiǀoadisi ge i, gôaba ra ǂgaeǂuiga.

¹¹Tsî Gideonni ge ge ǃgûǃapa tentomdi ǃnâ ǁan hân di daoba-ū Nobaxs tsî Jogbehas tsîra xu aiǂoasǀî; tsîb ge ǁnā ǁgoeǃkhaisa ge ǂnau, ǁūsen ge ǁgoeǃkhais dina hâ i xui-ao.

¹²O kha ge Sebaxi tsî Salmunab tsîkha ge ǁhâ, xaweb ge ǁîkha sauruǃgon tsî ge ǃkhō, Midianni di gao-aokha, Sebaxi tsî Salmunab tsîkha, tsîb ge ǁgoeǃkhais hoasa ge ǃhuriǃhuri.

¹³Tsî Gideonni, Joab ôab ge ǃkhamguba xu oahāo Heresa xu,

¹⁴ob ge ǀgôab Sukots khoen diba ǃkhō tsî ge dîǃā bi; ǁîb ge Sukots ǂamkhoegu tsî ǁîs di kaigu tsîga ge xoamâiba bi, hûdisihûǀa aoga.

¹⁵ǃNubaib ge Sukots khoen tawa sī tsî ge mî: Mû, nēkha hâ Sebaxi tsî Salmunab tsîkha, ǁîkha xa du ge ǃhō te kha, mî rase: ǀNaib kha ǃomǃnāb Sebaxi tsî Salmunab tsîkha diba sa ǃomǁae hâ, o da sa khoegu, hîa tsau hâga pereba nî mā?

¹⁶Ob ge khoegu ǁnā ǃās diga ge ū tsî ǃgaroǃhūb di ǁkhūgu tsî ǀgamin tsîna, tsîb ge Sukots khoena ǁîn ǀkha ge ǁkhāǁkhā.

¹⁷Tsî ǂgō-ommi Penuels dibab ge khôaǁnâ tsî ǃās di khoena ge ǃgam.

¹⁸ǁNās khaoǃgâb ge Sebaxi tsî Salmunab tsîkha ǃoa ge mî: Mati ī khoeǃnôaga ge i, sakho ge Tabors tawa ǃgamga? O kha ge ge mî: Sats ǁkhāts ī khami gu ge ge ī i; mâb hoab âgu ge gaoǀgôa-i khami ge ī i.

¹⁹Ob ge ǁîba ge mî: ǁÎgu ge ti ǃgâ ge ī, ti îs di ôaga! ǃKhūb a ûitsama ǃkhais ao, ǁîga kho ga ûi kai hâ io, o ta ga tita ǃgam kho tama i hâ.

²⁰Ob ge Jeteri, ǂguroǃnaesabeb âb ǃoa: Khâi îts ǁîkha ǃgam! ti ge mî; xawe ǀgôab ge gôab âba ǂgaeǂui tama ge i, ǃaob ra xui-ao, ganupeb a ǀgôa amaga.

²¹ǃNubai kha ge Sebaxi tsî Salmunab tsîkha: Satsa khâi îts sikhoma ǂnû-ai, aob ī khami, ǁnās ǁkhās khamib ge ǀgaib âba ī xuige, ti ge mî. Ob ge Gideonna khâi tsî Sebaxi tsî Salmunab tsîkha ǃgam tsî ǁkhârogu ǃnain âkha di ǃaob ai hâga ge ū.

²²ǃNubai gu ge Israeli aoga Gideonni ǃoa ge mî: Gao re sida ǂama, sats tsî sa ôab tsî sa ôab di ôab tsîgo, Midiaǁîn ǃomǁaeba xuts go ore da xuige.

²³Ob ge Gideonna ǁîgu ǃoa ge mî: Tita ge sado gaoǂam tide, ǁkhātib ge ti ôaba gaoǂam du tide. ǃKhūb ge nîra gaoǂam du.

²⁴ǃAruǀîb ge Gideonna ǁîgu ǃoa ge mî: ǀGui ǂgaoǀkhā-i ǀgui-e ta ge sago nî ǂgaoǀkhā, îb mâb hoab âgo ǁkhâuǁnâs âb xa ǃūs di î-îxū-e mā te. ǁÎn ge ǃhuniǀuri-î-îxūn ǃūs dina ge ūhâ i, Ismaelǁîn ge i amaga.

²⁵O gu ge: Mā ǂgao ge ra, ti ge mî; o gu ge sara-e ge ǃā tsî ǁî-i aib ge mâb hoaba ǁkhâuǁnâs âb xa ǃūs di î-îxū-e ge aoǁgui.

²⁶Tsî ǃgommi ǁnā ǃhuniǀuri-î-îxūn ǃūs din hîab ge ǂgaoǀkhān dib ge ǃhuniǀurib xa ǀguiǀoadisi tsî hûkaidisi sekeldi kō ge i, ǁkhârogu tsî ǁkhamrogu tsî purpursaran, Midiaǁîn di gao-aogu ge ǂgaeǂgāsen hâ in ose tsî ǃaob di î-îxūn, ǃnaidi di ǃaogu ai ge hâ in ose.

²⁷Tsî Gideonni ge ǁîn xa efoba dī tsî ge ǂnûi bi ǁîb di ǃās ǃnâ Ofras tawa. Ob ge Israeli hoaba ǁîba ǁnāpa gere ǀaiǃgon; tsî ǁî ǃkhai-i ge Gideonni tsî ǁîb di omsa ge ǂhamxū kaiba.

²⁸Nētin ge Midiaǁîna ge ǃgamǃgamhe Israeli ôan di ais aiǃâ tsî danas âna ǃaruǀî ǀhōǂoa ǁoa ge i. Tsî ǃhūb ge hakadisi kuriga ǃnōsa ge i Gideonni di tsēdi ǃnâ.

²⁹Tsî Jerubbaali, Joab ôab, ge ǃgû tsî oms âb ǃnâ sī ge ǁan.

³⁰Tsî Gideonni ge hûdisi ǀgôaga ge ūhâ i, kamanab âba xu ge ǀkhīga, ǂgui taradeb ge ūhâ i xui-ao.

³¹Tsî ǀgamitaras âb, Sexems tawa hâs, ge ǁkhāti ǀgôaba ge ǁoraba bi; tsîb ge ǀons âba Abimelex ti ge ǂgai.

³²Tsî Gideonni, Joab ôab, ge ǃgâi kairasis ǃnâ ge ǁō; tsîb ge ge ǁkhōhe Ofras tawa, ǁîb îb Joab, Abieserǁîb di ǀhobas ǃnâ.

³³Tsî i ge ge ī, Gideonni ge ǁō-o, Israeli ôan ge dabasen tsî Baalga gere ǀaiǃgon ǃkhaisa; tsîn ge Baal-Berita elose ge dībasen.

³⁴Tsî Israeli ôan ge ǃKhūb, ǁîn Elob ǁîna ǁîn ǂnamipe hâ khākhoen âna xu ge oreb xa ǂâi tama ge hâ i.

³⁵Tsîn ge Jerubbaali, ǁnāb ge Gideonni omma ǃgâidī-e dī-ū tama ǁnā ǃgâib, Israeli tawab ge dīb ǃoa.