Read Khoekhoegowab ǂHanuǂhanu-aogu 9 Bible Online

ǂHanuǂhanu-aogu 9 - Khoekhoegowab bible

ǂHanuǂhanu-aogu 9

¹Tsî Abimelexi, Jerubbaali ôab, ge Sexems ǃoa ge ǃgû ǁîb îs di ǃgâsagu ǁga; tsîb ge ǁîgu ǃoa tsî ǁîb îs di îb ommi ǃhaos hoas ǃoa ge mî:

²ǃHoa du re Sexems ǁgâuǁîgu hoagu di ǂgaedi ǃnâ: Mâ xū-e a ǃgâiba du, hûdisi aogu hoatsama Jerubbaali ôagu ra gaoǂam dusa? ǀGui aob ǀguib ra gaoǂam dusa? Î du ǁkhāti ǂâiǂâisen, sadu di ǂkhō tsî ǁgan ta asa.

³ǃNubai gu ge ǁîb îs di ǃgâsaga ǁîb xa ge ǃhoa Sexems di ǁgâuǁîgu hoagu di ǂgaedi ǃnâ nē mîdi hoade; ob ge ǂgaob âna Abimelexiǀî ge ǂōsen: ǁÎb a sida di ǃgâ, ti mî tsî.

⁴Tsîn ge ǁîba hûdisi ǃhuniǀurimarina ge mā, Baal-Beriti di omma xu; ob ge Abimelexa ǁîn ǀkha ǁau tsî supuǂâixa khoegu, ǁîba ra saoga ge ǃgae.

⁵Tsîb ge ǁîb îb di ommi ǃnâ ge sī Ofras tawa, tsîb ge ǁîb di ǃgâsagu, Jerubbaali ôagu, hûdisi aoga ǀuis ai ge ǃgam; tsî Jotammi, Jerubbaali di ôab ǂkhammi ǀguib ge ge ǃgau, ǁîb ge gaugausen amaga.

⁶ǃNubai gu ge Sexems di ǁgâuǁîgu hoagu tsî Bet-Milos di ommi hoaba ǀhû tsî ge ǃgû tsî Abimelexa ge gao-aodī, ǁnā ǀgapi terpentinhais, Sexems tawa mâs ǃgao.

⁷Tsî Jotamman ge mîbao, ob ge ǃgû tsî Gerisimǃhommi di ǀgapib ai mâ tsî dommi âba ūkhâi tsî ǂgai tsî ǁîn ǃoa ge mî: ǃGâ te re, Sexems di ǁgâuǁîgo, ob ge Eloba sago nî ǃgâ.

⁸Hain ge koma ge ǃgû, gao-ao-en nî ǁîn ǂama ǀnause; on ge ǀkherahais ǃoa ge mî: Sasa hā îs gao-ao kai sida ǂama!

⁹Os ge ǀkherahaisa ǁîn ǃoa ge mî: Ti ǁnuixasib, Elob tsî khoen tsîn ti ǃnâ ra ǃkhōǀkhāba ǁnāxū tsî ta kha sī hain ai nî ǀnarema?

¹⁰ǃNubain ge haina ǀnomahais ǃoa ge mî: Sasa hā îs gao-ao kai sida ǂama!

¹¹Os ge ǀnomahaisa ǁîn ǃoa ge mî: Okha, tita ti ǂkhonni tsî ti ǃgâi ǂûna ǁnāxū tsî sī hain ai nî ǀnarema?

¹²ǃNubain ge haina ǂauxûiǂûhais ǃoa ge mî: Sasa hā îs gao-ao kai sida ǂama!

¹³Os ge ǂauxûiǂûhaisa ǁîn ǃoa ge mî: Okha, tita ti ǂkhon ǂauxûib, Elob tsî khoen tsîna ra ǃgâiaǂgao kaiba ǁnāxū tsî sī tsî hain ai nî ǀnarema?

¹⁴On ge hain hoana ǁkhūhais ǃoa ge mî: Sasa hā îs gao-ao kai sida ǂama!

¹⁵Os ge ǁkhūhaisa hain ǃoa ge mî: Amase du ga tita gao-aose sadu ǂama ǂkhauǀkhāo, ǁnâi hā î du ti sommi ǃnâ sâ; ǁnā tamas ka io, as ǀaesa ǀkhī, ǁkhūhaisa xu, îs Libanonni di sederhaina hapu.

¹⁶Tsî nēsi ǁnâi, amab tsî ǂhauǃnâb ǀkha du ga dī hâo, Abimelexa du go gao-aodī ǃkhaisa, tsî ǃgâidī-e du ga Jerubbaali tsî ommi âb tawa dī hâo, ǃomkha âb di ǃoaǂuibasens ǃoa du ga dī-ū bi hâo:

¹⁷Ti îb kom sado gere ǃkhambao, tsîb kom ûib âba ǃaorosasib ǃnâ mâi tsî Midiaǁîn di ǃomǁaeba xu ge ore duo;

¹⁸xawe sadu kom nētsē go khâio ti îb di ommi ǃoagu, tsî du kom ǁîb ôagu, hûdisi aoga, ǀgui ǀuis ai go ǃgamo, tsî du kom Abimelexi, ǃgās âb di ôaba go gao-aodīo, Sexems di ǁgâuǁîgu ǂama, sadu ǃgâsab a amaga.

¹⁹ǁNâi amab tsî ǂhauǃnâb tsîkha ǀkha du ga Jerubbaali tsî ommi âb tawa nētsē dī hâo, ǃgâiaǂgao ǁnâi Abimelexi ǂama, îb ǁîba ǁkhāti sadu ǂama ǃgâiaǂgao!

²⁰Tsî ǁnā tamas ka io, as ǁnâi ǀaesa ǀkhī Abimelexa xu, îs Sexems di ǁgâuǁîgu tsî Milos ommi hoaba hapu; îs ǀaesa ǀkhī Sexems ǁgâuǁîga xu tsi Milos ommi hoaba xu, îs Abimelexa hapu!

²¹ǁGoasib ge Jotamma ǁhâ tsî Beers ǃoa ge ǃgû; tsîb ge ǁnāpa ge ǁan ǁîb di ǃgâsab Abimelexi ǃaroma.

²²Tsî Abimelexi ge ǃnona kuriga Israeli ǂama gao-o,

²³ob ge Eloba ǂkhaba gaga-e ge sî Abimelexi tsî Sexems di ǁgâuǁîgu ǁaegu; o gu ge Sexems di ǁgâuǁîga Abimelexa îǂhôaoǃnâse ge sîsenū,

²⁴ǁnā ǁgaridīb, Jerubbaali di hûdisi ǀgôagu tawa ge dīheb nî hāse tsî ǁîgu di ǀaob nî ǁguihega Abimelexi, ǁîn di ǃgâsab, ǁîga ge ǃgammi ai tsî Sexems di ǁgâuǁîgu ai, ǁîb di ǃomkha ge ǀgaiǀgaiga, ǃgâsagu âbab nî ǃgamga.

²⁵Tsî Sexems di ǁgâuǁîgu ge ǁîb ǃoagu khoega ge ǂnûi, ǃhomgu di ǀgapigu ai gu nî ǁgoeǃgâ biga, tsî ǁîga ǁnā daoba-ū ra ǃgû-īǀkhān hoana gu ge gere ūǀhana; tsîs ge ǁî ǃkhaisa Abimelexa ge mîbahe.

²⁶Tsî Gaali, Ebedi ôab, ge ǁkhāti ǃgâsagu âb ǀkha Sexems ǃnâ ge ǃgûǂgâ; tsî Sexems di ǁgâuǁîgu ge ǁîba ge ǂgomaiǂnûi.

²⁷Tsîn ge ǃaub ai ǂoa tsî ǂauxûiǂûǃhanagu âna ǃoratoa tsî ǂauxûiǂûna ge dāǃnâ tsî koatsanade ge dī; tsîn ge ǁîna ǁîn elob di ommi ǃnâ ǂgâ tsî ǂû tsî ā tsî Abimelexa gere ǀâxare.

²⁸Tsî Gaali, Ebedi ôab, ge ge mî: Tariba Abimelexa tsî tariba Sexemma, o da ǁîba nî ǃoaba? Jerubbaali ôa tamaba ǁîba? Tsî Sebula ǁîb di danakhoe tamaba? Hamori, Sexemmi îb di aoga ǃoabaǀnam ǁîb ǃgâ-ai: Tare xū-i ǃaroma da kha ǁîba nî ǃoaba?

²⁹Îs ga ti ǃomǁae hâ nē ǁaesa! O ta ga Abimelexa ǃgâise ǃhaebē hâ. Tsî Abimelexi ǃoab ge ge mî: Sa ǂnubisa ǂguiǂgui îts ǂoa.

³⁰Sebuli, ǃās di ǂamsab ge Gaali, Ebedi ôab di mîde ǁnâuo, ob ge ǁaib âba ge ǂhubi.

³¹Tsîb ge ǂganǃgâsase sîsabega Abimelexi ǃoa Arumas ǁgā sî tsî ge mî: Mû, Gaali, Ebedi ôab tsî ǃgâsagu âb ge Sexems tawa go hā, tsî mû, ǁîgu ge nē ǃās ǀkha khākhoese ra sîsenǃoa tsi.

³²ǁNâi tsuxuba khâi, sats tsî sa ǀkha hâ ǁaes tsîdo, î ǃaub ǃnâ ǁîna ǁgoeǃgâ.

³³O i ge nîra ī, ǃnauǁgoaga, sores ra ǁhai hîa, khâi, ǃnaube îts ǃāsa ǃhabi; tsî mû, ǁîb tsî ǁîb ǀkha hâ ǁaes ga sa ǃoa ǂoaxao, ǁnâi ǁîba dī-ū, sa ǃommi a ǁkhās kōse.

³⁴Ob ge Abimelexa ǁaes, ǁîb ǀkha hâs ǀkha tsuxuba khâi tsî Sexems tawa ge ǁgoeǃgâ, haka ǃnandi ǃnâ.

³⁵Tsî Gaali, Ebedi ôab ge ǂoaxa tsî ǃās di ǁāb tawa ge hā mâ; ob ge Abimelexi tsî ǁîb ǀkha hâ ǁaes hoasa ǁgoeǃgâǃkhaiba xu ge khâi.

³⁶Tsî Gaali ge ǁaesa mûo, ob ge Sebuli ǃoa ge mî: Mû, ǁae-i kom ra ǁgôaxao ǃhomgu di ǀgapiga xu. Ob ge Sebula ǁîb ǃoa ge mî: ǃHomgu di sommats ra satsa khoen axase mû.

³⁷Ob ge Gaala ǃaruǀîǀgui ǃhoa tsî ge mî: Mû, ǁnās ra ǁaesa ǁgôaxa ǃhūb di ǁaeguba xu, tsî ǀgui ǂguib ge Meonenims di daoba-ū ra hā.

³⁸Ob ge Sebula ǁîb ǃoa ge mî: Mapas nēsi hâ sa ams, ǁîs ǀkhats ge, Tariba Abimelexa, ǁîba ta nî ǃoababa? ti mîsa. Nēsa ǁnā ǁae tamasa, sats ge ǃharaxūsa? ǁNâi ǂoa nēsi îts ǁîba ǃkhamū.

³⁹Ob ge Gaala Sexems ǁgâuǁîgu di ais aiǃâ ǂoa tsî Abimelexa ge ǃkhamū.

⁴⁰Tsî Abimelexi ge ǁîba ge sauruǃgon, ais âb aiǃâb ra ǃhū xui-ao; tsî ǂguin ge ǃgamhe gena ge i, ǃās di ǁāb kōse.

⁴¹Tsî Abimelexi ge Arumas tawa ge hâ; tsî Sebuli ge Gaali tsî ǃgâsagu âba ge ǃhaebē, Sexems tawa gu ge ǁan ǁoa is kōse.

⁴²Tsî i ge sao ra tsē ge ī, ǁaes ra ǃaub ǃoa ǃgû ǃkhaisa, tsîn ge ǁîsa Abimelexa ge sī mîba.

⁴³Ob ge ǁaesa ū tsî ǁîna ǃnona ǃâdi ǃnâ ge ǀgora tsî ǃaub ǃnâ ge ǁgoeǃgâ; tsî kō tsîb ge mûo, ǁaes ra ǃāsa xu ǂoa ǃkhaisa, ob ge ǁîna hāǂam tsî ge ǂnau.

⁴⁴Tsî Abimelexi tsî ǃâdi, ǁîb ǀkha hâdi tsîn ge ǁîna hāǂam tsî ge sī mâ, ǃās di ǁāb tawa; tsî nau ǃâra ge ǃaub ai hân hoana hāǂam tsî ge ǂnau.

⁴⁵ǃAruǀîb ge Abimelexa ǁnā tsēs ǁkhās ai ǃāsa ge ǃkhamū, tsîb ge ǃāsa ū tsî ǁaes, ǁîs ǃnâ hâsa ge ǃgam; tsîb ge ǃāsa hîǀhuru tsî ǁîs ai ǂōba ge tsoro.

⁴⁶Tsî ǁgâuǁîgu Sexems ǂgō-ommi digu hoagu ge ǁnâuo, o gu ge ǁaposa ǃkhaib Baal-Beriti ommi dib ǃnâ ge ǂgâ.

⁴⁷Tsî Abimelexi ge mîbaheo, Sexems ǂgō-ommi di ǁgâuǁîgu hoagu ge ǀhû ǃkhaisa,

⁴⁸ob ge Abimelexa ǃhommi Salmonni ai ge ǃapa, ǁîb tsî ǁîb ǀkha hâ ǁaes hoaragasa; tsî Abimelexi ge ǃō-e ge ū ǃomǁaeb âb ǃnâ, tsîb ge hai-e xu ǁnâu-e ǁhāǁnâ tsî ūkhâi tsî ǃhōb âb ai ge ǁgui; tsîb ge ǁaes ǁîb ǀkha hâs ǃoa ge mî: Tita goro dī xū-i hîa du go mû-e, ǃhae î du dī tita khami.

⁴⁹Os ge ǁaes hoasa ǁkhāti mâ-i hoa-i ǁî-i di ǁnâu-e ǁhāǁnâ tsî Abimelexa sao tsî ǁî-e ǁaposa ǃkhaib tawa ǁgui tsî ǁnāti ǁaposa ǃkhaiba ǀaes ǀkha ge khauǃkhū; on ge Sexems ǂgō-ommi di khoen hoana ge ǁō, ǀguiǀoadisi nî ī khoena, aogu tsî taradi tsîn kōse.

⁵⁰ǁNās khaoǃgâb ge Abimelexa Tebes ǃoa ǃgû tsî Tebesa xāǂgā tsî ǁîsa ge ū.

⁵¹Tsî i ge ǁaposa ǂgō-om-e ǃās ǁaegu ge hâ i; on ge aogu tsî taradi tsîn hoan tsî ǃās di ǁgâuǁîgu hoaga ǁnāǀî ǁhâ tsî ǁîn khaoǃgâ ge ǂganam; tsîn ge ǂgō-ommi di ǂamais ai ge ǃapa.

⁵²ǃNubaib ge Abimelexa ǂgō-ommi kōse sī tsî ǁîsa ge ǃhapi; tsîb ge ǂgō-ommi di ǁāb kōse ge ǀgū, ǁîbab nî ǀaes ǀkha khauǃkhūse.

⁵³ǃNubai i ge tara-e ǁkhamiǀuis di ǃâba Abimelexi di danas ai ge aoǁnâ; tsîs ge danaǂkhōs âba ge ǂkhū.

⁵⁴ǁGoasib ge ǃhaese ǁnā ǀgôab, ǁâtanin âba gere taniba ǂgai tsî ǁîb ǃoa ge mî: Gôab âtsa ǂgaeǂui îts ǃgam te, în tita xa tā: Tara-i go ǃgam bi, ti mî. Ob ge ǀgôab âba ge ǃkhāǃganu bi tsîb ge ge ǁō.

⁵⁵Tsî Israeli aogu ge mûo, Abimelexi ge ǁō ǃkhaisa, o gu ge ge ǃgû, mâb hoaba ǁîb di ǃās ǃoa.

⁵⁶Nētib ge Eloba ǁnā ǂkhabab Abimelexi dib, ǁgûb tawab ge dība ge dīdawa-am, hûdisi ǃgâsagu âba ǃgam tsî.

⁵⁷ǁNās ǁkhās xaseb ge Eloba Sexems khoen di ǂkhabab hoaba ǁîn danas ai ge oahā kai, tsî ǀâxareb Jotammi, Jerubbaali ôab dib ge ǁîn ǂama ge hā.