Read Khoekhoegowab 3 Johaneb 1 Bible Online

3 Johaneb 1 - Khoekhoegowab bible

3 Johaneb 1

¹ǂNomdomta, Gajub ǀnamǀnamsabeb, amab ǃnâ ta ǀnam hâba ǃoa:

²ǀNamsatse, hoan ǂamai ta ra ǁkhoreba tsi, ǃgâise hâsa tsî ǂurusats asa, sa ǀoms ǃgâise hâs ǁkhās xase;

³kaise ta ge ǃgâiaǂgao hâ i xui-ao, ǃgâsagu ge hā tsî sa amab xa ǃkhō-am ǃnubai, amab ǃnâts ra tanisen khami.

⁴Nē i xa kai ǃgâiaǂgao-e ta ūhâ tama hâ, ti ôan ra amab ǃnâ ǃgû ǃkhaisa ta ra ǁnâu-i ǀgui-i xa.

⁵ǀNamsatse, ǂgomǂgomsasets ra dī, ǃgâsan tsî ǃhaokhoen tsînats ra dī-ūn hoan ǃnâ,

⁶ǁîn sa ǀnammi xa ǀhaohâb aiǃâ ge ǃkhō-amna; ǁînats ga, Eloba anuba hâ khami, ǁāǁābao, ots ge ǃgâise nî dī;

⁷ǁîb di ǀons ǃaroman ge ǃgûǂoa amaga, ǀūbena xu xū-i xare-e ū tamase.

⁸O ta ge ǁnāti īna ǃkhōǃoasa surude hâ, î da ga amab di ǀhaoǃoabasabe kai ti.

⁹ǀHaohâba ta ge ge xoaba; xawe Diotrefeb, ǁîn ǃnâ ǂguro ǂgao hâb ge sige ǃkhōǃoa tama hâ.

¹⁰ǁNā-amaga, sī ta kao, o ta ge ǁîb di sîsengu, ǁîb ra dīgu xa nî ǂâiǂâiǃnâ bi, ǂkhaba mîdi ǀkha sige ǃoagu ra ǂkhupise; tsî nēs ǀkha ǂâu tamaseb ge ǁkhāti ǃgâsana ǃkhōǃoa tama hâ, tsîb ra ǁîsa ra dī ǂgaona ǂhani, tsî ǀhaohâba xu ǁîna aoǂui.

¹¹ǀNamsatse, ǂkhababa tā ǁgaeǁgae, î ǃgâiba ǁgaeǁgae. ǃGâidī ra-i ge Eloba xu hâ-e; xawe ǂkhabadī ra-i ge Eloba mû tama-e.

¹²Demetriub ge hoan tsî amab ǂûb xa ra ǀhûǀguitimîbahe; tsî sige ǁkhāti ra ǃkhō-am, tsîts ge a ǂan, sige di ǃkhō-ams a ama-ai ǃkhaisa.

¹³ǂGui xūn, xoa ta nîna ta ge ūhâ i, xawe ta ge inki tsî penni ǀkha dī ǂgao tama hâ;

¹⁴tsî ta ge ra ǃâubasen, ǃhaese ta nî mû tsisa, o khom ge amsa xu ams ǃoa nî ǃhoa.

¹⁵ǂKhîba ab hâǀkhā tsi. ǀHōsan ra tawede tsi. ǀHōsana ǀons ǀkha tawede re.