Read Khoekhoegowab Judab 1 Bible Online

Judab 1 - Khoekhoegowab bible

Judab 1

¹Judata, Jesub Xristub di ǃgāta, Jakobub di ǃgâta, ǂgaihesan Elob ǁgûb ǃnâ ǃanuǃanuhe hân tsî Jesub Xristub ǃnâ sâuhe hân ǃoa:

²ǀKhomxaǂgaosib tsî ǂkhîb tsî ǀnammi tsîga a gu sado ǂguiǂguibahe!

³ǀNamsabedo, sada hoada di ǃgâiǃōsib xa ta nî xoaba dusa ta ra ǃhaeǃhaesen hîa ta ǂhâba hâse ūhâ, sado xoaba tsî ta nî ǁnamasa, î du ga ǂgoms, ǀgui ǃnāsa ǃanuna māǁnâhe hâs ǃaroma ǃkham;

⁴ǀnî khoen ge ǀkhuriǂgâ xui-ao, ǂomxa ǁaeba xu nē ǀgoraǃgâsa ǃoa aixoahe hân, eloxoresan, Elob ǀkhomma ra sîsenūsān, tsî ǀguise hâba da gaosab Elob tsî sada ǃKhūb Jesub Xristuba ra ǀūxūna.

⁵O ta ge ǂâiǂâiǃnâ du ǂgao hâ, ǀnai du ǁîsa ǂan xawe, ǃKhūb ge ǁaesa Egipteba xu ore, tsî ǁîn ǂgom tamana hîkākā ǃkhaisa.

⁶Tsî ǀhomǃgāgu, ǁîgu di ǂnûiǂgāde ǃkhōǀgaipe tamagu, tsî ǁîgu di hâǃkhais ǂûsa ge ǁnāxūgu onab ge ǀamo ǃgae-ūdan ǀkha ǃkhaenab ǃnâ kaitsēs di ǀgoraǃgâsa ge sâuba.

⁷Sodoms tsî Gomoras tsî ǁîra ǁgoeǂnamipe hâ ǃādi, ǁîra ǁkhāra xase ge ǀaidīdi tsî ǀkhara ǁgansa ge ǃgôaǃgondi ge aiǁgaus ase mâihes ǁkhās khami, ǀamo ǀaeb di ǁkharaba tani tsî.

⁸ǁNās ǁkhās xasen ge nē ǁhapo ran tsîna ǁgansa ra ǀuriǀuri, tsî gaosaga ra ǃharaxū, tsî kaisiga ra ǃkhāǃkhā.

⁹Tsî Mixaeli, ǂamǀhomǃgāb a xaweb ge Moseb di soros xab ge ǁgâuab ǀkha ǂnoagu tsî ǂharugu ǃnubai hîtsâ tama ge i, ǃkhāǃkhās ǀgoraǃgâ-eb nî ǁîb ǃoagu ūǀkhīsa, ob ge: Ab ǃKhūba, ǁkhara tsi! ti ǀgui ge mî.

¹⁰Xawe nē khoen ge ǀūn a xūna ra ǃkhāǃkhā; tsî ǂūsiba xun ǁnâuǃāo ǀgurun axase a ǂan, xun xa ra khôaǁnâhe.

¹¹Tsūba ǁîna, Kainni di daoban ge sao, tsî Bileammi di amǃnâs xa ǂgaeǂhapuhe hâsen ge ǁnā, tsî Koraxi di ǃhoaǃoas ǃnân ge kā xui-ao.

¹²ǁÎn ge ǂnaon, sadu ǀnamǂûǁaedi ǃnâ saub ose ǂûǀhao tsî ǁî-aitsama ra ǂûbasenna; ǁgamoǃnâ ǀnanun, ǂoagu xa ra doeǁgamahen ge ǁîn, ǂûo tsî ǀgam ǃnāra go ǁōtoa tsî ǃnomao hain ǁkhunab din xase īna;

¹³ǃkhausa hurib ǃgabin, ǁîn di taotaosasin di goab ra khuikhâin, ǁhapuma ra ǀgamiron, ǃkhaenab di ǃkhaeba ǀamosib kōse sâubahe hâna.

¹⁴Tsîb ge ǁkhāti Henoxi, Adamma xu hûǁîba ǁîn xa aikēbo, tsî ge mî: “Mû, ǃKhūb ge ǁîb di ǂgui ǀoadisi ǃanun ǀkha ra hā,”

¹⁵ǀgoraǃgâsab nî dīse hoan ǂama, tsî ǁkharab nîse ǁîn ǃnâ hâ eloxoresan hoana, ǁîn di dīgu, eloxoresasen gere dīgu hoagu ǃaroma, tsî hoa karosa mîdi, eloxoresa ǁore-aon ǁîb ǃoagu gere ǃhoadi ǃaroma.

¹⁶Nēn ge ǃgae-aona, ǁîn di hâs ǂama ra ǃgaena, ǁîn di turagu ǂhanigu ǃoa ra ǃgûna; tsî ams ân ge khūkhūsensa xūna ra ǃhoa, hōbasens ǃaroma khoe-i ais aiǃâ ra ǁgoasense.

¹⁷Xawe sado ǀnamsabedo, ǂâiǂâisen du re ǁnā mîdi, sada ǃKhūb Jesub Xristub di apostelgu gere aiǃhoadi xa,

¹⁸ǀuni ǁaeb ain nî ǃhō-aona hāsa, ǁîn eloxoresasib di turagu ǃoa nî tanisena, ti gu gere sadu ǃoa mî ǃkhaisa.

¹⁹Nēn ge ǁnān, ǁî-aitsama ra ǀgorasen, ǂūsi khoen, Gagaba ūhâ tamana.

²⁰Xawe sado ǀnamsabedo, hoan xa ǃanu ǂgoms âdu ai ǂnubikhâisen, ǃAnu Gagab ǃnâ ra ǀgorese;

²¹î du ǁî-aitsama sâusen Elob di ǀnammi ǃnâ, ǀkhomxaǂgaosib sada ǃKhūb Jesub Xristub diba ra ǃâubasenǃâ, ǀamo ûib ǃoa.

²²Î du ǀnîna ǀkhomxaba, ǀgorasa ra dīse;

²³î du nauna ǃaob ǀkha ǃkharesi, î du ǁîna ǀaesa xu tsubuǂui; î du ǁkhāti ǁgans xa ǂnaoǂnaohe hâ saraba ǁkhan.

²⁴ǁÎb sado ǃnôas ose a sâu ǁkhāb, tsî ūose ǁîb di ǂkhaisib aiǃâ a mâi ǁkhāb dâb ǃnâ,

²⁵ǁîb ǀguise hâ Elob, sada ǃGâiǃōdī-aob Jesub Xristub sada ǃKhūba xu, ab ūhâ ǂkhaisib tsî kaisib tsî ǁkhāsib tsî ǀgaib tsîna, nēsi tsî ǀamosib hoab kōse. Amen.