Read Khoekhoegowab ǂHaiǂhais 1 Bible Online

ǂHaiǂhais 1 - Khoekhoegowab bible

ǂHaiǂhais 1

¹Nēs ge ǂhaiǂhais Jesub Xristub dis, Elob ge mā bisa, ǁîb di ǃgāgab nî ǃhaese nîra īna ǁgauga, tsî ǀhomǃgāb âb ǀkhab ge sîs tsî ǁîb di ǃgāb Johanebab ge ǂanǂansa,

²Elob mîs tsî Jesub Xristub di ǀhûǀguitimîsa ge ǃkhō-ammi, tsî mûb gen hoan tsîna.

³ǃGâiǃō i ge hâ khomai ra-i tsî ǁnān, nē kēbosis di mîde ra ǁnâun, tsî ǁnān, ǁîs ǃnâ xoahe hâna ra sâubasenna; ǁaeb a ǀgū xui-ao.

⁴Johaneta hû ǀhaohâgu, Asiab ǃnâ hâgu ǃoa: ǀKhomma ab hâǀkhā du tsî ǂkhîb tsîna ǁîb hâ ab, tsî hâ ge ib, tsî hā nîba xu, tsî hû Gagagu, ǁîb di trons ai hâgu tsîga xu,

⁵tsî Jesub Xristub, ǂgomǂgomsa ǀhûǀguitimî-aob, ǁō hâna xu ǂguroǃnaesabeb tsî ǃhūbaib gao-aogu di ǂamgaosab tsîna xu, ǁîb, sada ge ǀnam hâ ib, tsî ǁoren âda xu ǀaob âb ǃnâ ge ǁāb,

⁶tsî Elob tsî ǁGûb âba sada gao-aose tsî pristerse ge dībab, ǁîba ab ǂkhaisib tsî ǀgaib tsîkha ūhâ ǀamosib hoab kōse! Amen.

⁷Mû, ǃgoaxab a ǀnanudi ǀkha, tsî mâ mûs hoas ge ǁîba nîra mû, ǁkhāti ǁnān, ǁîba ge ǃkhāǃganun, tsî ǃhūbaib di ǃhaodi hoadi ge ǁîb ǂama tsûsase nîra ā. Ā, Amen.

⁸Tita ge Alfata tsî Omegata, Tsoatsoata tsî ǀUnita tib ra ǃKhūba mî, ǁîb hâ ab, tsî hâ ge ib, tsî hā nîrab, Hoaǀgaixaba.

⁹Tita, Johaneta, ǁkhāti sadu di ǃgâsata, tsî ǀhao-amǃnâxa ra ta ǁgâiǀāb tsî gaosib tsî Jesub Xristub di ǃnūǃnâxasib ǃnâ ǃnāǃnuis Patmos ai ge hâ i, Elob mîs tsî Jesub Xristub di ǀhûǀguitimîs ǃaroma ta.

¹⁰ǃKhūb di tsēs ai ta ge Gagab ǃnâ ge hâ i; o ta ge ti ǃgâb ai kai dom-i, ǀgapadas di-i xase ī-e ge ǁnâu,

¹¹nēti ra mî-e: Tita ge Alfata tsî Omegata, ǂGurota tsî ǀUnita; îts mûts rana ǂkhani-i ǃnâ xoa, î ǁîna Asiab ǃnâ hâ hû ǀhaohâga ǃoa sî: Efesus ǃoa, tsî Smirnas ǃoa, tsî Pergamums ǃoa, tsî Tiatiras ǃoa, tsî Sardis ǃoa, tsî Filadelfias ǃoa, tsî Laodiseas ǃoa.

¹²O ta ge ge ǂnan, dommi tita ǀkha ra ǃhoaba ta nî mûse; tsî ǂnan ta geo, o ta ge hû ǃhuniǀuri kandelarga ge mû,

¹³tsî hû kandelargu ǁaegu ǀguib Khoen Ôab khami īb, ǂaidi kōse gaxu ǂamsaraba ana hâb, tsî ǀūs ai ǃhuniǀuri ǃgaesenna ǃgae hâba;

¹⁴tsî danas âb tsî ǀûn âb ge ǃuri ge i, ǃuri gūǀûn xase tsî tsamaros xase tsî mûra âb ge ǀaes di ǁhabu-i xase ge ī;

¹⁵tsî ǂaira âb ge ǂaib xase, gere ǂkhai ǁganoms ǃnâ ra tsuniba, tsî dommi âb ge kai ǁgamgu dib xase ge ī i;

¹⁶tsîb ge ǁîb di amǀkhāb ǃommi ǃnâ hû ǀgamirode ge ūhâ i, tsî ams âba xub ge hoaǃnamǀā gôaba ge ǂoaxa; tsî ǁîb di ais ge sores, ǁîs di ǀgaib ǀkha ra ǃnâs xase ge ī i.

¹⁷Tsî ǁîba ta ge mû o ta ge ǁō hâ i axase ǁîb di ǂaira tawa ge ǁnā; ob ge amǀkhāb ǃommi âba tita ai ǁgui, tsî tita ǃoa ge mî: Tā ǃao; tita ge ǂGurota tsî ǀUnita,

¹⁸tsî ûitsamata; tsî ǁō ge hâ i ta, xawe mû, ûi ta hâ ǀamosib hoab kōse. Tsî ta ge ǁkhowa-amkha ǁōb tsî Hadeb tsîkha dikha ūhâ.

¹⁹Xoa re mûts gon, tsî hâ an, tsî nēn khaoǃgâ nîra īn tsîna,

²⁰ǂganǃgâsib ǁnā hû ǀgamirodi, ti amǀkhāb ǃommi ǃnâts go mûdi dib tsî hû ǃhuniǀuri kandelargu diba: Hû ǀgamirodi ge ǀhomǃgāgu hû ǀhaohâgu diga, tsî hû kandelargu, mûts gogu ge hû ǀhaohâga.