Read Khoekhoegowab ǂHaiǂhais 11 Bible Online

ǂHaiǂhais 11 - Khoekhoegowab bible

ǂHaiǂhais 11

¹Tsî ta ge ǂā-e ge māhe, ǀguirohais xase ī-e; tsî ǀhomǃgāb ge mâ tsî ge mî: Khâi î Elob di tempela ǀguiro, tsî altars tsî ǁîb ǃnâ ra ǀgoreǀîna;

²î ai-ommi, tempeli ǃauga hâba ǁnāxū, î tā ǀguiro bi, ǀūbenab māhe hâ xuige; on nî ǃanu ǃāsa hakadisiǀgamǀa ǁkhâga dāǃgâ.

³O ta nî ti ǀgam ǀhûǀguitimî-aokha ǀgaiba mā, o kha nî kēbo ǀguiǀoadisiǀgamkaidisi tsî ǃnanidisi tsēdi kōse; ǁhōgu ǀkha anahe hâse.

⁴ǁÎkha ge ǁnā ǀgam ǀkherahaira tsî ǁnā ǀgam kandelarkha, ǃhūbaib di ǃKhūb aiǃâ ra mâkha.

⁵Tsî khoe-i ga ǁîna ǂkhôa ǂgao-o, o i ge ǀae-e ǁîkha amsa xu ǀkhī tsî ǁîkha di khākhoena nî hara; tsî khoe-i ga ǁîkha ǂkhôa ǂgao-o, o i ge ǁnāti nî ǃgamhe.

⁶ǁÎkha ge ǀgaiba ūhâ, ǀhomma kha nî ǂganamsa, ǀapi-i xare-i ǁîkha kēbosis di tsēdi ǃnâ ǁnā tidese; tsî kha ge ǀgaiba ūhâ ǁgamgu ǂama, ǁîga kha nî ǀaob ǃnâ ǀkharaǀkharasa, tsî kha nî ǃhūbaiba mâ tsû-ai-i hoa-i ǀkha ǂnause, ǁîkha ra ǂgaos kōse.

⁷Tsî ǁîkha di ǀhûǀguitimîsa kha ga dītoao, ob ge ǀgurub, abisuǂgâba xu ra ǂoaxaba ǁîkha ǀkha torodī, tsî dan, tsî ǁîkha nî ǃgam.

⁸Tsî ǁîkha di ǁō hâ sorora ge kai ǃās, gagasise Sodoms tsî Egiptes ti ra ǂgaihes, ǁîs ǃnâb ge ǁkhāti ǁîkha di ǃKhūba ǃgâuhes di daob ai nî ǁgoe.

⁹Tsî khoen ǁaedi din, tsî ǃhaodi din, tsî gowagu din, tsî ǃhaoǃnādi din tsîn ge ǁîkha di ǁō hâ sorora ǃnona tsēdi tsî tsē-i ǃkhare-i kōse nî mû tsî mā-am tide, ǁîkha di ǁō hâ sorora nî ǀhobadi ǃnâ ǁguihesa.

¹⁰Tsî ǃhūbaib ai ǁan hân ge ǁîkha ǂama ǃgâiaǂgao, tsî nî dâ, tsî ǃnarexūna nî sîbagu, nē ǀgam kēbo-aokha ǃhūbaib ai ǁan hâna gere tsûtsû xui-ao.

¹¹Tsî ǃnona tsēdi tsî tsē-i ǃkhare-i khaoǃgâ i ge ûib di gaga-i, Eloba xu go ǀkhī-e ǁîkha ǃnâ ge ǂgâ, o kha ge ǁîkha di ǂaidi ai ge mâ; ob ge kai ǃaoba ǁîkha ra ǃgapaǀîn ai ge ǁnā.

¹²Tsî kha ge ǀhomma xu kai dom-e ge ǁnâu, ǁîkha ǃoa ra mî-e: ǃApa hā re! O kha ge ǀnanus ǃnâ ǀhommi ǃoa ge ǃapa, tsî ǁîkha di khākhoen ge ǁîkha ge ǃgapaǀî.

¹³Tsî ǁkhā iri ai i ge kai ǃhūǂgubi-e ge ī; os ge ǃās di disiǁî ǃâsa ge ǁnā; tsî ǃhūǂgubib xan ge hûǀoadisi khoena ge ǃgamhe; tsî naun ge ǃao, tsî ǀhommi di Eloba ǂkhaisiba ge mā.

¹⁴ǀGamǁî tsūbas ge go ǃgôa-ī; mû, ǃnonaǁîs ge ǃhaese nîra hā.

¹⁵Tsîb ge hûǁî ǀhomǃgāba ge xâi; o gu ge kai domga ǀhommi ǃnâ ǃnae, tsî ge mî: Gaosigu ǃhūbaib digu ge go sida ǃKhūb di tsî ǁîb di Xristub di kaihe, tsîb ge ǀamosib hoab kōse nîra gaosîsen.

¹⁶Tsî ǀgamdisihakaǀa ǂnomdomgu, Elob aiǃâ ǁîgu di trondi ai ǂnôagu ge ǁîgu di aidi ai ǁnāǁgoe, tsî Eloba ǀgoreǀî,

¹⁷tsî ge mî: Sige ge ra gangan tsi, ǃKhūtse, Hoaǀgaixa Elotse, sats hâ ats, tsî hâ ge itsa, sa kai ǀgaiba ūbasen tsîts go gaosîsen ǃkhais ǃaroma.

¹⁸Tsî ǀūben ge go ǁaixa, ob ge sa ǁaiba go hā, tsî ǁō hân di ǁaeba, ǀgoraǃgâhen nîse, sa ǃgāgu kēbo-aogu tsî ǃanun tsî sa ǀonsa ra ǃaoǃgân, ǂkharin tsî kain tsînats nî ǁîn di amǃnâsa māse, tsî ǃhūbaiba ge hîǀhurunats nî hîkākāse.

¹⁹Tsî ǀhommi ǃnâb ge Elob di tempela ge ǁkhowa-amhe, ob ge ǃgaeǀhaos âb di arka ǁîb di tempeli ǃnâ ge mûhe; tsîn ge napagu tsî domgu tsî ǃgurugu tsî ǃhūǂgubib tsî kai ǃnareb tsîna ge hā.