Read Khoekhoegowab ǂHaiǂhais 13 Bible Online

ǂHaiǂhais 13 - Khoekhoegowab bible

ǂHaiǂhais 13

¹Tsî ta ge huriba xub ǀguruba ra ǂoaxa ǃkhaisa ge mû, hû danadi tsî disi ǁnâga ūhâba, tsî ǁîb di ǁnâgu ai di ge disi gao-aosi kronde ge hâ i, tsî ǁîb di danadi ai di ge ǃkhāǃkhās di ǀonde ge hâ i.

²Tsî ǀgurub, mû ta geb ge ǀgarub xase ge ī i, tsî ǁîb di ǂaidi ge bēri ǂaidi xase ge ī i, tsî amǃnâb âb ge xammi di amǃnâb xase ge ī i; tsî draki ge ǁîba ǀgaib âb tsî trons âb tsî kai ǁkhāsib tsîna ge mā.

³Tsî ta ge danadi âb di ǀguis, ǁōǁga rase ǀhapiǀhapihe hâsa ge mû, tsî ǁōǁōsa ǀhapis âb ge ge ǂgau; tsî ǃhūbaib hoab ge ǀguruba buru hâse gere saoǃgon.

⁴Tsîn ge draki, ǀguruba ǀgaiba ge māba ge ǀgoreǀî; tsîn ge ǀguruba ǀgoreǀî, tsî ge mî: Tari-e nē ǀgurub khami ī? Tsî tari-e ǁîb ǀkha a ǃkham ǁkhā?

⁵Tsîb ge am-e ge māhe, kai xūn tsî ǃkhāǃkhādeb nî ǃhoase, tsîb ge ǀgaiba ge māhe, hakadisiǀgamǀa ǁkhâgab nî nēna dīse.

⁶Ob ge ǁîb di amsa ǃkhāǃkhās ǀkha ge khowa Eloba ǃoa, ǁîb di ǀons tsî ǁîb di tabernakeli tsî ǀhommi ǃnâ ǁan hânab nî ǃkhāǃkhāse.

⁷Tsîb ge ǀgaiba ge māhe, ǃanun ǀkhab nî torodīse, tsîb nî ǁîna danse; tsîb ge ǀgaiba ge māhe mâ ǃhaos tsî mâ gowab hoab tsî mâ ǁaes hoas ǂama.

⁸Tsî ǃhūbaib ai ǁan hân hoan ge ǁîba nîra ǀgoreǀî, ǁnān ǀondi âna ǃhūbaib di ǃgaoǃgaosa xu ǁKhaob ǂāhe hâb di ûib di ǂkhanis ǃnâ xoahe tamana.

⁹Khoe-i ǂgaera ūhâ-e, a-i ǁnâu!

¹⁰Khoe-i ǃkhō-oms ǃoa ra ǂgaeǂgui-i ge ǃkhō-oms ǃnâ nîra ǂgâ-e; khoe-i, gôab ǀkha ra ǃgam-i ge ǁkhāti gôab ǀkha nîra ǃgamhe-e. Nēpa ra ge ǃanun di taniǀnamxasib tsî ǂgoms tsîra hâ.

¹¹Tsî ta ge ge mû, ǀnî ǀgurub ǃhūba xu ra ǂoaxa ǃkhaisa; tsîb ge ǀgam ǁnâkha ǁkhaob dikha xase īkha ge ūhâ i, tsîb ge draki xase ge ǃhoa.

¹²Tsîb ge ǂguro ǀgurub di ǀgaib hoaba ǁîb aiǃâ gere dī, tsîb ge ra dī, în ǃhūbaib tsî ǁîb ai ǁan hâna ǂguro ǀguruba ǀgoreǀî, ǁnāb ǁōǁōsa ǀhapis âb go ǂgauba.

¹³Tsîb ge kai saode ra dī, ob ge ǁkhāti ǀae-e ǀhomma xu ra ǁnāǁgôaxa kai khoen aiǃâ;

¹⁴tsîb ge ǃhūbaib ai ǁan hâna ra ǂgaeǂhapu ǁnā saodi, ǁîdeb nî ǀgurub aiǃâ dīseb māhe hâdi ǀkha, ǃhūbaib ai ǁan hâna ra mîbaǃâ, ǀguruban nî ī-e dībasa, ǁnā gôab di ǀhapisa ge ūhâ ib tsî ǁkhawa ra ûiba.

¹⁵Tsîb ge ge māhe, ǀgurub di ībab nî gaga-e māsa, ob ge ǀgurub di ība ǁkhāti ǃhoa tsî ge dī, ǁnān ǀgurub di ība ǀgoreǀî taman nî ǃgamhesa.

¹⁶Tsîb ge ra dī, on ǂkharin tsî kain, ǃkhū hân tsî ǀgâsan, ǃnorasan tsî ǃgān tsîn hoana sao-e ǁîn di amǀkhāb ǃommi tsî ǁîn di ǃūdi ai māhe,

¹⁷khoe-i xare-i ǁama tsî ǁamaxū tidese, ǁnā-i sao-i kas, ǀgurub di ǀons kas, ǁîb ǀons di ǀgaus kas hoasa ūhâ-i ǀgui-i.

¹⁸Nēpab ge gā-aisiba hâ; ǁnâuǃāba ūhâ-e, a-i ǀgurub di ǀgausa ǃgôakhâi; khoe-i di ǀgaus a amaga; tsî ǁîb di ǀgaus ge a ǃnanikaidisi tsî ǃnanidisiǃnaniǀa.