Read Khoekhoegowab ǂHaiǂhais 14 Bible Online

ǂHaiǂhais 14 - Khoekhoegowab bible

ǂHaiǂhais 14

¹Tsî ta ge ge kō; tsî mû, ǁKhaob ge Sionǃhommi ai ge mâ i, tsî ǁîb ǀkha ǀguikaidisi tsî hakadisihakaǀaǀoadisin, ǁîn di ǃūdi ai ǁîb dis tsî ǁgûb di ǀonsa xoamâihe hâna.

²Tsî ta ge ǀhomma xu dom-e ge ǁnâu, kai ǁgamgu tsî ǀgaisa ǃgurub di dommi xase ī-e. Tsî dommi, ǁnâu ta geb ge siterǀkhō-aon, siterdi ân ai ra ǀkhōn dib khami ge ī i;

³tsîn ge ǀasa ǁnaetsana-e ge ǁnae trons aiǃâ, tsî haka ûitsamagu aiǃâ, tsî ǂnomdomgu aiǃâ; tsî khoe-i xare-i ge ǁnā ǁnaetsanasa ǁkhāǁkhāsen ǁoa ge i, ǁnā ǀguikaidisi tsî hakadisihakaǀaǀoadisin, ǃhūbaiba xu ǁamaǂuibasenhe hân ǀguin.

⁴ǁÎn ge ǁnān, taradi ǀkha ǂnaoǂnaosen tamana; ǂkhamkhoesen ī xui-ao; ǁîn ge ǁnān, ǁKhaoba ǃgûb ra ǃkhais hoas ǁga ra saona; ǁîn ge khoena xu Elob tsî ǁKhaob tsîkha ǂgurosan ase ǁamaǂuihe hâ.

⁵Tsî ǁîn di ams ǃnâ i ge gāxaǃnâsi-i xare-e hōhe tama hâ; ūon a Elob di trons aiǃâ xui-ao.

⁶Tsî ta ge ǀnî ǀhomǃgāba ǀhommi ǁaegu ra ǁkhanase ge mû, ǀamo ǃgâiǂhôasa ūhâba, ǃgâiǂhôasab nî aoǁnâse ǁnān, ǃhūbaib ai ǁan hâna, tsî mâ ǃhaoǃnās hoasa, tsî ǃhaos hoasa, tsî gowab hoaba, tsî ǁaes hoasa,

⁷tsîb ge kai dommi ǀkha ge mî: Eloba ǃao, î ǁîba ǂkhaisiba mā, ǀgoraǃgâs âb di iri go hā xuige; î du ǀgoreǀî ǁnāb, ǀhommi tsî ǃhūbaib tsî hurib tsî ǁgamǀaudi tsîna ge dība.

⁸Tsî ǀnî ǀhomǃgāb ǀgamǁîb ge sao tsî ge mî: ǁNās ge go, ǁnās ge go Babilons, kai ǃāsa; ǁîs ǀaib di ǂauxûib ǀkhas ge ǁaedi hoade āsi xui-ao.

⁹Tsî ǃnonaǁî ǀhomǃgāb ge ǁîba sao, tsî kai dommi ǀkha ge mî: Khoe-i ga ǀgurub tsî ǁîb di ība ǀgoreǀîo, tsî i ga saosa ǁî-i di ǃūs ai tsî ǁî-i di ǃommi ai ǃkhōǃoao,

¹⁰ǁnā-i ge ǁkhāti nîra ā Elob ǁaib di ǂauxûib xa, ǁîb ǁaib di ǀgabis ǃnâ ǃūmûse ra ǂnâǂgāheba, tsî i ge nîra tsûtsûhe ǀaes tsî sulfuri tsîra ǀkha ǃanu ǀhomǃgāgu tsî ǁKhaob tsîn aiǃâ;

¹¹tsî ǀanni ǁîn tsûtsûhes dib ge ǀamosib hoab kōse ra ǃapa, tsîn ge sâ-i xare-e ūhâ tama hâ tsēs tsî tsuxub tsîra, ǁnān ǀgurub tsî īb âba ra ǀgoreǀîna, tsî ǀons âb di saosa ra ǃkhōǃoa-i hoa-e.

¹²Nēpab hâ taniǀnamxasib ǃanun diba; nēn hâ ǁnān, Elob di mîmāde ra ǃkhōǀgaipena tsî Jesub ǃnâ ǂgomsa.

¹³Tsî ta ge ǀhomma xu dom-e ge ǁnâu, tita ǃoa ra mî-e: Xoa re: ǃGâiǃōn ge hâ ǁnā ǁō hân, ǃKhūb ǃnâ ra ǁōna, nēsisa xu. Ā tib ra Gagaba mî. Sân ge nîra sîsengu âna xu; tsî ǁîn di sîsengu ge ǁîna ra sao.

¹⁴Tsî ta ge ge kō; tsî mû, ǂkhaisa ǀnanusa; tsî ǀnanus aib ge ǀguib, Khoen Ôab khami ība ge ǂnôa i, ǃhuniǀuri kronsa danas âb ai, tsî ǃomǁaeb âb ǃnâ ǀā ǃhoroǃgao-ūdasa ūhâba.

¹⁵Tsî ǀnî ǀhomǃgāb ge tempela xu ge ǂoaxa, kai dommi ǀkha ǀnanus ai ǂnôab ǃoa ra ǂgaiba: Sa ǃhoroǃgao-ūdasa sî î ǃgao, ǃgaots nî iri go hāba tsi, tsî ǃgaoxūn ǃhūbaib din go ǁan xuige.

¹⁶Ob ge ǃâus ai ǂnôaba ǃhoroǃgao-ūdas âba ǃhūbaib ai ge sî; ob ge ǃhūbaiba ge ǃgaohe.

¹⁷Tsî ǀnî ǀhomǃgāb ge ǀhommi ǃnâ hâ tempela xu ge ǀkhī, ǁkhāti ǀā ǃhoroǃgao-ūdasa ūhâba.

¹⁸Tsî ǀnî ǀhomǃgāb ge altarsa xu ge ǂoaxa, ǀaes ǂama ǀgaiba ūhâba; tsîb ge kai ǂgais ǀkha ǀā ǃhoroǃgao-ūdasa ūhâb ǃoa ǂgai, tsî ge mî: Sa ǀā ǃhoroǃgao-ūdasa sî, î ǂauxûiǂûna ǃhūbaib ǂauxûiǂûǃhanab dina ǃgao, ǁîb di ǂauxûiǂûn ǁan hâ xuige.

¹⁹Ob ge ǀhomǃgāba ǃhoroǃgao-ūdas âba ǃhūbaib ai ge sî, tsîb ge ǂauxûiǂûn ǂauxûiǂûǃhanab dina ǃgaoǁnâ, tsî ǁîna kai ǀāǃnâǃores Elob ǁaib dis ǃnâ ge aoǂgā.

²⁰Tsî ǀāǃnâǃores ge ǃās ǃauga ge dāǃnâhe, ob ge ǀaoba ǀāǃnâǃoresa xu ge ǀkhī hāgu di tomgu kōse, ǃnonakaidisi kilometerdi kōse.