Read Khoekhoegowab ǂHaiǂhais 17 Bible Online

ǂHaiǂhais 17 - Khoekhoegowab bible

ǂHaiǂhais 17

¹Tsî ǀguib hû ǃorede ūhâ ǀhomǃgāgu dib ge hā, tsî tita ǀkha ǃhoa, tsî ge mî: Nēxopa ī, o ta ge kai ǀai-aos ǂgui ǁgamgu ai ǂnôas di ǀgoraǃgâhesa nî ǁgau tsi,

²ǃhūbaib di gao-aogu ǁîs ǀkha ge ǀaigus, tsî ǃhūbaib ai ǁan hân ge ǁîs ǀaib di ǂauxûib xa ǀhoro kaihesa.

³Tsîb ge Gagas ǃnâ ǃgaroǃhūb ǃoa ge ūǃgû te, o ta ge tara-e ge mû, skarlakǀapa ǀgurub ǃkhāǃkhāǀondi xa ǀoa hâb tsî hû danadi tsî disi ǁnâga ūhâb ai ǂnôase.

⁴Tsîs ge tarasa purpuri tsî skarlaki tsîkha ǀkha anahe, tsî ǃhuniǀurib tsî anusa ǀuidi tsî karan tsîn ǀkha ge anihe hâ i, tsîs ge ǁîs di ǃomǁae ǃhuniǀuri ǀgabi-i, ǁgaidīgu tsî ǃanuoǃnâsigu tsî ǀaib âs tsîn xa ǀoa hâ-e ge ūhâ i;

⁵tsî ǁîs di ǃūs ai i ge ǀon-e ge xoamâihe hâ i: ǂGanǃgâsib; Babilons kais, ǀaigu tsî ǃhūbaib ǁgaidīgu di îs ti.

⁶Tsî ta ge ge mû, taras ǃanun di ǀaob tsî Jesub ǃkhō-amaon di ǀaob xa ǀhoro hâsa; tsî mû si ta geo, o ta ge kaise ge buru.

⁷Ob ge ǀhomǃgāba tita ǃoa ge mî: Tare xū-i ǃaromats ra buru? Tita ge nî mîba tsi ǂganǃgâsib taras dib, tsî ǁîsa ra tani ǀgurub, hû danadi tsî disi ǁnâga ūhâb diba.

⁸ǀGurub mûts gob ge hâ ge ib tsî hâ tamaba; tsîb ge abisuǂgâba xu ǀkhī tsî nî kāǁō; tsîn ge ǃhūbaib ai ǁan hâna nîra buru, ǁîn di ǀondi ǃhūbaib di ǃgaoǃgaosa xu ûib di ǂkhanis ǃnâ xoaǂgāhe tamana, ǁnā ǀgurub, hâ ge ib tsî hâ tamaba tsî nîra hâban ga mûo.

⁹Nēpab ge ǁnâuǃāba hâ, gā-aisi-e ūhâba: ǁNā hû danagu ge hû ǃhomga, ǁîgu ais tarasa ǂnôaga;

¹⁰tsî gu ge ǁkhāti a hû gao-ao; korogu ge ge ǁnā, tsî ǀguib ge hâ, tsî naub ge gorose hā tama hâ, tsî hāb kao, ob ge ǂkhari ǁaerob ǀguiba nîra hâ.

¹¹Tsî ǀgurub, hâ ge ib tsî hâ tamab, ǁîb ge a ǁkhaisaǁî gao-ao, tsîb ge a hûgu di, tsîb ge kāǁōsib ǃoa ra ǃgû.

¹²Tsî disi ǁnâgu, mûts ge gu ge disi gao-aogu, gaosiba gorose ǃkhōǃoa tamas, xawe gao-aose ǀgurub ǀkha ǀgui iri ǁaeba ǀgaiba ge hōga.

¹³Nēgu ge ǀgui ǂâisa ūhâ, tsî gu nîra ǁîgu di ǁkhāsib tsî ǀgaib tsîkha ǀguruba mā;

¹⁴nēgu ge ǁKhaob ǃoagu nîra ǃkham, ob ge ǁKhaoba nîra dan gu (ǃkhūgu di ǃKhūb tsî gao-aogu di Gao-aob a xui-ao), tsî ǁîb ǀkha hân ge ǂgaihesan tsî ǃkhōǂuibasensan tsî ǂgomsan tsîna.

¹⁵Tsîb ge tita ǃoa ge mî: ǁGamgu, mûts go gu, ǁîgu ais ǀai-aosa ǂnôagu ge ǁaedi tsî ǂnubidi tsî ǃhaodi tsî gowagu tsîna.

¹⁶Tsî disi ǁnâgu, ǁîgats go ǀgurub ai mûgu ge ǀai-aosa ǁkhan tsî nîra ǀguriǃgâ kai tsî ǀōǀkhā kai si; tsî gu ge ǁîs di ǁgansa ǂû tsî ǁîsa ǀaes ǀkha nîra khauǃkhū.

¹⁷Elob ge ǁîgu di ǂgaogu ǃnâ mā xui-ao, ǁîb di ǂâisa gu nî dīsa, tsî ǀgui ǂâis ǀguisa gu nî dīsa, tsî ǁîgu di gaosisa gu nî ǀguruba māsa; Elob di mîdi nî dītoahes kōse.

¹⁸Tsî taras, mûts gos ge kai ǃās, ǃhūbaib di gao-aogu ǂama ra gaosîsensa.