Read Khoekhoegowab ǂHaiǂhais 18 Bible Online

ǂHaiǂhais 18 - Khoekhoegowab bible

ǂHaiǂhais 18

¹Tsî nēn khaoǃgâ ta ge ge mû, ǀnî ǀhomǃgāb, kai ǀgaiba ūhâb ra ǀhomma xu ǁgôaxasa; tsî ǃhūbaib ge ǂkhaisib âb ǀkha ge ǃnâǃnâhe.

²Tsîb ge ǃgari dommi ǀkha ǀgaisase ǂgai, tsî ge mî: ǁNās go, Babilons kaisa, tsîs ge go ǁgâuagu di ǁanǃkhai kai tsî ǃanuoǃnâ gagagu hoagu di sâuǃkhai kai, tsî ǃanuoǃnâ tsî ǁgaisi anin hoan di sâuǃkhai kai;

³ǁîs di ǁaib di ǂauxûib ǀaib diba xu di ge ǁaedi hoade ā, tsî ǃhūbaib di gao-aogu ge ǁîs ǀkha ǀaigu, tsî ǃhūbaib di ǁamagu-aon ge ǁîs ûi-aib di ǁkhāsiba xu ǃkhū amaga.

⁴Tsî ta ge ǀhomma xu ǀnî dom-e ge ǁnâu, nēti ra mî-e: ǁÎsa xu ǂoa, ti ǁaese, î du ǁîs di ǁoren ǃnâ tā amǃnâxa, ǁîs di tsûtsû-aidi xa du hō tidega.

⁵ǁÎs di ǁoren ge ǀhommi kōse sī amagab ge Eloba ǁîs di ǂkhabasigu xa ge ǂâi.

⁶Dīdawa-am si, sados ge ǁkhāti dīdawa-ams ǁkhās khami, î du ǁîsa ǀgamǃnâguse dīdawa-am ǁîs di sîsengu ǃoa; ǀgabis sados gere ǂnâbas ǃnâ ǀgamǃnâguse ǂnâba si.

⁷Aitsamas ge ǂkhaiǂkhaisen tsî ǃgâiǃgâisens kōse, ǁnātikōse ǁîsa tsûtsû î ǃoaǃoa; ǁîs di ǂgaob ǃnâs ra mî xuige: Gao-aose ta ǂnôa, tsî ta ǃoatara tama, tsî ta ge tātsē ǃoa-e mû tide.

⁸ǁNā-amaga di ge ǁîs di tsûtsû-aide ǀgui tsēs ai nîra hā: ǁŌb tsî ǃoab tsî ǃâtsūǀkhāb tsîna, os ge ǀaes ǀkha nîra khauǃkhūhe; ǀgaisab a ǃKhūb Elob, ǁîsa nî ǀgoraǃgâba xui-ao.

⁹Tsî gu ge ǃhūbaib di gao-aoga ǁîsa nîra āba tsî ǁîs ǂama nîra ǃoa, ǁîs ǀkha ǀaigu tsî ge ǃgâiǃgâisenga, ǁîs khauǃkhūhes di ǀanna gu ga mû ǃnubai;

¹⁰tsî gu ge ǁîs tsûtsûhes di ǃaob xa ǃnūseba xu mâ, tsî nîra mî: Tsūba ǁnā kai ǃās Babilons, ǀgaisa ǃāsa, ǀgui iri ǃnâs go ǀgoraǃgâhes âsa hā xui-ao.

¹¹Tsî ǁamagu-aogu ǃhūbaib digu ge ǁîs ǂama ā, tsî nîra ǃoaba dī, ǁîgu di ǁamaxūxūna i ǃaruǀî khoe-i xare-e ǁama tama ǃkhais ǃaroma,

¹²ǁamaxūxūn ǃhuniǀurib tsî ǀhaiǀurib xa, tsî îsa ǀuidi xa, tsî karan xa, tsî ǁga ǃuri ǃkhaib xa, tsî purpuri xa, tsî sai-i xa, tsî skarlaki xa, tsî ǃgâiham haiǃnôa-i hoa-i xa, tsî ǂkhoaǁgûn ǀkha dīhe hâ xūn hoan xa, tsî ǃgomǀgausa hai-i tsî ǂai-i tsî ǂnūǀuri-i tsî marmorǀui-i ǀkha dīhe hâ soan xa;

¹³tsî kaneli xa, tsî ǃgâihamxūn xa, tsî ǃgâiham ǂkhauxūn xa, tsî wiroki xa, tsî ǂauxûib xa, tsî olib xa, tsî tsampereb xa, tsî ǃhorob xa, tsî goman xa, tsî gūn xa, tsî hān xa, tsî kunidi xa, tsî khobon xa, tsî khoen ǀomdi tsîn xa.

¹⁴Tsî sa ǀoms ra tura ǂûn ge sasa xu ge bē; tsî ǃgâin tsî ǂkhaisan hoan ge sasa xu ge bē, tsîs ge ǁîna ǃaruǀî tātsē ǁkhawa hō tide.

¹⁵ǁAmaxū-aon nē xūn din, ǁîsa xu ge ǃkhūn ge ǁîs tsâb di ǃaob xa ǃnūseba xu mâ tsî ā tsî ǃoaba dī,

¹⁶tsî nîra mî: Tsūba, tsūba ǁnā kai ǃās, ǁga ǃuri ǃkhaib tsî purpuri tsî skarlaki ǀkha anahe hâ ge is, tsî ǃhuniǀurib tsî îsa ǀuidi tsî karan tsîn ǀkha ge anihe hâ isa; ǀgui iri ǃnâb go nēti ī ǃkhūsiba kā xui-ao.

¹⁷Tsî doe-ommi di ǃnari-aogu hoagu tsî doe-omgu ǃnâ garun hoan tsî doe-omgu sîsenaogu tsî hurib ai ra ǁamagusa dīn hoan ge ǃnūseba xu mâ,

¹⁸tsî ge ǂgai, ǁîs khauǃkhūhes di ǀannan ge mûo, tsî ge mî: Mâ ǃāsa nē kai ǃās khami ī?

¹⁹Tsîn ge tsaraba ǁîn di danadi ai tsoro, tsî ā tsî ǃoaba ra dīse ǂgai, tsî ge mî: Tsūba, tsūba ǁnā kai ǃās, ǁîs ǃnân ge doe-omga hurib ai ūhân hoana ǃkhūsa ǁîs di ǂoaǂamsa ǁuiga xu; ǀgui iri ais go ǀkhaiǃnâ kaihe xui-ao.

²⁰ǃGâiaǂgao ǁîs ǂama, ǀhomtse, tsî sago ǃanu apostel go tsî kēbo-aogo tsîgo; Elob go sago ǀgoraǃgâsa ǁîs ai ǀgoraǃgâ xuige.

²¹Tsî ǀgui ǀgaisa ǀhomǃgāb ge kai ǁkhamiǀuis xase ī ǀuisa ūkhâi, tsî hurib ǃnâ aoǂgā si, tsî ge mî: Nētis ge kai ǃās Babilonsa ǀgaib ǀkha nîra aoǁguihe, tsî ǃaruǀî hōhe tide;

²²tsî siterǀkhō-aon tsî ǁnae-aon tsî ǂnuni ran tsî xâi ran di dommi ge ǃaruǀî ǁîs ǃnâ tātsē ǁnâuhe tide; tsî ǁāǁāǁkhāsabe-i mâ ǁāǁāǁkhāsabes hoas di-i ge ǃaruǀî sas ǃnâ tātsē hōhe tide, tsî ǁkhamis di ǀōb ge ǃaruǀî sas ǃnâ tātsē ǁnâuhe tide.

²³Tsî kandelari di ǃamamǀaes ge ǃaruǀî sas ǃnâ tātsē ǃnâ tide; tsî ǃgame-aob tsî ǃgame-aos di dommi ge ǃaruǀî sas ǃnâ tātsē ǁnâuhe tide; sa ǁamagu-aogu ge ǃhūbaib di kaiga ge i xui-ao; sa ǃgaidīsa xus ge ǃhaodi hoadi ge ǂgaeǂhapuhesa xui-ao.

²⁴Tsî ǁîs ǃnâb ge ǀaob kēbo-aogu tsî ǃanun tsîn diba ge hōhe, tsî ǃhūbaib ai ge ǃgamhen hoan diba.