Read Khoekhoegowab ǂHaiǂhais 19 Bible Online

ǂHaiǂhais 19 - Khoekhoegowab bible

ǂHaiǂhais 19

¹Tsî nēn khaoǃgâ ta ge ǀhommi ǃnâ kaise kai ǂguib di domma ge ǁnâu, nēti ra mîba: Haleluja! ǃGâiǃōsib tsî ǂkhaisib tsî ǃgôasib tsî ǀgaib tsîna an ǃKhūb sada Elob di!

²ǁÎb di ǀgoraǃgâdi ge a ama tsî ǂhanu-ai, kai ǀai-aos, ǁîs di ǀaib ǀkha ǃhūbaiba ge ǁgaoǁgaosab go ǀgoraǃgâ, tsî ǁîs di ǃomma xub go ǃgāgu âb di ǀaoba ǀkhao xui-ao.

³Tsîn ge ǀgamǁî ǃnās ai ge mî: Haleluja! Ob ge ǀanni âsa ǀamosib hoab kōse ra ǃapa.

⁴Tsî ǀgamdisihakaǀa ǂnomdomgu tsî haka ûitsamagu tsîgu ge ǁnāǁgoe, tsî Elob, trons ai ǂnôaba ǀgoreǀî, tsî ge mî: Amen! Haleluja!

⁵Tsî i ge tronsa xu dom-e ge ǀkhī, nēti ra mî-e: Koa sida Eloba, sago ǁîb di ǃgāgo hoago tsî sadu, ǁîba ra ǃaoǃgâdu hoado, ǂkharidu tsî kaidu tsîdo!

⁶Tsî ta ge dom-e ge ǁnâu kai ǂnubis tsî ǂgui ǁgamgu tsî ǀgaisa ǃgurub di-i axase ī-i, nēti ra mî-e: Haleluja! ǃKhūb Elob Hoaǀgaixab ra gaosîsen xuige.

⁷A da ǃgâiaǂgao tsî dâ, î da ǁîba ǂkhaisiba mā; ǁKhaob di ǃgameǁâus go hā, tsî taras âb go ǂhomisen xuige.

⁸Tsîs ge ge māhe ǃanu tsî ǂkhaisa ǁga ǃuri ǃkhaigu ǀkha anasensa. Tsî nē ǁga ǃuri ǃkhaigu ge ǃanun di ǂhanu-ain dīga.

⁹Tsîb ge ǀhomǃgāba tita ǃoa ge mî: Xoa re! ǃGâiǃōn ge hâ ǁnān, ǁKhaob di ǃgameǁâus ǃoa ǁkhauhe hâna. Tsîb ge tita ǃoa ge mî: Nēdi ge Elob di ama mîde.

¹⁰O ta ge ǁîb di ǂaira aiǃâ ge ǁnāǁgoe, ǀgoreǀî bi ta nîse. Ob ge tita ǃoa ge mî: Tā dī, sa ǀhaoǃgān tsî sa ǃgâsan, Jesub di ǃkhō-amsa ūhân di ǀhaoǃgā ta komo; Eloba ǀgoreǀî re; Jesub di ǃkhō-ams a kēbosis di gaga xuige.

¹¹Tsî ta ge ǀhomma ǁkhowa-amsen hâse ge mû; tsî kō, ǃuri hāb, tsî ǁîb ai ǂnôab ge ǂGomǂgomsab tsî Amab ti ra ǂgaihe, tsîb ge ǂhanu-aisib ǃnâ ra ǀgoraǃgâ tsî torodī.

¹²Tsî mûra âb ge ǀaeǁhabu-i xase ge ī, tsî ǁîb di danas ai di ge ǂgui kronde ge hâ i, tsîb ge xoamâisa ǀon-e ge ūhâ i, ǁîb ǀguib a ǂan tsî ǀnî khoe-i ǂan tama-e.

¹³Tsîb ge ǀaob ǀkha ǀgapi-aihe hâ saraba ge ana hâ i, tsî ǀons âb ge “Elob Mîs” ti ra ǂgaihe.

¹⁴Tsî ǀhommi ǃnâ hân di ǂnubidi ge ǁîba ǃuri hān ai ge sao, ǂkhaisa tsî ǃanu ǁga ǃuri ǃkhaiga ana hâse.

¹⁵Tsî ǁîb di amsa xub ge ǀā gôaba ge ǀkhī, ǁîb ǀkhab nî ǃhaode ǂnause; ob ge ǁîna ǂnūǀuri gaohais ǀkha nîra ǂgaeǂgui; tsîb ge ǀāǃnâǃores kaise kai ǁaib ǂauxûib Hoaǀgaixa Elob dib disa ra dāǃnâ;

¹⁶tsîb ge sarab âb ai tsî kamanab âb ai xoamâisa ǀon-e ūhâ: Gao-aogu di Gao-aob, tsî ǃkhūgu di ǃKhūb ti.

¹⁷Tsî ta ge ge mû, ǀgui ǀhomǃgāb sores ǃnâ mâsa; tsîb ge kai dommi ǀkha ǂgai, tsî ǀhommi ǁaegub ǃnâ ra ǁkhana anin hoan ǃoa ge mî: Nēxopa ǀkhī, î du Elob di kai ǂûǀhaos ǃoa ǀhû,

¹⁸ǂû du nîga gao-aogu di ǁgans, tsî ǂamkhoegu di ǁgans, tsî ǃgari-aogu di ǁgans, tsî hān di ǁgans, tsî ǁîn ai ǂnôan dis, tsî ǃnorasan tsî ǃgān hoan di ǁgans, tsî ǂkharin tsî kain tsîn disa.

¹⁹Tsî ta ge ǀgurub tsî ǃhūbaib di gao-aogu tsî ǁîgu di toroǂnubidi tsîna ǀhû hâse ge mû, toroban nî dīse ǁnāb, hāb ai ǂnôab tsî ǁîb di toroǂnubis ǃoagu.

²⁰Ob ge ǀguruba ge ǃkhōhe tsî ǂkhaba kēbo-aob ǁîb ǀkha, ǁîb mûǁae gere saode dība, ǁîdi ǀkhab ge ǀgurub di saosa ge ǃkhōǃoan tsî īb âba ge ǀgoreǀîna ǂgaeǂhapude; o kha ge ǁî ǀgamkha ûitsamase ǀaes hurib, sulfuri ǀkha ra khaub ǃnâ ge aoǂgāhe;

²¹tsî naun ge ge ǃgamhe ǁnāb, hāb ai ǂnôab di gôab, ams âba xu ra ǂoaxab ǀkha; tsî anin hoan ge ǁîn di ǁgans xa ge ǁâ.