Read Khoekhoegowab ǂHaiǂhais 2 Bible Online

ǂHaiǂhais 2 - Khoekhoegowab bible

ǂHaiǂhais 2

¹ǀHomǃgāb Efeseǁî ǀhaohâb diba xoaba: Nēnab ra ǁnāba mî, hû ǀgamirode ǁîb di amǀkhāb ǃommi ǃnâ ǃkhō hâb, hû ǃhuniǀuri kandelargu ǁaegu ra ǃgûmaba:

²Sa sîsenga ta ge a ǂan, tsî sa ǀhupuba, tsî sa taniǀnamxasiba, tsî ǂkhabanats tani ǁoasa, tsî apostelse ra dīsen xawe ǁnāti ī tamagats ge ǃâitsâ tsî ǂhumi-aose hō ǃkhaisa,

³tsîts ge tani, tsîts ge taniǀnamxasiba ūhâ, tsîts ge ti ǀons ǃaroma ge sîsen, tsîts ge tsau tama.

⁴Xawe ta ge sats ǃoagu ūhâ, sa ǂguro ǀnammats ge ǁnāxū ǃkhaisa.

⁵ǂÂiǂâisen ǁnâi re, mapa xuts ge ǁnāǂoasa, î ǃhobasen, î ǂguro sîsenga dī; tsî dī tamats ka io, o ta nî ǃhaese hāǂam tsi, tsî nî kandelari âtsa ǁîb di mâǃkhaisa xu ūbē, ǃhobasen tamats ka io.

⁶Xawe nēsats ge ūhâ, Nikolaiǁîn di sîsengats ra ǁkhansa, tita ǁkhāti ra ǁkhanga.

⁷ǂGaera ūhâ-e a-i ǁnâu, Gagab ra ǀhaohâgu ǃoa mî-e. Dan ra-i ǁî-e ta nîra ǂûmā ûib di hais, paradais Elob dis ǁaegu hâs xa.

⁸Î Smirnas di ǀhaohâb di ǀhomǃgāba xoaba: Nēnab ra mî ǂGurob tsî Toatsoab, ǁō ge hâ ib tsî ǁkhawa ge ûiba:

⁹Sa ǂōǂōsiba ta ge a ǂan, tsî sa ǁgâiǀāb, tsî sa ǀgâsib (xawets ǃkhū hâ), tsî ǃkhāǃkhās ǁnān, ǁî-aitsama Jodeǁîse ra ǂgaisen xawe ǁnāti ī taman tsî Satanni di sinagogese īn disa.

¹⁰Xū-i xare-i, tsâts nîran di-e tā ǃao! Mû, ǁgâuab ge ǀnîn âdo ǃkhō-oms ǃnâ nîra aoǂgā, ǃâitsâhe du nîga, o du ge ǁgâiǀāba nîra ūhâ disi tsēdi kōse. ǂGomǂgomsase hâ re ǁōb kōse, o ta ge ûib di kronsa nîra mā tsi.

¹¹ǂGaera ūhâ-e a-i ǁnâu, Gagab ra ǀhaohâgu ǃoa mî-e. Dan ra-is ge ǀgamǁî ǁōb xa tātsē ǂkhôaǂkhôahe tide.

¹²Î Pergamums ǃnâ hâ ǀhaohâb di ǀhomǃgāba xoaba: Nēnab ra mî ǁnāb, hoaǃnamǀā gôaba ūhâba.

¹³ǂAn ta ge a, mapats ǁan hâsa, Satanni di trons hâ ǃkhais ai; tsîts ra ti ǀonsa ǃkhōǀgaipebasen, tsîts ge ti ǂgomsa ǀoa tama hâ, ǁnā tsēdi ais tsîna, ǁîdi ǃnâb ge Antipab ti ǂgomǂgomsa ǀhûǀguitimî-ao ge iba, sadu tawa, ǁGâuab ǁan hâpa ǃgamhedi ai.

¹⁴Xawe ta ge ǀnî ǂkharirona sats ǃoagu ūhâ, ǁnāpats Bileammi di ǁkhāǁkhā-aisa ǃkhōbasen hâna ūhâsa, Balaka gere ǁkhāǁkhāba, ǁgonǁgonǂgao-eb nî Israeli ôana ǁgui-aiǃâsa, ǁgôatsuiǁgoaǁguibade ǂû tsîn nî ǀaise;

¹⁵tsîts ge ǁkhāti ūhâ ǁnān, Nikolaiǁî ǁkhāǁkhā-aisa ǃkhōbasen hâna.

¹⁶ǃHobasen; tsî dī tamats ga io, o ta ge ǃhaese sats tawa hā tsî ǁîna nîra ǃkhamū ti ams di gôab ǀkha.

¹⁷ǂGaera ūhâ-e a-i ǁnâu, Gagab ra ǀhaohâgu ǃoa mî-e. Dan ra-i, ǁî-e ta nîra ǂûmā ǂganǃgâsase hâ manab xa, tsî ta nîra ǁî-e ǃuri ǀui-e mā, tsî ǀuis ai ǀasa ǀon-i xoahe hâ-i, ǀnî khoe-i xare-i ǂan tama-e, ǁî-e ra ǃkhōǃoa-i ǀgui-i.

¹⁸Î Tiatiras ǃnâ hâ ǀhaohâb di ǀhomǃgāba xoaba: Nēnab ra Elob Ôaba mî, ǀaes ǁhabu-i xase ī mûra ūhâb tsî ǂkhaira ǂai-i xase ī ǂaira ūhâba:

¹⁹Sa sîsenga ta ge a ǂan, tsî sa ǀnammi tsî ǃoabas tsî ǂgoms tsî taniǀnamxasib tsîna, tsî sa sîsengu di ǀunigagu ǂgurogu xa a ǂgui ǃkhaisa.

²⁰Xawe ta ge ǀnî ǂkharirona sats ǃoagu ūhâ: Taras Isebels, ǁî-aitsama kēbo-aose ra ǂgaisensats ra ǁkhāǁkhā kai tsî ti ǃgāga ǂgaeǂhapu kai ǃkhaisa, o gu ǀai tsî ǁgôatsuiǁgoaǁguibasa ra ǂû.

²¹Tsî ta ge ǁîsa ǁaeba ge mā, îs ga ǃhobasen ti, xawes ge ǃhobasen ǂgao tama ǀaib âsa xu.

²²Mû, tita ge ǁîsa ǀaekharob ai nî ǁgui tsî ǁîs ǀkha gere ǀaigun tsîna kai ǁgâiǀāb ǃnâ, ǃhobasen taman ga io ǁîn di sîsenga xu;

²³tsî ǁîs di ôana ta ge nîra ǃgam, o gu ge ǀhaohâgu hoaga nî ǂan, tita ǃnaidi tsî ǂgaogu tsîna ra ôaǃnâsa; tsî ta ge sado mâ-i hoa-e ǁî-i di sîsengu ǃoa nî mā.

²⁴O ta sadu tsî naun, Tiatiras ǃnâ hân, nē ǁkhāǁkhāsa ūhâ taman, tsî Satanni di ǃgamsiga mûǂan tama hân tsîdo ra mîba, ǁîn ra mî khami: ǀNî ǃgom-e ta sadu ai ǁgui tide;

²⁵xawe ū du hâ-e ǃkhōǀgaipebasen re, sī ta nîs kōse.

²⁶Tsî dan ra-i tsî ti sîsenga ǀunis kōse ra ǃkhōǀgaipebasen-i, ǁî-e ta ge nî ǀgaiba mā ǀūben ǂama;

²⁷o i ge ǁîna ǂnūǀuri haib ǀkha nîra ǃûi, on ge sūǂnubi-aob di soadi ra ǂkhūǂkhūhe khami nîra ǂkhūǂkhūhe, tita on ge ti Îba xu hō xase;

²⁸tsî ta ge ǁî-e ǁgoaǀgamirosa nîra mā.

²⁹ǂGaera ūhâ-e a-i ǁnâu, Gagab ra ǀhaohâgu ǃoa mî-e.