Read Khoekhoegowab ǂHaiǂhais 21 Bible Online

ǂHaiǂhais 21 - Khoekhoegowab bible

ǂHaiǂhais 21

¹Tsî ta ge ǀasa ǀhom-i tsî ǀasa ǃhūbai-i tsîna ge mû. ǂGuro ǀhommi tsî ǂguro ǃhūbaib tsîkha go ǃgû-ī, tsî hurib ge ǃaruǀî ǀkhai i xui-ao.

²O ta ge tita Johaneta ǃanu ǃās ǀasa Jerusalemsa, Eloba xus ra ǀhomma xu ǁgôaxase ge mû, ǃgame-aos, aob âsa anibahe hâs axase.

³Tsî ta ge ǀhomma xu kai dom-e ge ǁnâu, nēti ra mî-e: Mû, tabernakeli Elob dib ge khoen tawa hâ, ob ge ǁîn ǁaegu nî ǁan, on ge nî ǁîb di ǁae, ob ge Elob ǂûba ǁîn ǀkha nî hâ;

⁴ob ge Eloba mûdi âna xu ǁgamron hoana nî ǀombē; ob ge ǁōba ǃaruǀî hâ tide, tsî ǃoa-i xare-i tsî ā-i xare-i tsî ǃgomsi-i xare-i ǃaruǀî hâ tide; ǂguron go ǃgôa-ī xui-ao.

⁵Tsî trons ai ǂnôab ge ge mî: Mû, hoana ta ra ǀasa kai. Ob ge tita ǃoa ge mî: Xoa re, nē mîdi a ama tsî ǂgomǂgomsa xuige.

⁶Tsîb ge tita ǃoa ge mî: Dītoahe go. Tita ge Alfata tsî Omegata, Tsoatsoata tsî ǀUnita. Tita ge ǁgâ hâ-e ûib ǁgam-i di ǀausa xu nîra mā, xū-i ama tama.

⁷Dan ra-i ge hoana nîra ǀumi; tsî ta ge nî tita ǁî-i di Elo, tsî ǁî-i ge tita ǀgôase nî ība.

⁸Xawe ǃaoǃnân tsî ǂgomoǃnân tsî ǁgaidī ran tsî ǃgamaon tsî ǀai-aon tsî ǃgaidī-aon tsî ǁgôatsuiǁgoaga ra ǃoaban tsî ǂhumi-aon tsîn hoan di amǃnâs ge hurib, ǀaes tsî sulfuri tsîra ǀkha ra khaub ǃnâ hâ; ǁnāb ge a ǀgamǁî ǁō.

⁹Tsîb ge hû ǀhomǃgāgu di ǀguib, ǀuni tsûtsû-aidi xa ge ǀoa hâ i ǃorede ūhâgu diba tita tawa hā, tsî tita ǀkha ǃhoa, tsî ge mî: Hā, î ta ǃgame-aos, ǁKhaob di tarasa ǁgau tsi.

¹⁰Ob ge Gagas ǃnâ kai tsî ǀgapi ǃhommi ai ge ūsī te, tsî kai ǃās, ǃanu Jerusalemsa Eloba xus ra ǁgôaxase ge ǁgau te;

¹¹tsîs ge Elob di ǂkhaisiba ge ūhâ i; tsî ǃnâb âs ge hoan xa ǂoaǂamsa ǀuis khami ge ī i; jaspiǀuis kristals khami ra ǂkhaisa.

¹²Tsîs ge kai tsî ǀgapi ǂnubiǂgoaba ge ūhâ i, tsîs ge disiǀgamǀa ǁāga ge ūhâ i, tsî disiǀgamǀa ǁāgu ai disiǀgamǀa ǀhomǃgāga, tsî ǁîgu ai xoahe hâ ǀondi, ǁîdi ge disiǀgamǀa ǃhaodi Israeli ôan didi di ǀonde.

¹³Aiǂoas ǀkhāba xu gu ge ǃnona ǁāga ge hâ i, ǀapas ǀkhāba xu ǃnona ǁāga, ǃkhawagas ǀkhāba xu ǃnona ǁāga tsî huriǂoas ǀkhāba xu ǃnona ǁāga.

¹⁴Tsî ǂnubiǂgoab ǃās dib ge disiǀgamǀa ǃgaoǃgaoga ge ūhâ i, tsî ǁîgu ǃnâ disiǀgamǀa apostelgu ǁKhaob digu di ǀonde.

¹⁵Tsî tita ǀkha ra ǃhoab ge ǃhuniǀuri ǀguirohaiba ge ūhâ i, ǃās tsî ǁîs di ǁāgu tsî ǁîs di ǂnubiǂgoabab nî ǀnōse.

¹⁶Tsî ǃās ge hakaǁhôaxase ge ǁgoe i, tsî gaxusib âs ge ǂhapab âs ǁkhās xase ge ī i. Ob ge ǃāsa ǀnō-ūhaib ǀkha ge ǀnō disiǀgamǀaǀoadisi kilometergu kōse; gaxusib tsî ǂhapab tsî ǀgapib ǃās dib ge ǀguiti ge kō i.

¹⁷ǁÎb ge ǂnubiǂgoab âsa ge ǀnō ǀguikaidisihakadisihakaǀa ǂhâgu kōse, khoe-i di ǀguiros, ǀhomǃgāb di ge is ǃoa.

¹⁸Tsî ǂnubiǂgoab ge jaspiǀuis ǀkha ge kuruhe hâ i; tsî ǃās ge ǃūmû ǃhuniǀuri ge i, ǃūmû xla-i axase ī-e.

¹⁹Tsî ǃgaoǃgaodi ǃās ǂnubiǂgoab didi ge mâ ǀgapiǃgôasa ǀui-i hoa-i ǀkha ge anihe hâ i: ǂGuro ǃgaoǃgaos ge jaspi ge i, ǀgamǁîs ge safir ge i, ǃnonaǁîs ge xalsedon ge i, hakaǁîs ge smarag ge i,

²⁰koroǁîs ge sardoniks ge i, ǃnaniǁîs ge sardiu ge i, hûǁîs ge xrisolit ge i, ǁkhaisaǁîs ge beril ge i, khoeseǁîs ge topas ge i, disiǁîs ge xrisopra ge i, disiǀguiǀaǁîs ge hiasint ge i tsî disiǀgamǀaǁîs ge ametis ge i.

²¹Tsî disiǀgamǀa dao-amdi ge disiǀgamǀa kara ge i; mâ dao-ams hoas ge ǀgui kara ge i; tsî ǃās di daogu ge ǃūmû ǃhuniǀuri ge i, mûǃganuhesa xla-i ase ī-e.

²²Tsî ta ge ǁîs ǃnâ tempel-e mû tama ge i; ǃKhūb Elob Hoaǀgaixab a ǁîs di tempel, tsî ǁKhaob tsîna xui-ao.

²³Tsî ǃās ge sores tsî ǁkhâb tsîra ǂhâba tama ge hâ i ǁîs ǃnâ ra nî ǃnâse; ǂkhaisib Elob dib ǁîsa gere ǃnâǃnâ, tsî ǁKhaob ge ǁîsa ǃamamǀaese hâba i xui-ao.

²⁴Tsî ǃhaodi, ǃgâiǃō nîdi ge ǃnâb âs ǃnâ nîra ǃgû; tsî ǃhūbaib di gao-aogu ge ǂkhaisigu âga ǁîs ǃnâ nîra ūhā.

²⁵Tsî ǁîs di dao-amdi ge tsēa ǂganamhe tide, (tsuxu-i ǁnāpa hâ tide xui-ao.)

²⁶Tsîn ge ǃhaodi di ǂkhaisib tsî ǃgôasib tsîkha ǁîs ǃnâ nîra ūhā.

²⁷Tsî ǁîs ǃnâ i ge tātsē ǂgâ tide ǃanuoǃnâ kai ra xū-i xare-is tsî ǁgaidī ran tsî ǂhumi ran tsîna; xawe ǁnān, ǁKhaob di ûib ǂkhanis ǃnâ xoahe hân ǀguin ge nîra ǂgâ.