Read Khoekhoegowab ǂHaiǂhais 22 Bible Online

ǂHaiǂhais 22 - Khoekhoegowab bible

ǂHaiǂhais 22

¹Tsîb ge ǃanu ǃāb, ûib ǁgammi dib, kristal-i ase ge ǃgāsa iba ge ǁgau te, Elob tsî ǁKhaob tsîkha di tronsa xu ra dâuǂoaba.

²ǁÎs di daob ǁaegu tsî ǃāb di ǃnamkha hoakha ais ge ûib di haisa ge mâ i, disiǀgamǀa ǃnāde ǂûǃnôana ra tanis, ǁkhâkorobe ǁîs di ǂûna ra māsa; tsî hais di ǂnaren ge ǀūbeǁaedi di ǂgauǂgauhes ǃoa hâ.

³Tsî ǀâxarexūsa-i xare-i ge ǃaruǀî hâ tide; tsî Elob tsî ǁKhaob tsîkha di trons ge ǁîs ǃnâ nîra hâ; tsî ǁîb di ǃgāgu ge ǁîba nîra ǃoaba,

⁴tsî gu ge ais âba nîra mû; tsî ǀons âb ge ǁîgu di ǃūdi ai nîra hâ.

⁵Tsî ǁnāpa i ge tsuxu-e hâ tide, tsîn ge ǃamamǀae-i tsî sores di ǃnâba ǂhâba tide, ǃKhūb Elob ra ǁîna ǃnâǃnâ xui-ao; tsîn ge ǀamosib hoab kōse nîra gaosîsen.

⁶Tsîb ge tita ǃoa ge mî: Nē mîdi ge a ǂgomǂgomsa tsî ama; tsî ǃKhūb Elob ǃanu kēbo-aogu dib ge ǀhomǃgāb âba go sî, ǁîb di ǃgāgab ǃhaese nîra īna nî ǁgause.

⁷Mû, ǃhaese ta ra sī. ǃGâiǃō i ge a ǁnā-i, nē ǂkhanis di kēbomîde ra ǃkhōǀgaipe-e.

⁸Tsî tita Johaneta ge nēna mû tsî ge ǁnâu ta; tsî ǁnâu tsî ta ge mûo, o ta ge nēna ge ǁgau te ǀhomǃgāb di ǂaira aiǃâ ge ǁnāǁgoe, ǀgoreǀî bi ta nîse.

⁹Ob ge tita ǃoa ge mî: Tā dī; sa ǀhaoǃgāta tsî sa ǃgâsagu tsî kēbo-aogu tsî nē ǂkhanis di mîde ra ǃkhōǀgaipen di ta kom titao. Eloba ǀgoreǀî re!

¹⁰Ob ge tita ǃoa ge mî: Nē ǂkhanis di kēbomîde tā ǂganam; ǁaeb a ǀgū xuige.

¹¹ǂKhabadī ra-e a-i ǃaruǀîǀgui ǂkhabadī, tsî ǀurisa-e a-i ǃaruǀîǀgui ǀurisa, tsî ǂhanu-ai-e a-i ǃaruǀîǀgui ǂhanu-ai, tsî ǃanu-e a-i ǃaruǀîǀgui ǃanu.

¹²Tsî mû, ǃhaese ta ra sī; tsî ti amǃnâs ge tita ǀkha hâ, mâ-i hoa-e ta nî ǁî-i di sîsenni īs ǃoa māse.

¹³Tita ge Alfata tsî Omegata, Tsoatsoata tsî ǀAmta, ǂGurota tsî ǀUnita.

¹⁴ǃGâiǃōn ge a ǁîb mîmāde ra dīna, în ga ǂhanuba ūhâ ûib di hais ai, în ga ǃās di ǁāgu ǃnâ ǂgâ ti.

¹⁵Xawe ǃaugan ge nîra hâ: Arin, ǃgaidī-aon, ǀai-aon, ǃgamaon, ǁgôatsuiǁgoaga ra ǃoaban tsî ǂhumiba ǀnam tsî ra dīn hoana.

¹⁶Tita Jesuta ge ti ǀhomǃgāba go sî, nēnab nî sado ǃkhō-ambase ǀhaohâgu ǃnâ. Tita ge Davib di ǃnomata tsî ǁîb ǃhaos dita, ǂkhai ra ǁgoaǀgamirota.

¹⁷Tsî Gagab tsî ǃgame-aos tsîra ra mî: Hā re! Tsî ǁnâu ra-e a-i: Hā re, ti mî. Tsî ǁgâ hâ-e a-i hā, tsî ǂgao ra-e a-i ûib di ǁgam-e ū, xū-i ama tama.

¹⁸O ta ge nē ǂkhanis di kēbomîde ra ǁnâun hoana ra ǃkhō-amba: Khoe-i ga nē xūna xū-e dīǀaro, ob ge Eloba ǁî-e nē ǂkhanis ǃnâ xoahe hâ tsûtsû-aide nî ǀaroba.

¹⁹Tsî khoe-i ga nē ǂkhanis di kēbomîdi xa xū-e ūbēo, ob ge Eloba ǁî-i di amǃnâsa nîra ūbē ûib di ǂkhanisa xu, tsî ǃanu ǃāsa xu, tsî nē ǂkhanis ǃnâ xoahe hâna xu.

²⁰Nēna ra ǀhûǀguitimîb ge ra mî: Ā, ǃhaese ta ra sī. Amen. Ā, hā re, ǃKhū Jesutse!

²¹ǀKhommi sada ǃKhūb Jesub Xristub diba ab sadu hoadu ǀkha hâ! Amen.