Read Khoekhoegowab ǂHaiǂhais 3 Bible Online

ǂHaiǂhais 3 - Khoekhoegowab bible

ǂHaiǂhais 3

¹Î Sardis ǃnâ hâ ǀhaohâb di ǀhomǃgāba xoaba: Nēnab ra ǁnāba mî, hû Gagagu Elob digu tsî hû ǀgamirodi tsîna ūhâba: Sa sîsenga ta ge a ǂan, ûitsamats a tits ǀon hâ, xawets ǁō hâ ǃkhaisa.

²ǂKhai, î naun ǁōǁga rana ǀgaiǀgai, sa sîsenga ta ti Elob aiǃâ ǀoasase hō tama xuige.

³ǂÂiǂâisen ǁnâi re, matits ge ǃkhōǃoa tsî ǁnâusa, î sâubasen, î ǃhobasen re. ǂKhaikarits ga hâ tama io, o ta ge ǃnari-ao-i xase nîra hāǂam tsi, tsîts ge ǂan tide, mâ iri ai ta nî hāǂam tsisa.

⁴Tsîts ge Sardis ǃnâ gorose ǀoro ǀonde ūhâ, saran âde ǂnaoǂnao tamade; tsîn ge tita ǀkha ǃuri ǃkhain ǃnâ nîra ǃgû, anun hâ amaga.

⁵Dan ra-i, ǁî-i ge ǃuri saran ǀkha nîra anahe, tsî ta ge ǁî-i di ǀonsa tātsē ûib di ǂkhanisa xu ǀariǂui tide, tsî ta ge ǁî-i di ǀonsa nîra ǂan ti Îb tsî ǀhomǃgāgu âb tsîn aiǃâ.

⁶ǂGaera ūhâ-e a-i ǁnâu, Gagab ra ǀhaohâgu ǃoa mî-e.

⁷Î Filadelfias ǃnâ hâ ǀhaohâb di ǀhomǃgāba xoaba: Nēnab ra ǃanuba mî, amab, Davib di ǂganamūxūsa ūhâb, ǁîb ǁkhowa-am rab, tsî khoe-i xare-i ǂganam tama, ǁîb ǂganam rab tsî khoe-i xare-i ǁkhowa-am tama:

⁸Sa sîsenga ta ge a ǂan; mû, tita ge satsa ǁkhowa-amsaba tsi hâ ǁāba ge mā, tsî khoe-i xare-i ge ǁîba a ǂganam ǁoa; ǂkhari ǀgairo-ets ūhâ, xawets ge ti mîsa ǃkhōǀgaipebasen tsîts ti ǀonsa ǀūxū tama xui-ao.

⁹Mû, tita ge ǀnîn Satanni sinagogeb din, Jodeǁîn ti ra ǂgaisen xawe ti ī taman tsî ra ǂhumina nî mā; mû, dī ta nî, on ge hā tsî nî sa ǂaidi aiǃâ ǀgoreǀî, tsî nî mûǂan, ǀnam tsi ta ge hâ isa.

¹⁰Mîs ti taniǀnamxasib disats sâubasen hâ amaga ta ge sats ona nîra sâu ǁnā ǃâitsâs di iri, ǃhūbaib hoaragab ǂama nîra hāba xu, ǃhūbaib ai ǁan hân nî ǃâitsâhega.

¹¹Mû, ǃhaese ta nîra sī; ūts hâ-e ǃkhōǀgaipebasen, î-i khoe-i xare-e sa kronsa tā ū.

¹²Dan ra-i, ǁî-e ta ge ti Elob di tempeli ǃnâ ǂkhâǃnâhaise nîra dī, tsî i ge tātsē ǁkhawa ǂoa tide; tsî ta ge ǁî-i ai nîra xoa ti Elob di ǀons, tsî ti Elob ǃās di ǀons, ǀasa Jerusalems, ti Eloba xu nî ǀhomma xu ǁgôaxas dis, tsî ti ǀasa ǀons tsîna.

¹³ǂGaera ūhâ-e a-i ǁnâu, Gagab ra ǀhaohâgu ǃoa mî-e!

¹⁴Î Laodiseaǁî ǀhaohâb di ǀhomǃgāba xoaba: Nēnab ra Amenna mî, ǂgomǂgomsa tsî ama-ai ǀhûǀguitimî-aob, Elob kurus di tsoatsoaba:

¹⁵Sa sîsenga ta ge a ǂan, ǃkhai tsîts ǀgamsa tama hâ ǃkhaisa. Îts ga ǃkhai, tamas ka io ǀgamsa!

¹⁶Xawe ǂoposats a tsîts ǃkhai tama tsîts ǀgamsa tama amaga ta ge ti amsa xu nî ǀkhabuǂui tsi.

¹⁷Mîts ra xui-ao: ǃKhū ta hâ tsî xūxa ta a, o ta kom xū-i xare-e ǂhâba tamao; tsîts ge a ǀū, ǁkhoa tama tsî ǀkhomǀkhomsa tsî ǀgâsa tsî ǂgī tsî ǀōǀkhāts a ǃkhaisa.

¹⁸O ta ge ra ǀapemā tsi, tita tawats nî ǃhuniǀurib, ǀaes ǀkha ǃâitsâhe hâba ǁamabasensa, ǃkhūts nîga, tsî ǃuri sarana, anats nîga, îb taotaosib sa ǀōǀkhāsib diba tā ǂhai; îts sa mûde ǁnui-i ǀkha ǂkhau, mû ǁkhāts nîga.

¹⁹ǀNam ta ana ta ra ǂgōǀau tsî ǁkhara; ôasa ǁnâi î ǃhobasen re.

²⁰Mû, ǁāb aiǃâ mâ tsî ta ra ǃgubu-am; khoe-i ga ti domma ǁnâu tsî ǁāba ǁkhowa-amo, o ta ge ǁî-i ǃoa nî ǂgâ, tsî ta ge ǁî-i ǀkha ǃuiǂûsa nîra dī, tsî ǁî-e tita ǀkha.

²¹Dan ra-i, ǁî-e ta ge nîra mā, tita ǀkha i nî ti trons ai ǂnûsa, Tita ge ǁkhāti dan, tsî ti Îb ǀkha ǁîb di trons ai ǂnû khami.

²²ǂGaera ūhâ-e a-i ǁnâu, Gagab ra ǀhaohâgu ǃoa mî-e.