Read Khoekhoegowab ǂHaiǂhais 4 Bible Online

ǂHaiǂhais 4 - Khoekhoegowab bible

ǂHaiǂhais 4

¹Nēn khaoǃgâ ta ge ge kō, tsî mû, o i ge ǁā-e ǀhommi ǃnâ ge ǁkhowa-amhe; tsî ǂguro dommi, ǁnâu ta geb ge ǀgapadas dib xase ge ī i, tita ǀkha ǃhoa tsî ra mîba: ǃApahā, o ta ge nēn khaoǃgâ nî īna nîra ǁgau tsi.

²O ta ge ǁnātimîsi Gagas ǃnâ ge hâ i; tsî mû, trons ge ǀhommi ǃnâ ge mâ i, tsî ǀGuib ge trons ai ge ǂnôa i.

³Tsî ǁîs ai ge ǂnôa ib di īsib ge jaspis tsî sardius ǀuira dib xase ge ī i, tsî ǀapiǃhana-i ge trons ǂnamipe ge hâ i, īsib â-i ǃnâ smaragǀuis khami ge ī i-e.

⁴Tsî trons ǂnamipe di ge ǀgamdisihakaǀa tronde ge hâ i; tsî trondi ai ta ge ǀgamdisihakaǀa ǂnomdomga ge mûǂnôa, ǃuri sarana ana hâga, tsî gu ge ǃhuniǀuri kronde ǁîgu danadi ai ge ūhâ i.

⁵Tsî tronsa xu gu ge napagu tsî ǃgurugu tsî domgu tsîga gere ǂoa, tsî hû ǀaexa ǃam-amǀaegu ge trons aiǃâ ge khau, ǁîgu ge hû gagagu Elob diga.

⁶Tsî trons aiǃâ i ge xlahuri-i, kristali xase ī-e ge hâ i. Tsî trons ǁaegub ǃnâ tsî trons ǂnamipe gu ge haka ûitsamagu, aiǃâb ai tsî khaoǃgâb ai mûdi xa ǀoa hâga ge hâ i.

⁷Tsî ǂguro ûitsamab ge xammi xase ge ī i, tsî ǀgamǁî ûitsamab ge tsâub xase ge ī i, tsî ǃnonaǁî ûitsamab ge khoe-i khami ī aisa ge ūhâ i, tsî hakaǁî ûitsamab ge ǁkhana ra ǃariǃkhās xase ge ī i.

⁸Tsî haka ûitsamagu ge mâb hoaba ǃnani ǁgaboga ge ūhâ i; tsî gu ge ǃaugab ai tsî ǃnāb ǃnâ mûdi xa ge ǀoa hâ i; tsî gu ge tsēs tsî tsuxub tsîra ǀûs ose gere mî: ǃAnu, ǃanu, ǃanub ge ǃKhūb Elob, Hoaǀgaixab, hâ ge ib tsî hâ ab, tsî hā nîba.

⁹Tsî ûitsamagu ge ǂkhaisib tsî ǃgôasib tsî gangansa māo ǁnāb, trons ai ǂnôab, ǀamosib hoab kōse ra ûiba,

¹⁰o gu ge ǀgamdisihakaǀa ǂnomdomga ǁnāb, trons ai ǂnôab aiǃâ ǁnāǁgoe tsî ge ǀgoreǀî ǁnāb, ǀamosib hoab kōse ra ûiba, tsî gu ge ǁîgu kronde trons aiǃâ aoǂnûi tsî ge mî:

¹¹Sats ǃKhūts ge a anu, ǂkhaisib tsî ǃgôasib tsî ǀgaib tsîna māhesa; sats ge hoana kuru xui-ao, tsî sa ǂâisa xun hâ tsîn ge kuruhe xui-ao.