Read Khoekhoegowab ǂHaiǂhais 5 Bible Online

ǂHaiǂhais 5 - Khoekhoegowab bible

ǂHaiǂhais 5

¹Tsî ta ge trons ai ǂnôab di amǀkhāb ǃommi ǃnâ ǂkhani-e ge mû, ǃnāb ǃnâ tsî ǃaugab ai xoaǀoaǀoahe hâ i, hû ǂganamsaodi ǀkha ge ǂganamhe hâ i-e.

²Tsî ta ge ǀgaisa ǀhomǃgāba ge mû, kai dommi ǀkha ra ǂgaiǂuiba: Tari-e a anu, ǂkhanisa ǁkhowa-am tsî ǂganamsaodi âsa khôasa?

³Tsî khoe-i xare-i ge ǀhommi ǃnâs kas, ǃhūbaib ais kas, ǃhūb ǃnagas kasa ǁkhā tama ge i, ǂkhanisa ǁkhowa-am tsî ǁîs ǃnâ kōsa.

⁴O ta ge tita kaise ge ā, khoe-i xare-i ge ǂkhanisa ǁkhowa-am tsî khomai tsî ǁîs ǃnâ kōsa anu hâse hōhe tama i ǃkhais xa.

⁵Ob ge ǂnomdomgu di ǀguiba tita ǃoa ge mî: Tā ā; mû, danni go Judab ǃhaos di Xammi, Davib di ǃnomaba, ǂkhanisa ǁkhowa-am tsîb nî hû ǂganamsaodi âsa khôase.

⁶O ta ge ge kō; tsî mû, trons ǁaegub ǃnâ tsî haka ûitsamagu tsî ǀgamdisihakaǀa ǂnomdomgu ǁaegub ge ǁKhaoba ge mâ i, ǂāhe hâb axase, hû ǁnâgu tsî hû mûde ūhâba; ǁîgu ge hû gagagu Elob digu, ǃhūbaib hoab ǃoa ge sîǂuihega.

⁷Ob ge hā tsî trons ai ǂnôab di amǀkhāb ǃomma xu ǂkhanisa ge ū.

⁸Tsî ǂkhanisab ge ū ǃnubai gu ge haka ûitsamagu tsî ǀgamdisihakaǀa ǂnomdomgu tsîga ǁKhaob aiǃâ ge ǁnāǁgoe, mâb hoaba siters tsî ǃhuniǀuri ǃoredi, ǃgâihamxūn xa ǀoa hâde ūhâǃâ, ǁîn ge ǃanun di ǀgorede.

⁹Tsî gu ge ǀasa ǁnaetsana-e ǁnae, tsî ge mî: Anuts ge a satsa, ǂkhanisa ū tsîts nî ǁîs di ǂganamsaode ǁkhowa-amsa; ǂāhets ge amaga, tsîts ge mâ ǃhaoǃnā-i tsî gowa-i tsî ǁae-i tsî ǃhao-i hoa-e xu khoena Eloba ge ǁamaba, sa ǀaob ǀkha;

¹⁰tsîts ge ǁîna sida Eloba gao-aose tsî pristerse ge dība; on ge ǃhūbaib ai nî gaosîsen.

¹¹Tsî ta ge ge kō, tsî ta ge domma ge ǁnâu, ǂgui ǀhomǃgāgu trons ǂnamipe hâgu diba, tsî ûitsamagu tsî ǂnomdomgu tsîgu ǂnamipe hâgu diba, tsî ǀgaus âgu ge disiǀoadisi ǃnādi disiǀoadisise, tsî ǀoadisi ǃnādi ǀoadisise ge kō i;

¹²kai dommi ǀkha ra mîga: ǁKhaob ǂāhe hâb ge a anu ǃkhōǃoab nîsa ǀgaib, tsî ǃkhūsib, tsî gā-aisib, tsî ǁkhāsib, tsî ǃgôab, tsî ǂkhaisib tsî gangans tsîna.

¹³Tsî mâ kurusabe-i hoa-i, ǀhommi ǃnâ hâ-i, tsî ǃhūbaib ai hâ-i tsî ǃhūb ǃnaga hâ-i tsî hurib ai hân tsî ǁîgu ǃnâ hân hoana ta ge ǁnâu, mîn rase: ǁNāb trons ai ǂnôab tsî ǁKhaob tsîkha, a kha gangans tsî ǃgôab tsî ǂkhaisib tsî ǁkhāsib tsîna ūhâ, ǀamosib hoab kōse!

¹⁴Tsî haka ûitsamagu ge: Amen, ti ge mî. O gu ge ǀgamdisihakaǀa ǂnomdomga ǁnāǁgoe, tsî ǁnāb ǀamosib hoab kōse ra ûiba ge ǀgoreǀî.