Read Khoekhoegowab ǂHaiǂhais 6 Bible Online

ǂHaiǂhais 6 - Khoekhoegowab bible

ǂHaiǂhais 6

¹Tsî ta ge mû, ǁKhaob ge ǂganamsaodi di ǀguisa ǁkhowa-amsa. O ta ge ge ǁnâu, haka ûitsamagu di ǀguib ra ǃgurub xase ī dommi ǀkha: Hā! ti mîsa.

²O ta ge kō; tsî ge mû, ǃuri hāba, tsî ǁîb ai ǂnôab ge khā-e ge ūhâ i, tsîb ge kron-e ge māhe; ob ge dan raǃâ tsî danni nîga ge ǂoa.

³Tsî ǀgamǁî ǂganamsaosab ge ǁkhowa-am ǃnubai ta ge ǀgamǁî ûitsamab ra: Hā! ti mîsa ge ǁnâu.

⁴Ob ge ǀnî hāb, ǀapa ge iba ge ǂoaxa; tsî ǁîb ai ǂnôab ge ǀgaiba ge māhe, ǂkhîbab nî ǃhūbaiba xu ūbēse, în ga ǃgamgu ti; tsîb ge kai gôaba ge māhe.

⁵Tsî ǃnonaǁî ǂganamsaosab ge ǁkhowa-am ǃnubai ta ge ǃnonaǁî ûitsamab ra: Hā! ti mîsa ge ǁnâu. O ta ge kō; tsî ge mû, ǂnū hāba, tsî ǁîb ai ǂnôab ge ǀguiro-ūdaba ǁîb ǃomǁae ge ūhâ i.

⁶O ta ge haka ûitsamagu di ǁaegub ǃnâ dom-e ge ǁnâu: ǀGui ǀguiros ǃhorob disa ǀgui denari ama, tsî ǃnona ǀguirodi gerstǃhorob dide ǀgui denari ama; î olib tsî ǂauxûi-i tsîna tā ǂkhôa, ti ra mî-e.

⁷Tsî hakaǁî ǂganamsaosab ge ǁkhowa-am ǃnubai ta ge hakaǁî ûitsamab di domma ge ǁnâu, Hāǃ ti ra mîba.

⁸O ta ge kō; tsî ge mû ǀhai hāba; tsî ǁîb ai ǂnôab di ǀons ge a ǁō, tsî Hadeb di ǂamsab ge ǁîba gere sao. Tsî kha ge hakaǁî ǃâs ǃhūbaib dis ǂama ǀgaiba ge māhe, ǃgam kha nîse gôab ǀkha, tsî ǃâtsūǀkhāb ǀkha, tsî ǂhīǁōb ǀkha, tsî ǃhūbaib di ǀgurun ǀkha.

⁹Tsî koroǁî ǂganamsaosab ge ǁkhowa-am ǃnubai ta ge altars ǃnaga ǁnān, Elob mîs tsî ǃkhō-ams, ǁîn ge ūhâ is ǃaroma ge ǃgamhen di ǀomde ge mû.

¹⁰Tsîn ge kai dommi ǀkha ǂgai, tsî ge mî: Mâ ǁaeb kōsets kha, ǃanu tsî ama-ai ǃKhūtse, sida ǀaoba ǀgoraǃgâ tsî ǀkhao tide ǁnān, ǃhūbaib ai ǁan hân tawa?

¹¹Tsîn ge mâ-i hoa-i âna ǃuri saraba ge māhe; tsîn ge ge mîbahe, ǂkhari ǁaeroban nî sâsa, ǁîn di ǀhaoǃoabasaben tsî ǃgâsan, ǁîn ǁkhān khami nî ǃgamhen on nî dīǀoaǀoahes kōse.

¹²Tsî ta ge ge kō, ǃnaniǁî ǂganamsaosab ra ǁkhowa-amsa; tsî mû, kai ǃhūǂgubib ge ge hā, tsî sores ge ǂnū ǀûxa ǁhō-i xase ge ī, tsî ǁkhâb ge ǀaob xase ge ī;

¹³tsî ǀgamiron ǀhommi din ge ǃhūbaib ai ge ǁnā, ǀnomahai-i ǁî-i di ǁan tama ǂûna ra ǃhaebeǁnâ khami, ǀgaisa ǂoab xa i ra ǁnopeǁnopeheo.

¹⁴Tsî ǀhommi ge ge ǃgû-ī ǂkhani-i, xamikhâihe ra-i ǁkhā-i xase, tsî mâ ǃhomgu hoagu tsî mâ ǃnāǃnuidi hoadi ge ǁîdi mâǃkhaide xu ge ǁnopeǁnopehe.

¹⁵Tsî ǃhūbaib di gao-aogu tsî kaigu tsî ǃkhū hâgu tsî ǀoadisin ǂamkhoegu tsî ǀgaisagu tsî ǃgān hoan tsî ǃnorasan hoan ge ǃhomgu di ǁhāgu tsî ǁhoaǃnāgu ǃnâ gere gaugausen.

¹⁶Tsîn ge ǃhomgu tsî ǃgaregu ǃoa ge mî: ǁNā-ai da î gaugau da ǁnāb trons ai ǂnôab di aisa xu, tsî ǁKhaob di ǁaiba xu;

¹⁷kaitsēs ǁîb dis go hā xuige; tsî tari-e nî mâ ǁkhā?