Read Khoekhoegowab ǂHaiǂhais 8 Bible Online

ǂHaiǂhais 8 - Khoekhoegowab bible

ǂHaiǂhais 8

¹Tsî hûǁî ǂganamsaosab ge ǁkhowa-am ǃnubaib ge ǃnōba ǀhommi ǃnâ ge hā ǃkhare nî ī iri kōse.

²Tsî ta ge ǁnā hû ǀhomǃgāgu, Elob aiǃâ mâga ge mû; tsî gu ge hû ǀgapadade ge māhe.

³Tsî ǀnî ǀhomǃgāb ge hā, tsî altars tawa mâ, ǃhuniǀuri ǃgâihamxūn soa-e ūhâǃâ; tsîb ge ǂgui ǃgâihamxūna ge māhe, ǃanun hoan di ǀgoredi ǀkhab nî ǁîna ǃhuniǀuri altars, trons aiǃâ hâs ai ǁguise.

⁴Ob ge ǃgâihamxūn di ǀanna ǃanun di ǀgoredi ǀkha ǀhomǃgāb di ǃomma xu Elob aiǃâ ge ǃapa.

⁵Ob ge ǀhomǃgāba ǃgâihamxūn soasa ū, tsî ǁîsa altars di ǀaes ǀkha ge ǀoaǀoa, tsî ǃhūbaib ai ge aoǁgui si. O gu ge domgu tsî ǃgurugu tsî napagu tsî ǃhūǂgubib tsîna ge hā.

⁶Tsî ǁnā hû ǀhomǃgāgu, hû ǀgapadade ūhâgu ge ge ǂhomisen, xâi gu nîse.

⁷Tsîb ge ǂguro ǀhomǃgāba ge xâi; o ra ge ǀaob ǀkha habahe hâ ǃnareb tsî ǀaes tsîra hā, tsî ǃhūbaib ai ge aoǁnâhe; os ge ǃnonaǁî ǃâs ǃhūb tsî hain disa ge khauǃkhūhe, tsî ǃam ǀgâb hoab ge ge khauǃkhūhe.

⁸Tsîb ge ǀgamǁî ǀhomǃgāba ge xâi; o i ge xū-i, kai ǃhommi xase ī-i ǀaes xa ra ǂhubi-e hurib ǃnâ ge aoǂgāhe; os ge hurib di ǃnonaǁî ǃâsa ge ǀao kai;

⁹os ge ǃnonaǁî ǃâs hurib ǃnâ hâ ûitsama kurusaben disa ge ǁō; os ge ǃnonaǁî ǃâs doe-omgu disa ge hîkākāhe.

¹⁰Tsîb ge ǃnonaǁî ǀhomǃgāba ge xâi; o i ge kai ǀgamiro-i, ǃamamǀae-i xase ra ǂhubi-e ǀhomma xu ge ǁnā, tsî i ge ǃnonaǁî ǃâs ǃāgu dis tsî ǁgamxa ǀaudi dis ai ge ǁnā.

¹¹Tsî ǁnā ǀgamiros di ǀons ge Alsems ti ra ǂgaihe; os ge ǃnonaǁî ǃâs ǁgamgu disa ge alsem kai, on ge ǂgui khoena ǁnā ǁgamgu xa ge ǁō, au gu ge xui-ao.

¹²Tsîb ge hakaǁî ǀhomǃgāba ge xâi; os ge ǃnonaǁî ǃâs sores dis, tsî ǃnonaǁî ǃâs ǁkhâb dis, tsî ǃnonaǁî ǃâs ǀgamiron disa ge ǂnauhe; ǃnonaǁî ǃâs ân nî ǃkhaeǃkhaehese, tsî tsēs di ǃnonaǁî ǃâs ǃnâ tidese tsî ǁnās ǁkhās xase tsuxub disa.

¹³Tsî ta ge ge kō, tsî ta ge ge ǁnâu, ǀhomǃgāb ra ǀhommi di ǁaegub ǃnâ ǁkhana ǃkhaisa, kai dommi ǀkha ra mîba: Tsūba, tsūba, tsūba ǁnān, ǃhūbaib ai ǁan hâna, ǃgau go domgu ǀgapadas digu, gorose nî xâi ǃnona ǀhomǃgāgu digu ǃaroma.