Read Khoekhoegowab ǂHaiǂhais 9 Bible Online

ǂHaiǂhais 9 - Khoekhoegowab bible

ǂHaiǂhais 9

¹Tsîb ge koroǁî ǀhomǃgāba ge xâi; o ta ge ǀgamiro-i, ǀhomma xu ǃhūbaib ai ge ǁnā-e ge mû; tsî i ge ǂganamxūs abisuǂgâb disa ge māhe. (Abisuǂgâb: ǃAoǃaosa tsî ǃhuriǃhurisa ǃkhae ǃgammi, ǃkhaenab di gagagu di ǁanǃkhaib.)

²Ob ge abisuǂgâba ge ǁkhowa-am, ob ge ǀanna ǂgâba xu ge ǂoaxa kai ǁganoms di ǀanni xase, o ra ge sores tsî ǂoab tsîra ǂgâb di ǀanni xa ge ǃkhaeǃkhaehe.

³Tsî ǀanna xun ge ǂhomna ǃhūbaib ai ge hā; tsîn ge ǀgaiba ge māhe, ǃhūbaib di ǀhūgu[1] ǀgaiba ūhâ khami.

⁴Tsîn ge ge mîbahe, ǃhūbaib di ǀgânan ǂkhôa tidesa, tsî ǁhao-i xare-i tsî hai-i xare-i tsîn, ǁnā khoen ǀguin, Elob di saoǂnûisa ǁîn di ǃūdi ai ūhâ tamanan nî ǂkhôasa.

⁵Tsîn ge ǀgaiba ge māhe, ǁîna ǃgam tama i tsî koro ǁkhâgu kōsen nî ǁîna tsûtsûsa; tsî tsûtsûs ân ge ǀhū-i[2] di tsûtsûs xase ge ī-i, khoe-e i ra ǃkhā ǃnubai.

⁶Tsî ǁnā tsēdi ain ge khoena ǁōba nî ôa, xawe hō bi tide, tsî ǁōn nîsa nî ǁkhore, xawe ǁōb ge ǁîna xu nî ǁhâ.

⁷Tsî ǂhomn di īsigu ge toroba ǁāǁābahe hâ hān xase ī, tsî danadi ân ain ge kronde ūhâ, ǃhuniǀurise īde, tsî aidi ân ge khoen di aidi xase ī;

⁸tsîn ge ǀûga ge ūhâ i, taradi ǀûgu xase, tsî ǁgûgu ân ge xamgu di ǁgûgu xase ge ī i;

⁹tsîn ge ǁâǁkhaib saragu ǂnūǀuri ǁâǁkhaib sarase īga ge ūhâ i, tsî ǀōb ǁgabogu ân dib ge kunidi di ǀōb xase ge tsâ i, ǂgui hān torob ǃoa ra ǃkhoen dib xase.

¹⁰Tsîn ge ǂarega ge ūhâ i, ǀhūgu[3] digu xase, tsî di ge ǃkhāǁkhūde ǂaregu ân ai ge hâ i; tsî ǀgaib ân ge hâ i, khoenan nî koro ǁkhâgu kōse ǂkhôase.

¹¹Tsîn ge ǁîn ǂama abisuǂgâb di ǀhomǃgāba gao-aob ase ge ūhâ i; ǀons âb ge Hebreǁîgowab ǃnâ Abadon ti ge ǂgaihe, tsî Grikegowab ǃnâb ge Apolion ti ge ǀon hâ i.

¹²ǀGui tsūbas ge go ǃgôa-ī; mû, gorose ra ge ǀgam tsūbara nēn khaoǃgâ nîra hā.

¹³Tsîb ge ǃnaniǁî ǀhomǃgāba ge xâi; o ta ge haka ǁnâgu ǃhuniǀuri altars Elob aiǃâ hâs diga xu dom-e ge ǁnâu,

¹⁴ǃnaniǁî ǀhomǃgāb, ǀgapadasa ūhâb ǃoa ra mî-e: Xore ǁnā haka ǀhomǃgāgu, kai ǃāb Eufrati tawa ǃgaemâihe hâga!

¹⁵O gu ge haka ǀhomǃgāga ge xorehe, ǁîgu ǂhomisen ge hâ iga iri ai, tsî tsēs ai, tsî ǁkhâb ai, tsî kurib ai, khoen di ǃnonaǁî ǃâsa gu nî ǃgamse.

¹⁶Tsî ǂnubis toroǃgapi-aogu dis di ǀgaus ge ǀgam ǃnāra disiǀoadisi ǃnādi disiǀoadisise ge hâ i; tsî ta ge ǁîn di ǀgausa ge ǁnâu.

¹⁷Tsî ta ge ǁnāti nē ais ǃnâ hāga ge mû, tsî ǁîgu ai ǂnôagu ge ǁâǁkhaib saraga ge ūhâ i, ǀaexase īga, tsî ǀhomǂhoase īga tsî ǃhunise īga; tsî hāgu di danadi ge xamgu di danadi xase ge ī i, tsî ams âga xun ge ǀaes tsî ǀanni tsî sulfuri tsîna gere ǂoaxa.

¹⁸Nē ǃnonan ǀkhas ge khoen di ǃnonaǁî ǃâsa ge ǃgamhe: ǀAes tsî ǀanni tsî sulfuri tsîn, ǁîgu amsa xu gere ǀkhīn ǀkha.

¹⁹Hāgu di ǀgaib ge amǃnâgu âgu tsî ǂaregu âgu ǃnâ hâ xui-ao. ǁÎgu di ǂaregu ge ǀaogu xase ge ī i tsî gu ge danade ge ūhâ i, ǁîgu ǀkha gu ra ǂkhôaga.

²⁰Tsî nau khoen, nē tsûtsû-aide xu ǃgamhe taman ge ǃhobasen tama ge i ǁîn ǃomgu di sîsenga xu, ǁgâuagan ǀgoreǀî tidese, tsî ǃhuniǀuri tsî ǀhaiǀuri tsî ǀapaǀuri tsî ǀui tsî haiǁgôatsuiǁgoagu, mû ǁoagu tsî ǁkhāti ǁnâu ǁoagu tsî ǁkhāti ǃgû ǁoaga;

²¹tsîn ge ǁkhāti ǃhobasen tama ge i ǁîn di ǃgamde xu, tsî ǁîn di ǃgaidīga xu, tsî ǁîn di ǀaiba xu, tsî ǁîn di ǃnariba xu.