Read Khoekhoegowab Ruts 1 Bible Online

Ruts 1 - Khoekhoegowab bible

Ruts 1

¹Tsî i ge ǂhanuǂhanu-aogu ra ǂhanuǂhanu tsēdi ǃnâ ge ī, ǃâtsūǀkhāb ǃhūb ǃnâ ge hā ǃkhaisa; ob ge aob Betlehem-Judas diba ge doe, ǃhaokhoeseb nî Moab di ǃaugu ǃnâ hâse, ǁîb tsî ǁîb taras tsî ǁîb ǀgam ǀgôakha tsîn ǀkha.

²Tsî ǀons ǁnā aob dis ge Elimelex ti ge hâ i tsî taras âb di ǀonsa Naomi tsî ǀgam ǀgôakha âb di ǀonra Maxlon tsî Kiljon, Efrataǁîn, Betlehem-Judas dina; tsîn ge Moab di ǃaugu ǃnâ sī tsî ǁnāpa ge hâ.

³Tsî Elimelexi, Naomis aob ge ge ǁō; tsîs ge ǁîsa ge ǃgau ǀgôakha âs ǀkha.

⁴Tsî kha ge ǁîkha Moabǁî tarara ge ū, ǀguis di ǀons ge Orpa ge i tsî naus di ǀonsa Rut; tsîn ge ǁnāpa disi nî i kurigu kōse ge hâ i.

⁵Tsî ǁî ǀgamkha, Maxlonni tsî Kiljonni tsîkha ge ǁkhāti ge ǁō; nētis ge tarasa ge ǁnāxūhe, ǀgôakha tsî aob âs tsîgu xa.

⁶ǃNubais ge ǁîsa ǀuiǀgôara âs ǀkha khâi tsî ge ǁaru Moab di ǃauga xu, Moab di ǃhūb ǃnâs ge ǁnâu xui-ao, ǃKhūb ge ǁaes âba sari tsî ǁîna pereba mā ǃkhaisa.

⁷Tsîs ge hâs ge i ǃkhaisa xu ge ǂoa, tsî ǁîs di ǀuiǀgôara ǁîs ǀkha. Tsî daob ai di ǃgûgau hîa, Judaǃhūb ǃoa di nî ǁaruse,

⁸os ge Naomisa ǀuiǀgôara âs ǃoa ge mî: ǃGû î ro oa, mâs hoasa ǁgûs di oms ǃoa; îb ǃKhūba ǃgâidī ro, saro ge ǁō hâgu tsî tita dības ǁkhās xase.

⁹Îb ǃKhūba saro mā, sâba ro nî hō ǃkhaisa, mâs hoasa ǁîs di aob oms tawa. Tsî ǁoa ras ge o ra ge dommi âra ūkhâi tsî ge ā,

¹⁰tsî ra ge ǁîs ǃoa ge mî: Sim ge amase sas ǀkha nî oa, sa ǁaes ǁga.

¹¹Os ge Naomisa ge mî: Oa ro re, ti ôaro, tarexa ro kha tita ǀkha nî ǃgû? Tita kha ganupe ǀgôakha ti soros ǃnâ ūhâ, aose kha nî ība roga?

¹²Oa ro re, ti ôaro, î ro ǃgû, tita ge ao-e ūsa kairaba hâ. Tsî mî ta kao, ǃâubasensa ta ūhâ tsî ao-e ta ga ǁkhāti ūhâ nē tsuxub ǃnâ tsî ǀgôakha ta ga ǁkhāti ǁora,

¹³xare ǃâu ro ka nî, ǁîkha nî kais kōse? ǁÎ ǃkhais ǀkha ǀhawe ro nî ǀnî ao-e ūsa? Hî-î ti ôaro, ǁî ǃkhais ge tita saro ǃgâ-ai a auba; ǃKhūb di ǃommi ge ti ǃoagu ǂoa amaga.

¹⁴ǃNubai ra ge dommi âra ūkhâi tsî ǁkhawa ge ā; tsî Orpas ge ǀuiǁgûs âsa ge ǁoa, xawe Ruts ge ǁîsa ge ǂae-ai.

¹⁵Os ge Naomisa ge mîǀî si: Mû, sa ǀgamisas ge go ǁaru ǁîs di ǁaes ǃoa tsî ǁîs di elogu ǃoa; ǁnâi sas ona ǁaru re sa ǀgamisas khaoǃgâ.

¹⁶Xawe Ruts ge ge mî: Tā ǁgūǀkhā te, ǁnāxū si tsî ta nî sasa xu oa ǃkhaisa; sas ra ǃgûǀî ta ge tita ona nî ǃgû, tsî sas ra ǁomǂkhai ǃkhais tawa ta ge tita ona nî ǁomǂkhai; sa ǁaes ge a ti ǁae, tsî sa Elob ge a ti Elo.

¹⁷Sas ra ǁō ǃkhais ai ta ge tita ona nî ǁō, tsî ǁnāpa ta ge nî ǁkhōhe; nēti ab ǃKhūba dī-ū te, îb ǁîba ǁnāti dīǀaro-ū te, ǁōb ǀguib ga tita tsî sas tsîm ǁaegu ǀgorasa dī tama io.

¹⁸Tsî mûs geo, ǁaposases ǂâibasen hâ ǃkhaisa, ǁîs ǀkha ǃgûsa, os ge ǁîsa ge ǃhoa-ūǀû.

¹⁹ǁNāti ra ge ǁîǀgamra ge ǃgû Betlehems tawa ra ge sīs kōse; tsî i ge ge ī, Betlehems tawa ra ge sī ǃnubais ge ǃās hoasa ǁîs ǂama gon tsîn ge: Naomisa kha? ti mî ǃkhaisa.

²⁰Xawes ge ǁîna ge mîǀî: Tā Naomi ti ǂgai te, î du Mara ti ǂgai te; Hoaǀgaixab ge ama kai ǃoasiba ge hāǂam kai te xuige.

²¹ǀOasase ta ge ge doebē, xawe ǀkhaiǃnâseb ge ǃKhūba go ǁaruhā kai te; tare xū-i ǃaroma du kha Naomi ti nî ǂgai te, ǃKhūb ra ti ǃoagu ǃkhō-am xawe, tsî Hoaǀgaixab tsūdī-ū te hâ xawe?

²²Nētis ge Naomisa ǁkhawa ge ǁaruhā tsî Ruts, Moabǁîs, ǀuiǀgôas âsa ǁîs ǀkha, Moab di ǃauga xus ge ǁkhawa ǁaruhā ǃnubai; tsî ra ge Betlehems tawa ge sī gerstǃgaos di tsoatsoas ǃnâ.