Read Khoekhoegowab Ruts 2 Bible Online

Ruts 2 - Khoekhoegowab bible

Ruts 2

¹Tsî Naomis ge ǁnāpa ǀaokhoeb ǁîs aob diba ge ūhâ i, aob hîa ǃgarib, Elimelexi di ǃhaoǃnās dib, Boa ti ǀon hâba.

²Tsî Ruts, Moabǁîs ge Naomis ǃoa ge mî: A ta ǃgû ǃhanab ǁga, î ta ǃnuruga sākhâi, ǁnāb ǁîb mûǁae ta ga ǀkhomma hōb hoab ǃgâb ai. Os ge ǁîs ǃoa: ǃGû re ti ôase, ti ge mî.

³ǁGoasis ge ǃgû tsî sī tsî ge sākhâi ǃhanab di ǃgao ra gu khaoǃgâ; tsîs ge ge ībahe, ǃhanab di ǃâs hîa Boab, Elimelexi ǃhaoǃnās dib disas ge hō ǃkhaisa.

⁴Tsî mû, Boab ge Betlehemsa xu hā tsî ǃgao ra gu ǃoa ge mî: ǃKhūba ab hâǀkhā go! O gu ge ǁîb ǃoa: ǃKhūba ab ǀkhae tsi, ti ge mî.

⁵ǁNās khaoǃgâb ge Boaba ǁîb di ǃgāb hîa ǃgao raga ra mûǂamma ge dî: Tarib disa nē ǂkham khoesa?

⁶Ob ge ǁnā ǃgāb, ǃgao raga ra mûǂamma ge ǃeream: Nēs ge ǁnā Moabǁî ǂkham khoes, Naomis ǀkha Moab di ǃauga xu ge hāsa;

⁷tsîs ge ge mî: A ta sā-ai re î ta ǃgaeǀkhādadi ǁaegu ǃnuruga ǀhaoǀhaobasen, ǃgao ra gu khaoǃgâ, nētis ge go hā, tsîs ge ǃnauǁgoagasa xu go mâ, tsî nēs kōses ama ǀorose go sâ, oms ǃnâ.

⁸ǃNubaib ge Boaba Ruts ǃoa ge mî: ǁNâu, ti ôase, tā ǀkhara ǃhana-i ai sā-aiǃgû, îs ǁkhāti tā nēpa xu ǃgûbē, îs nēpa hâ ti ǃgādi tawa.

⁹Sa mûra ge nē ǃhanab hîa gu ra ǃgaob ai nî hâ, tsîs ge ǁîgu khaoǃgâ nî ǃgû; mîba tama ta hâ ǃgāga, tsâǀkhāhes tide ǃkhaisa? ǁGâs kao, ǁnâi ǃgû soadi ǃoa îs ā, ǃgāgu xuri hâ-i xa.

¹⁰Os ge ais âs ai ǁnāǁgoe tsî ǃhūb ai ǃgamǃgâ tsî ǁîb ǃoa ge mî: Tare-i ǃaromasa ǀkhomma ta sa mûǁae go hō tsîts tita ra mûsa, ǃhaokhoe ta a hîa?

¹¹Ob ge Boaba ǃeream tsî ǁîs ǃoa ge mî: Mîbahe ta ge ge sa ǀuisasas ge dī-ūn hoana, aob âs di ǁōb khaoǃgâ, tsî matis saob tsî saos tsî sa ǃnaeǃhūba ǁnāxū tsî ge ǃgû ǃkhaisa, ǁaes hîas ǀnai ǂan tama ge hâ is ǃoa.

¹²Ab ǃKhūba nē dīs âsa dīdawa-am si îs sa amǃnâsa ǀoa ǃKhūb, Israeli di Elob, ǁgabokha âb ǃnâs ge ǁhaiǂgâba xu.

¹³Os ge ge mî: A ta ǀkhomma hō re sa mûǁae, ti ǃkhūkhoetse, ǁkhaeǂgao te tsîs go sa ǃgāta di ǂgaob ǃoa ǃhoa xuige, ǃgādi âts di ǀguis ase ta ī tama hâ xawe.

¹⁴Tsî ǂûǁaeb ge hā ǃnubaib ge Boaba ǁîs ǃoa ge mî: Hā îs pereb xa ǂû, îs pereǃâs âsa ǀkhuruxûib ǃnâ ǀobe. Os ge ǃgao ra gu xōǀkhā ge ǂnû, tsîb ge ǁîsa ǁnaruǀkhāhe hâ ǃhorona ge ūǀkhība; os ge ǂû tsî ǁâ tsî ge ǃgau.

¹⁵Tsî sā nîses ge khâio, ob ge Boaba ǃgāgu âba mîmā tsî ge mî: As ǁkhāti ǃgaeǀkhādadi ǁaegu sā-ai, î go ǁîsa tā taotao.

¹⁶Î go ǁkhāti saogube ǃommiǀoaroga ǁîsa ǁnā kaiba, î go ǁgoe kai, îs sā-ai, î go tā ǀau si.

¹⁷Nētis ge ǁnā ǃhanab ai ǃuis kōse ge sā-ai; tsîs ge sā-ais gona ge ǂnauǁnâ on ge ǀgui nî ī efa gerstǃhoro-i kō ge i.

¹⁸Os ge ǁîna ūkhâi tsî ǃās tawa ge sī; tsî ǀuisas âs ge sā-ais gona ge mû; tsîs ge ǁkhāti ūǀkhī tsî ge mā si, ǁâs ge os ge ǃgauna.

¹⁹ǃNubais ge ǀuisas âsa ǁîs ǃoa ge mî: Mapas nētsē goro sā-ai tsî mapas goro xūre? Ab ǃKhūb xa ǀkhaehe ǁnāb, sasa go ǂanna! Os ge ǀuisas âsa ge ǃhoaba, tarib tawas goro xūre ǃkhaisa tsî ge mî: ǁNā aob, ǁîb tawa ta goro xūreb ǀons ge a Boa.

²⁰ǃNubais ge Naomisa ǀuiǀgôas âs ǃoa ge mî: Ab ǃKhūb xa ǀkhaehe ǁnāb, ǃgâidīb âba ûitsaman tsî ǁō hân tsîn ǂama ǁnākhao tama hâba. ǃAruǀîs ge Naomisa ǁîs ǃoa ge mî: ǁNā aob ge a sam di ǀgūkhoe, ǁîb ge a sam orekhoegu di ǀgui.

²¹Os ge Ruts, Moabǁîsa ge mî: ǁKhātib ge tita ǃoa ge mî: Sas ge ǃgāgu tigu tawa nî hâ ǁnā ǃgaos, hîa ta ūhâs hoas nî toas kōse.

²²Os ge Naomisa ǁîs di ǀuiǀgôas Ruts ǃoa ge mî: ǃGâi i ge a, ti ôase, ǁîb di ǃgādi ǀguidi ǀkhas nî ǂoa ǃkhaisa, nau ǃhana-i ais ǀnîsi tsūse sîsenūhe tidega.

²³Os ge Boab di ǃgādi ǀkha ge hâ, sā-ais nîse, gerstǃgaos tsî ǃhoroǃgaos ge toas kōse; tsîs ge ǀuisas âs tawa ǁkhawa ge hâ.