Read Khoekhoegowab Ruts 3 Bible Online

Ruts 3 - Khoekhoegowab bible

Ruts 3

¹Tsî Naomis, ǀuisas âs, ge ǁîs ǃoa ge mî: Ti ôase, sâǃkhai-e ôaba si ta tide, ǃgâibahes nîga?

²Tsî nēsi Boab, ǃgādi âb ǀkhas go hâ ib, ǁîba sam di ǀgūkhoe tamaba? Mû, ǁîb ge nē tsuxub ǃnâ gerstǃhoroba dāǃnâǃkhais ai nî ǂoaru.

³Khōsen ǁnâi îs ǂkhauǀkhāsen îs sa sarana ǂgaeǂgā îs ǁgôa dāǃnâǃkhais ǃoa, xawe tā ǂanǂansen, ǂû, tsîb nî ātoas kōse.

⁴Tsî i ge nî ī, ǁgoeb kao, os ge ǁnā ǃkhais, ǁîb ga ǁgoe-aisa nî ǃgaoǃgâ; îs ǁnâi ǂgâ îs ǂaira âb di ǃgū-aixūsa ǀhuikhâi îs ǁgoe; ob ge ǁîba nî ǂanǂan si, tare-es nî dī ǃkhaisa.

⁵Os ge ǁîs ǃoa: Mîba tes ra xūn hoana ta ge nî dī, ti ge mî.

⁶Nētis ge dāǃnâǃkhais ǃoa ǁgôa tsî ǀuisas âs ge mîmā sin hoana ge dī.

⁷Tsî Boab ge ǂû tsî āo, tsî ǂgaob âb ge ǃgâiaǂgao-o, ob ge hā tsî ge ǁgoedīsen, ǃgaeǀkhādadi ǂguib di ǀams tawa. ǁNās khaoǃgâs ge ǁîsa ǂause hāǂgâxa tsî ǂaira âb di ǃgū-aixūsa ǀhuikhâi tsî ge ǁgoe.

⁸Tsî i ge ge ī tsuxuǃgâb ai, aob ge ǃhuri tsî ǂnûkhâi ǃkhaisa, tsî mû, tara-i ge ǁgoe ǂaira âb di ǃgū-aixūs tawa.

⁹Ob ge: Tarisa sasa? ti ge mî. Os ge: Tita ge Rutta, sa ǃgāta; sa ǁgabokha sa ǃgās ǂama khoraǂui re, sats a orekhoe xuige, ti ge mî.

¹⁰Ob ge ge mî: As ǃKhūb xa ǀkhaehe re, ti ôase, sas ge nē ǀuni ǃgâidīb âsa ǂgurob ǃgâ-ai ǃgâise go dī, ǂkhamkhoegas ge saoǃgon tama hâ, ǀgâsab kas, ǃkhū hâb kas hoasa.

¹¹Tsî nēsi ti ôase, tā ǃao, mîs gon hoana ta ge tita nî dī; ǃās hoaragas ti ǁaes dis ge a ǂan, ǃgâiǂūxa taras a ǃkhaisa xui-ao.

¹²Tsî nēsi, nēs ge a ama, orekhoe ta a ǃkhaisa, xawe ǀnî orekhoeb ge hâ, tita xa a ǀgūba.

¹³Nē tsuxuba ǁomǂkhai; tsî ǁgoaǁaeb ai i ga ī, ore sib ra ǃkhaisa, o i ge a ǃgâi, ab ore, tsî ore si ǂgao tamab ka io, o ta ge tita nî ore si, ǃKhūb a ûitsama ǃkhais ao; ǁgoe ǁgoas kōse.

¹⁴Nētis ge ǂaira âb di ǃgû-aixūs tawa ge ǁgoe ǁgoas kōse; tsîs ge ge khâi, nē khoe-i nau khoe-e mûǃā ǁoa ǁaeb aiǃâ; nētib ra mî xui-ao: Tā îs ǂansa, tara-i go dāǃnâǃkhais ǃoa hā ǃkhaisa.

¹⁵ǃAruǀîb ge ge mî: Anaǂamxūb âs, sa ai hâba ūǀkhī î xapa. Os ge ǁîsa ge xapa, tsî ǁîb ge ǃnani ǀguiroga gerstǃhorob ǀkha ǀoaǀoa tsî ge ǁgui-ai si; ǁnās khaoǃgâb ge ǃās ǃnâ ge ǂgâ.

¹⁶ǁGoasis ge ǁîsa ǀuisas âs tawa ge sī, ǁîs hîa ra mîsa: Matisa ti ôa? Os ge ǁnā aob go dī-ū sin hoana ge ǃhoaba si.

¹⁷Tsîs ge ǁkhāti ge mî: Nē ǃnani ǀguirogu gerstǃhorob digab go mā te, nētib ra mî xui-ao: Tā îs ǀkhaiǃomse sa ǀuisas tawa sī.

¹⁸ǃNubais ge ǁîsa ge mî: ǂKhîse ǂnû, ti ôase, ǂans nîs kōse, matis nî ǃkhaisa ǀamǂoasa; ǁnā aob ge sâ tide, nētsēb nî nē ǃkhaisa dītoas kōse.