Read Khoekhoegowab Ruts 4 Bible Online

Ruts 4 - Khoekhoegowab bible

Ruts 4

¹Tsî Boab ge ǁāb ǃoa ge ǃgûǃapa, tsîb ge ǁnāpa sī ge ǂnû, tsî ǁnā orekhoeb, Boab ge ǁîb xa ǃhoab ge ǃgû-ī; ob ge ǁîb ǃoa ge mî: Nēpa ǀkhī, î ǂnû, sats ǂanǂansatse. Ob ge sī tsî ge ǂnû.

²Tsîb ge disi aogu, ǃās di kaiga ū tsî ge mî: ǂNû nēpa. O gu ge ge ǂnû.

³ǃNubaib ge ǁnā orekhoeb ǃoa ge mî: ǁNā ǃhūǃâs, sakhom di ǃgâsab Elimelexi di ge isas ge Naomis, Moabǁîn di ǃhūba xu ge hāsa ra ǁamaxū.

⁴Tsî tita ge ge mî, tita ge ǁî ǃkhaisa sa ǂgaes ǃnâ ǂhaiǂhai tsî nî mî: ǁÎsa ū ǁansaben hâ hîa, tsî ti ǁaes di kaigu hâ hîa. Ore ǂgaots kao, ore re, tsî ore ǂgao tamats ka io, mîba te re, î ta ǂan. ǀNî khoeb hîa nî oreb ge a ǀkhai, sats ǀguits tsî tita sats khaoǃgâ. Ob ge: Tita ge nî ore, ti ge mî.

⁵Ob ge Boaba ge mî: Naomis di ǃomǁaeba xuts ga ǃhūba ū tsēsa xuts ge ǁkhāti Ruts, Moabǁîsa tarase nî ū, ǁō geb di ǀonsats nî ǀumis âba ǂkhaiǂkhaibase.

⁶Ob ge orekhoeba ge mî: Tita ge ǁîsa a orebasen ǁoa, î ta ti ǀumisa tā ǂkhôa; îts satsa ti oresa oreba te re, ore ǁoa ta a xuige.

⁷Tsî nēs ge hugasa xu Israeli ǃnâ ǁnaeti ge i ores tsî ǁamaǃkhunis tawa: ǃKhais hoas nî ǁapoǁapohegab ge nē aoba ǁharos âba ǂgaeǂui tsî ǀgūkhoeb âba ge mā; tsî nēs ge ǀhûǀguitimîse ge i Israeli ǃnâ.

⁸Ob ge orekhoeba Boab ǃoa: Satsa ǁîsa ūbasen, ti mî tsî ǁharos âba ge ǂgaeǂui.

⁹ǃNubaib ge Boaba kaigu tsî ǁaes hoas ǃoa ge mî: Sadu ge nētsē a ǃkhō-amao, Elimelexi di ge in hoan tsî Kiljonni tsî Maxlonni tsîkha di ge in hoana ta Naomis di ǃomǁaeba xu go ū ǃkhaisa.

¹⁰Nēn tawa ta ge ǁkhāti Ruts, Moabǁîs, Maxlonni di tarasa tarase ra ū, ǁō geb di ǀonsa ta nî ǀumis âba ǂkhaiǂkhaibase, ǁō geb di ǀons ǃgâsagu âba xu ǀarihe tidega tsî ǃās âb di ǁāba xu; sadu ge nētsē a ǃkhō-amao.

¹¹On ge ǁāb ǃnâ hâ khoen hoana kaigu ǀkha ge mî: Sida ge a ǃkhō-amao; ab ǃKhūba nē taras, sa oms ǃnâ ra sīsa Raxels tsî Leas tsîra hîa hoara Israeli di omma ge ǂnubira ǁkhāra khami dī, îts satsa ǀgai Efratas ǃnâ, îts ǂgaihesa ǀonsa hō Betlehems ǃnâ.

¹²Îb ommi âtsa Peresi, Tamars ge Judaba ǁorabab di ommi ge ī i xase ī ǁnā surib, ǃKhūb nî nē ǂkham tarasa xu mā tsiba.

¹³Nētib ge Boaba Rutsa ge ū, tsîs ge ge ǁîb di tara kai, tsîb ge ǁîs tawa ge ǂgâ; tsî ǃKhūb ge ǁîsa ge ǀgamǀkhā kai, tsîs ge ǀgôaba ge ǁora.

¹⁴ǃNubai di ge tarade Naomis ǃoa ge mî: ǃKhūba ab koahe, orekhoeba mā sisa ǁnākhao tama hâba, îs ǀons âba ǂansa Israeli ǃnâ.

¹⁵ǁÎb ge ǀoms di khoakhoa-aose nî ība si tsî kairasib âs di sâu-aose; sa ǀuiǀgôas, sasa ǀnam hâs ge ǁîba go ǁora, ǁîs hîa hû ǀgôagu ǂamai a ǃgâiba sisa.

¹⁶Tsî Naomis ge ǀgôaba ū tsî tîǂams âs ai ge ǂnûi bi, tsîs ge ge ǁîb di kōǃgâ-ao kai.

¹⁷Tsî ǁanǁare-aodi ge ǁîba ǀonsa mā tsî ge mî: Naomis ge ǀgôaba ǁorabahe hâ. Tsî di ge ǀons âba Obed, ti ge ǂgai. Nēb ge Isaib îb, Davib îba.

¹⁸Nēdi ge ǃhaodi Peresi dide: Peresi ge Hesronna ge ôa;

¹⁹tsî Hesronni ge Ramma ge ôa; tsî Rammi ge Aminadaba ge ôa;

²⁰tsî Aminadab ge Nasonna ge ôa; Nasonni ge Salmonna ge ôa;

²¹tsî Salmonni ge Boaba ge ôa; tsî Boab ge Obeda ge ôa;

²²tsî Obedi ge Isaiba ge ôa; tsî Isaib ge Daviba ge ôa.