Read Khoekhoegowab 1 Samueli 1 Bible Online

1 Samueli 1 - Khoekhoegowab bible

1 Samueli 1

¹Khoeb ge ge hâ i Ramatajim Sofims dib Efraimǃhommi ai, Elkana ti ǀon hâb, Jerohammi ôab, Elihub ôab, Tohub ôab, Sufi ôab, Efrataǁîba.

²Tsîb ge ǀgam tarara ge ūhâ i: ǀGuis ge Hanna ti ge ǀon hâ i, tsî naus ge Penina ti ge ǀon hâ i. Tsî Peninas ge ǀgôana ge ūhâ i, xawe Hannas ge ge ǀgôao i.

³Tsî nē khoeb ge kurikorobe ǁîb di ǃāsa xu gere ǃapa ǀgoreǀîb nîga, tsî ǃKhūb ǂnubidi dibab nî ǁguibaga Silos tawa; tsî ǁnāpa kha ge pristerkha ǃKhūb dikha Hofnib tsî Pinehab tsîkha, Elib ôakha, ge hâ i.

⁴Tsî i ge Elkanab ra ǁîs ai ǁguiba tsēs ai ge ī, Peninas, ǁîb di taras, tsî ǁîs di ôagu hoagu tsî ǁîs di ôadi hoadeb ǃâde ge mā ǃkhaisa.

⁵Xawe Hannasab ge ǃhonarisa ǃâsa ge mā, Hannasab ǀnam hâ xui-ao, tsî ǃKhūb ge ǁîs di ǃnāba ge ǂganam hâ i.

⁶Os ge mâǃoasabes âsa ǁkhāti ǁîsa ǁgonǁgonǂgao rase ge ǂoeǂoe, ǁaixa kai sis nîga, ǃKhūb ge ǃnāb âsa ge ǂganam hâ i xui-ao.

⁷Tsî nētib ge kurikorobe gere dī; ǃKhūb di ommi ǃoas ge ǁîsa ǃapasa xus ge ǁnāti gere ǂoeǂoe si; ǁnā-amagas ge ge ā tsî ǂû tama ge hâ i.

⁸ǃNubaib ge Elkanab, ǁîs di aoba ge mî: Hannase, tarexas ra ā? Tsî tarexas ǂû tama hâ? Tsî tarexab ǂgaob âsa ǃoa hâ? Tita kha ǁnâi disi ǀgôagu ǃgâ-ai ǃgâiba si tama hâ?

⁹Tsî Hannas ge ge khâi, ǂû tsîn ge ātoao Silos tawa. Tsî Elib, pristeri, ge ǂnû-aiǃnaos ai ge ǂnôa i, ǃKhūb tempeli ǁāb di haib tawa.

¹⁰Tsî ǁîs ge ǀoms ǃnâ ǃoa hâse ǃKhūba ǀkhoma tsî kaise gere ā.

¹¹Tsîs ge mîmâi-e mîmâi tsî ge mî: ǃKhūtse, ǂnubidi ditse, sa ǃgāta di ǀkhomǀkhomsasiba kōǀî tsîts ga tita xa ǂâi tsî sa ǃgāta aore suriba māo, o ta ge ǁîba sats ǃKhūtsa nî mā ǁîb di ûitsēdi hoade, tsî ǂkhomgôa-i ge danas âb ai hā tide.

¹²Tsî i ge ge ī, ǀgorehâhâs geo ǃKhūb di ais aiǃâ, ob ge Eliba ams âsa ge ǃgaoǃgâ.

¹³Hannas ǂgaob âs ǃnâ ra ǃhoa xui-ao kha ge ǁîs di amǁgaukha ǀguikha gere gon, xawe dommi ge ǁnâuhe tama ge hâ i; ob ge Eliba ǀhoros hâ, ti ge ǂâi hâ i.

¹⁴Ob ge Eliba ǁîs ǃoa ge mî: Matikōses kha nî ǀhoro? ǂAuxûib âsa ūbēxūsen!

¹⁵Os ge Hannasa ǃeream tsî ge mî: Hî-î, ti ǃkhūkhoetse, tita ge tarata, ǃoa hâ gagas â-ita; tita ge ǂauxûi-i kas, ǀgaisa xûi-i kas hoasa ā tama hâ, tsî ta ge ti ǀomsa goro ǁhōǂui ǃKhūb di ais aiǃâ.

¹⁶Sa ǃgāta tā Beliali di ôase ū, ti ǃoab tsî ti tsûaǂgaob di kaisiba xu ta ge nēs kōse goro ǃhoa.

¹⁷Ob ge Eliba ǃeream tsî ge mî: ǃGû ǂkhîb ǃnâ, îb Elob Israeli diba sa ǀgores, hîas goro ǀgoresa ǁnâu-am si.

¹⁸Os ge ǁîsa ge mî: Sa ǃgāta a ta ǀkhomma hō re sa mûǁae! Nētis ge tarasa ǁîs di daoba ge ǃgû; tsîs ge ge ǂû, tsî ais âs ge ǃaruǀî, aibes ge ī i xase ge ī tama hâ i.

¹⁹Tsîn ge ǃnauǁgoaga khâi tsî ge ǀgoreǀî ǃKhūb di ais aiǃâ tsîn ge ǁkhawa oa tsî ge ǁarusī Ramas tawa. Tsî Elkanab ge ǁîb di taras Hannasa ge ǂanguǀkhā, tsî ǃKhūb ge ǁîs xa ge ǂâi.

²⁰Tsî i ge ge ī, tsēdi ge ǀoao, os ge Hannasa ǀgamǀkhā tsî ǀgôaba ge ǁora, tsîs ge ǀons âba Samuel ti ge ǂgai, ǃKhūba xu ta ge ǀgoreǁnâ, tis ra mî xui-ao.

²¹Tsî ǁnā aob Elkanab ge ommi âb hoaragab ǀkha ge ǃgûǃapa, ǃKhūbab nî mâ kurib hoab di ǁguibasa ǁguibase tsî ǁîb di mîmâisa,

²²xawe Hannas ge ǃapa tama tsîs ge aob âs ǃoa ge mî: ǀGôab ga ǀōǀōheo, o ta ge ǁîba nî sī-ū, ǃKhūb di ais aiǃâb nî ǂhaise, tsî ǁnāpab nî ǀamose hâse.

²³Ob ge Elkanab, aob âsa ǁîs ǃoa ge mî: Sa mûǁae a ǃgâi xū-e dī; hâ ǁîbas nî ǀōǀōs kōse; ab ǃKhūba ǁîb di mîsa ǀgaiǀgai re. Nētis ge tarasa hâ tsî ǁîs di ôaba ge daisi, ǁîbas ge ǀōǀōs kōse.

²⁴ǁNās khaoǃgâ, ǁîbas ge ǀōǀō, os ge ǁîba ǁîs ǀkha ge ūǃapa ǃnona ǁgōgu ǀkha tsî ǀgui efab tsampereb ǀkha tsî ǀgui ǃgapas ǂauxûib ǀkha; tsîs ge ǁîba ǃKhūb ommi ǃnâ ge ūǂgâ Silos tawa; tsî ǀgôarob ge kaise ge ǂkham i.

²⁵Tsîn ge ǀgui ǁgōba ge ǂā; nētimîn ge ǀgôaba Elib tawa ge ūsī.

²⁶Tsîs ge ge mî: Ti ǃkhūkhoetse, sa ǀoms a ûitsama ǃkhais ao ta ge tita a ǁnā tara, nēpa ge mâ ita, ǃKhūb ǃoa ta nî ǀgorese.

²⁷Nē ǀgôab ǂama ta ge gere ǀgore, tsî ǃKhūb ge ti ǀgores, ǁîb ǃoa ta ge ǀgoresa ge ǁnâu-am te.

²⁸ǁNā-amaga ta ge ǁkhāti ǃKhūba ǁkhawa go mā bi, hâb nî tsēdi hoadese; ǃKhūba xu ǀgoreǁnâhe hâb ge ǁîba. Tsî ra ge ǁnāpa ǃKhūba ge ǀgoreǀî.