Read Khoekhoegowab 1 Samueli 10 Bible Online

1 Samueli 10 - Khoekhoegowab bible

1 Samueli 10

¹ǃNubaib ge Samuela ǁnuiǁnâba ū tsî danas âb ai ǂnâǂui tsî ǁoa bi tsî ge mî: Ti i ī tama hâ, ǃKhūb go satsa aiǃgû-aose ǀumi-amǃnâs âb ǂama ǂkhauǀkhā ǃkhaisa?

²Nētsēts ga tita xu ǃgûo, ots ge ǀgam khoekha nîra hō Raxels di ǀhobas tawa, Benjaminni ǀkharib ai Selsaxs tawa, ǁîkha ge sa ǃoa nîra mî: Eseln hîats goro ôadi ge go hōhe, tsî mû, sa îb ge eseln di ǃkhais ǀkha go ǀû, tsîb ra sakho xa ǂhansen tsî: Tare-e ta nî dī ti ôab xa? ti ra mî.

³Tsî ǁnāpa xu dāǁnâ tsîts ga aiǃâb ǃoa ǃgûo, ots ge Tabors di kai hais tawa nî sī; ǁnāpa gu ge ǃnona khoega nîra hō tsi, Elob ǃoa Bet-Els ǃoa gauga; ǀguiba ǃnona pirirona tani hâse tsî ǀguiba ǃnona perega tani hâse, tsî ǀguiba ǀgui ǃgapas ǂauxûib disa tani hâse.

⁴Tsî gu ge ǂkhaisib xa nîra dî tsi, tsî gu ge ǀgam perekha nîra mā tsi; ǁîkhats ge ǁîgu ǃomǁaeba xu nîra ū.

⁵ǁNās khaoǃgâts ge Elob di Gibeas, Filisteǁîn di toroǃûi-aogu ǁîs ai hâs tawa nîra sī; tsî i ge nîra ī, ǁnāpats ga ǃās ǃnâ sīo, ots ge kēbo-aogu di ǂnubisa nîra ǃoa, ǀgapiba xu ra ǁgôaxase, ǁîgu di aidi aiǃâ ǀōxūn, ǃkhuwuǃkhuwudi, ǂnunixūn tsî harpdi tsîna, tsî gu ge nîra kēbo.

⁶Tsî sats ge Gagab ǃKhūb dib xa nîra hāǂamhe, tsîts ge ǁîgu ǀkha nîra kēbo, tsîts ge nîra ǀkhara khoe kaihe.

⁷Tsî i ge nîra ī, nē saodi xats ga hāǂamhe ǃnubai, dī sa ǃommi ga hō xū-i hoa-e, Elob sa ǀkha hâ xuige.

⁸Sats ge ti ais aiǃâ nî ǁgôa Gilgals ǃoa, tsî mû, tita ge sa ǃoa nî ǁgôa, khauǁguibadi tsî ganganǁguibade ta nî ǁguibaga; hû tsēdets ge ǁnāpa nî ǃâu, sa tawa sī tsî ta nî tare-ets nî dī ǃkhaisa ǂanǂan tsis kōse.

⁹Tsî i ge ge ī, ǃhōb âbab ge ūnuo, Samuela xub nî ǃgûse, ob ge Eloba ǂgaob âba ǀkhara ǂgaob ǃnâ ge ǀkharaǀkhara; tsî ǁnā saodi hoadi ge ǁnā tsēs ǁkhās ai ge hā.

¹⁰Tsî Gibeas tawa kha ge sīo, mû, ob ge kēbo-aogu di ǂguiba ǁîkha ge ǃoa; tsîb ge Gagab ǃKhūb dib xa hāǂamhe tsî ǁîgu ǁaegu ge kēbo.

¹¹Tsî i ge ge ī, mâ-i hoa-i ǁîba aiga ge ǂan i-i ge mûo, ǁîb ra kēbo-aogu ǀkha kēbo ǃkhaisa, os ge ǁaesa mâ-i hoa-e ǁî-i di horesa-i ǃoa ge mî: Tare-e kha nē-e, Kisi ôab ǀkha ge ī-e? Sauli ona kha kēbo-aogu ǃnâ hâ?

¹²ǃNubaib ge ǁnāpa hâ aoba ǃeream tsî ge mî: Tariba ǁîgu di îba? ǁNā-amagas ge ǁîsa ge ǂkhoamî kai: Sauli ona kha kēbo-aogu ǃnâ hâ? ti mîsa.

¹³Tsî kēbotoab ge ǃnubaib ge ǀgapib ai ge sī.

¹⁴Ob ge Sauli di ǁnaoba ǁîb ǃoa tsî ǃgāb âb ǃoa ge mî: Mâǀî kho go ǃgû hâ i? Ob ge ǁîba ge mî: Eselna khom nî ôase, tsî mû khom geo, ǁîn a ǀkhai ǃkhaisa, o khom ge Samueli tawa ge sī.

¹⁵Ob ge Sauli di ǁnaoba ge mî: ǂAnǂan te re tare-eb Samuela go mîba kho ǃkhaisa.

¹⁶Ob ge Saula ǁnaosab âb ǃoa ge mî: ǁÎb ge ǂanǂansase ge ǂanǂan khom, eseln go hōhe ǃkhaisa. Xawe gaosis di ǃkhais, Samueli ǁîs xa goro mîsab ge ǂanǂan bi tama ge i.

¹⁷Tsî Samueli ge ǁaesa ǃKhūb ǃoa ge ǂgaiǀhû, Mispas tawa.

¹⁸Tsîb ge Israeli ôan ǃoa ge mî: Nētib ra mî ǃKhūb Israeli di Eloba: Tita ge Israela Egipteba xu ge ǂgaeǂguiǃapa, tsî tita ge sado Egipteǁîn di ǃomǁaeba xu ge ore tsî ǁnā gaosidi, sado gere ǁgâiǀādi hoade xu.

¹⁹Xawe sadu ge sadu Eloba nētsē go aoxū, sadu ǀkhomǀkhomsasigu tsî sadu ǂhâsigu hoaga xu ge ore duba, tsî du ge ǁîb ǃoa go mî: Gao-ao-e mâiba da re; î du ǁnâi ǃKhūb di ais aiǃâ mâisen sadu di ǃhaoǃnādi tsî sadu di ǀoadisin ǃoa.

²⁰Tsî Samueli ge Israeli di ǃhaodi hoade ǀgū kaio, os ge Benjaminni di ǃhaosa ge hōhe.

²¹Tsî Benjaminni di ǃhaosab ge ǃhaoǃnādi âs ǃoa hā kaio, os ge Matrib di ǃhaoǃnāsa ge hōhe, tsî Sauli, Kisi di ôab ge ge hōhe. On ge ge ôa bi, xaweb ge hōhe tama ge i.

²²On ge ǃaruǀî ǃKhūba ge dî, iseb ǁnā khoeba ǁnāpa nî sī ǃkhaisa. Ob ge ǃKhūba ge mî: Mû, ǁîb ge soadi ǃnâ go gaugausen.

²³On ge ǃkhoe tsî ǁnāpa xu ge ū bi, tsîb ge ǁîba ǁaes ǁaegu ge mâ; tsîb ge ǁaes hoas ǃgâ-ai gaxu ge i, ǃhōra âba xu ǀgapiseb ǁga.

²⁴ǃNubaib ge Samuela ǁaes hoas ǃoa ge mî: Mû du ra, tarib a ǃkhaisa, ǃKhūb ǁhûiǂuibasen hâba? ǁÎb khami īb ge ǁaes hoas ǃnâ a ǀkhai. ǃNubais ge ǁaes hoasa dâ tsî: Gao-aoba ab ûi re! ti ge mî.

²⁵Tsî Samueli ge gaosis di ǂhanuba ǃhoa tsî ǂkhani-i ǃnâ xoa bi tsî ǃKhūb di ais aiǃâ ǁî-e ge ǁgui. ǃNubaib ge Samuela ǁaes hoasa ge ǃgû kai, mâ-i hoa-e ǁî-i di oms ǃoa.

²⁶Sauli ge ǁkhāti ǁîb di oms ǃoa ge ǁaru Gibeas tawa, tsî ǂnubis xa gu ge khoega ǁîb ǀkha ge ǃgû, ǂgaob âgu Elob xa tsâǀkhāhe hâ go iga.

²⁷Xawe Beliali ôan ge: Matib nēba nî ore da? ti ge mî; tsîn ge ǁîba ge ǃharaxū, tsîn ge ǁîba ǀkhaexū-e ūhāba tama ge hâ i; xaweb ge ǁîba ǂganaǂgae hâ i khami ge ī i.