Read Khoekhoegowab 1 Samueli 11 Bible Online

1 Samueli 11 - Khoekhoegowab bible

1 Samueli 11

¹ǃNubaib ge Nahab, Amonǁîba ǃapa tsî Jabes Gileads disa ge xāǂgā. Tsî Jabes di aogu hoagu ge Nahab ǃoa ge mî: ǃGaeǀhao-e sida ǀkha dī, o da ge nî ǃoaba tsi.

²Xawe Nahab Amonǁîb ge ǁîgu ǃoa ge mî: Nē dommi ai ta ge ǃgaeǀhao-e sadu ǀkha nî dī, sadu hoado ta amǀkhāb mûsa nî ǁhoroǂui-ais ǀkha, tsî ta nî nē taotaosa ǃkhaisa Israeli hoab ai ǁguise.

³O gu ge Jabes di kaiga ǁîb ǃoa ge mî: Hû tsēde ǀûǀkhā da re, î da Israeli di ǀkharigu hoagu ǃoa sîsabega sî; tsî khoe-i hîa nî ore da-i hoa-i ga ǀkhaio, o da ge sa ǃoa nî ǂoa.

⁴Tsî sîsabegu ge Gibea-Sauls tawa sīo, o gu ge nē mîde ǁaes ǂgaedi ǃnâ ge ǃhoa. Os ge ǁaes hoaragasa ǁîs di domma ūkhâi tsî ge ā.

⁵ǁNā ǁaeb ǁkhāb aib ge Saula ǃauba xu ge hā, tsî Sauli ge: Tare-e hō hâ ǁaesa kha, os ra ā? ti ge mî. ǃNubain ge ǁîba Jabes aogu di mîde ge ǃhoaba.

⁶Ob ge Saula Gagab Elob dib xa ge hāǂamhe, nē mîdeb ge ǁnâu ǃnubai, tsî ǁaib âb ge kaise ge ǂhubi.

⁷Ob ge ǀnî gomana ū tsî ǁîna ǁhāǃā ǃâdi ǃnâ tsî ǁîde ge sî, sîsabegu di ǃomǁaeb ǀkha Israeli di ǀkharigu hoagu ǃnâ, mî raǃâ: Sauli tsî Samueli tsîkha khaoǃgâ ga aitsama ǂoa tama i-i, ǁnā-i di goman ge ǁnāti nî dī-ūhe. ǃNubaib ge ǃaob ǃKhūb diba ǁaes ai ge ǁnā, tsîn ge ǀgui khoeb ǀguib khami ge ǂoa.

⁸Tsîb ge ǁîga Beseks tawa ge ǃgôa; tsî Israeli ôan digu ge ǃnonakaidisiǀoadisise ge ī tsî Judab aogu xa ǃnonadisiǀoadisise.

⁹ǃNubain ge ǁnā sîsabegu hîa ge hāgu ǃoa ge mî: Nēti go ge Jabes Gileadi dis di aogu ǃoa nî mî: ǁAri go ge oresa nî hō, sores ra ǀgam ǁaeb ai. Tsî sîsabegu ge sī tsî Jabes di aoga ǂhôao, o gu ge ge ǃgâiaǂgao.

¹⁰O gu ge Jabes di aoga ge mî: ǁAri da ge sa ǃoa nî ǂoa, ots ge nî dī-ū da, sa mûǁae a ǃgâin hoan ǃoa.

¹¹Tsî i ge sao ra tsē ge ī Sauli ge ǁaesa ǃnona ǃâdi ǃnâ mâi ǃkhaisa; on ge ǁgoaǃûiǁaeb ai ǁgoeǃkhais ǁaegu sī tsî Amonǁîna ge ǂnau, tsēs ge ǀgams kōse; tsî i ge ge ī, ǃgau gen ge nēti ǀgaruǀgaruhe ǃkhaisa, ǀgamn ân ge hâǀhao tama a is kōse.

¹²ǃNubais ge ǁaesa Samueli ǃoa ge mî: Tariga ǁnāgu: Saula kha nî gaoǂam da? ti ge mîga. Ūhā ǁnā khoega î da ǁîga ǃgam.

¹³Xawe Sauli ge ge mî: Nētsēs ǁkhās ai i ge khoe-i xare-e ǃgamhe tide, ǃKhūb ge nētsē Israeli ǃnâ oresa go dī amaga.

¹⁴ǃAruǀîb ge Samuela ǁaes ǃoa ge mî: Hā î da Gilgals ǃoa ǃgû, î da gaosisa ǁnāpa ǀasa kai.

¹⁵ǃNubais ge ǁaes hoasa Gilgals ǃoa ǃgû tsî ǁnāpa Saula ge gao-aodī ǃKhūb di ais aiǃâ, Gilgals tawa; tsîn ge ǁnāpa ganganǁguibade ǃKhūb di ais aiǃâ ge ǁguiba, tsî Sauli ge ǁnāpa kaise ge ǃgâiaǂgao Israeli di aogu hoagu ǀkha.