Read Khoekhoegowab 1 Samueli 12 Bible Online

1 Samueli 12 - Khoekhoegowab bible

1 Samueli 12

¹ǁGoasib ge Samuela Israeli hoab ǃoa ge mî: Mû, tita ge sadu di domma ge ǁnâu, mîba te du gen hoan ǃnâ, tsî ta ge gao-aoba sadu ǂama go mâi.

²Tsî mû, ǁnāb ge gau gao-aob âdo, sadu di ais aiǃâ, tsî tita ge go kaira tsî ǀhaiadana, ti ôakha ge sadu ǀkha hâ; tsî tita ge sadu di ais aiǃâ gere ǃgû, ti ǂkhamsisa xu nētsēs kōse.

³Mû, nē ta ge a, ti ǃoagu ǃKhūb aiǃâ ǀhûǀguitimî du re tsî ǂkhauǀkhāsabeb âb aiǃâ, tari-i di gomaba ta ge ūsa, tari-i di esel-e ta ge ūsa, tari-e ta ge ǂkhôasa, tari-e ta ge ǁgâiǀāsa; tsî tari-i ǃomǁaeba xu ta ge ǀkhaexū-e ūsa; ti mûra ta nî ǁîb ǂama gaugause; o ta ge tita ǁî-e nî mādawa-am du.

⁴On ge ge mî: Sats ge ǂkhôa da tama hâ, tsî sats ge ǁgâiǀā da tama hâ, tsî sats ge khoe-i xare-i di ǃomǁaeba xu xū-e ū tama hâ.

⁵Ob ge ǁîba ǁîn ǃoa ge mî: Ab ǃKhūba ǀhûǀguitimî-aose ī sadu ǃoagu tsî ǁîb di ǂkhauǀkhāsabeba ab nētsē ǀhûǀguitimî-aose ī, ti ǃomǃnāb ǃnâ du xū-i xare-e hō tama hâ ǃkhaisa. Os ge ǁaesa: Ab ǁîba ǀhûǀguitimî-aose ī, ti ge mî.

⁶ǃAruǀîb ge Samuela ǁaes ǃoa ge mî: ǁNā ǃKhūb ge ǁîb, Moseb tsî Aronni tsîkha ge dīb tsî sadu di îga Egipteba xu ge ǂgaeǂguiǃapaba.

⁷Î du ǁnâi nēsi mâ hā, î ta sadu ǀkha ǂnoaguǂhanuǂhanu ǃKhūb di ais aiǃâ ǃKhūb ǂhanu-aisigu sadu tsî sadu îgab ge dī-ūgu hoagu xa.

⁸Jakob ge Egipteb ǃnâ sī ǃnubai gu ge sadu îga ǃKhūb ǃoa ge ǂgai; ob ge ǃKhūba Moseb tsî Aronni tsîkha ge sî, tsî ǁîkha ge sadu îga Egipteba xu ǂgaeǂguiǂui tsî ǁîga nē ǃkhais tawa ge ǁan kai.

⁹Xawe du ge ǃKhūb, ǁîgu Eloba ge ǀuru; ob ge ǁîna Siserab, toroǂamkhoeb Hasors dib di ǃomǁaeb ǃnâ tsî Filisteǁîn di ǃomǁaeb ǃnâ tsî Moabǁîn, ǁîga ge ǃkhamūn di gao-aob ǃomǁaeb ǃnâ ge ǁamaxū.

¹⁰O gu ge ǃKhūb ǃoa ǂgai tsî ge mî: Sida ge ge ǁore, ǃKhūba da ge ǁnāxū, Baalgu tsî Astaroti tsîna da gere ǃoaba xui-ao; îts ǁnâi nēsi sida khākhoen ǃomǁaeba xu tsubuǂui, o da ge satsa nî ǃoaba.

¹¹Tsî ǃKhūb ge Jerubbaala ge sî tsî Bedanna tsî Jeftaba tsî Samuela, tsî ǁîb ge sadu ǂnamipe hâ khākhoen hoan di ǃomǁaeba xu ge tsubuǂui du, sâusase du ge ǁans kōse.

¹²Tsî mû du geo, Nahab, Amonni ôan di gao-aob ra sadu ǃoagu hā ǃkhaisa, o du ge tita ǃoa ge mî: Hî-î, gao-ao-e a-i sida ǂama gao, ǃKhūb, sadu Elob a sadu di gao-ao xawe.

¹³Î du nēsi nēpa mû sadu gao-aob, ǁhûiǂuibasen du goba; tsî mû, ǃKhūb ge gao-ao-e sadu ǂama go mâi.

¹⁴ǃKhūba du ga ǃao-o tsî ǁîba du ga ǃoabao tsî dommi âba ǁnâuo, tsî ǃKhūb mîmāsa du ga mâǃoaxase ība tama io, o du ge sadu ǂûdu tsî gao-aob, sado nî gaoǂamma ǃKhūb, sadu Elob khaoǃgâ nî hâ.

¹⁵Xawe ǃKhūb domma du ga ǁnâuǀnam tama i, tsî du ga ǃKhūb mîmāsa mâǃoao, ob ge ǃKhūb di ǃomma sadu ǃoagu nîra hâ, sadu îgu ǃoagub ge hâ i xase.

¹⁶Î du ǁnâi nēsi ǀkhī î du kō ǁnā kai ǃkhais, ǃKhūb sadu di mûdi aiǃâ nî dīsa.

¹⁷Nētsēsa ǃhoroǃgaos di tsē tamasa? Tita ge ǃKhūb ǃoa nî ǂgai, ob ge ǁîba ǃgurub tsî ǀapib tsîkha nîra mā; ǁnâi ǂan î du mû, sadu di ǂkhabab a kai ǃkhaisa, ǃKhūb mûǁae du go dība, gao-ao-e du go ǂganbasens ǀkha.

¹⁸Tsî Samueli ge ǃKhūba ǂgaiǀîo, ob ge ǃKhūba ǁnā tsēs ǁkhās ai ǃgurub tsî ǀapib tsîkha ge mā; ǁnā-amagas ge ǁaesa ǃKhūba kaise ge ǃao tsî Samueli ona.

¹⁹Os ge ǁaes hoaragasa Samueli ǃoa ge mî: ǃKhūb sa Elob ǃoa sa ǃgāda ǀgoreba re, î da tā ǁō, ti; sida di ǁoregu hoagu ǂamai da ge nē ǂkhababa ge dīǀaro, gao-ao-e da ge ǂganbasen xui-ao.

²⁰Ob ge Samuela ǁaes ǃoa ge mî: Tā ǃao, nē ǂkhabab hoaba du ge dī, xawe tā ǂgō ǃKhūba xu, î du ǃKhūba ǃoaba sadu di ǂgaob hoab ǀkha.

²¹Î du tā ǂgō; î du ǁau xūga tā saoǃgon, xū-e harebe tamaga tsî ore ǁoaga, ǁau xūgu a amaga.

²²ǃKhūb ge ǁaes âba ǁnāxū tide xui-ao ǁîb di kai ǀons ǃaroma; ǃKhūba i ge ǃgâiba i xui-ao, sadob nî ǁîb di ǁaese dībasen ǃkhaisa.

²³Tsî tita xasa, a-i tātsē tā īǀkhā te, ǃKhūb ǃoagu ta nî ǁore ǃkhaisa, sado ǀgorebas ǀkha ta nî ǀû ǃkhaisa; xawe ta ge ǃgâi tsî ǂhanu daoba sado nî ǁkhāǁkhā.

²⁴Nēs ǀguisa dī, î du ǃKhūba ǃao, î du ǁîba îǂhôase ǃoaba sadu ǂgaob hoab ǀkha; î du kō, matikō kai xūnab ge ǁîba sadu tawa dī ǃkhaisa.

²⁵Xawe ǃaruǀî du ga ǂkhabadīo, o du ge sadu tsî sadu di gao-aob ona nîra hîkākāhe.