Read Khoekhoegowab 1 Samueli 13 Bible Online

1 Samueli 13 - Khoekhoegowab bible

1 Samueli 13

¹Tsî Sauli ge ǀgui kurib kōse gao-ao io, tsî ǀgamǁî kuribab ge Israeli ǂama gaosîsen

²ǃnubaib ge Saula Israela xu ǃnonaǀoadisi khoega ge ǁhûiǂuibasen, tsî ǀgamǀoadisigu ge Sauli ǀkha ge hâ i, Mixmas tawa tsî Bet-Els di ǃhommi ai, tsî ǀguiǀoadisigu ge Jonatanni ǀkha ge hâ i, Gibea-Benjamins tawa; tsî naugu ǁaes digab ge ge ǃgû kai, mâb hoaba tentoms âb ǃoa.

³Tsî Jonatanni ge toroǂnubis Filisteǁîn dis, Gebas tawa hâsa ge ǂnau, tsî Filisteǁîn ge ǁî ǃkhaisa ge ǁnâu. ǁNā-amagab ge Saula ǃhūb hoaragab ǃnâ xâiǁnâsa xâi tsî: An Hebreǁîna ǁnâu, ti ge mî.

⁴Ob ge Israeli hoaragaba ge ǁnâu mîn rasa: Sauli ge Filisteǁîn di toroǂnubisa go ǂnau; tsî Israeli ge ǁkhāti ǀō hâ xūse ge ī Filisteǁîn tawa. ǁGoasis ge ǁaesa Sauli khaoǃgâ ge ǂgaiǀhûhe Gilgals ǁga.

⁵Tsî Filisteǁîgu ge Israela gu nî ǃkhamūse ge ǀhû, ǃnonadisiǀoadisi kunidi tsî ǃnaniǀoadisi ǃgapi-aogu tsîna, tsî ǁaes ge hurib amǃgâ ǁgoe ǀgopab kōse ge ǂgui i; tsî gu ge ǃapa tsî ge ǁgoe Mixmas tawa Bet-Avensa xu aiǂoasǀî.

⁶Tsî Israeli aogu ge mûo, ǂōǂōsib ǃnân hâ ǃkhaisa, ǀhûn ra xui-ao, os ge ǁaesa ǁhoagu ǃnâ ge gaugausen tsî ǁkhūhaidi, ǃhaogu, ǁaposa hâǃkhaidi tsî tsaudi ǃnâ.

⁷Tsî Hebreǁîn ge Jordanna-ū Gadi tsî Gileadi ǃhūb ǃoa ge ǃgâu. Tsî Sauli gorose Gilgals tawa hâ hîas ge ǁaes hoasa ǀkhū rase ǁîb khaoǃgâ ge hā.

⁸Tsîb ge hû tsēdi kōse ge ǀhape ǁnā ǁaeb, Samueli xa ge mîmâiheb kōse. Tsî Samueli ge Gilgals tawa hā tama io, os ge ǁaesa ǁîba xu ge ǀgaru.

⁹ǃNubaib ge Saula ge mî: Khauǁguibadi tsî ganganǁguibade ūhāba te. Ob ge khauǁguibade ge ǁguiba.

¹⁰Tsî i ge ge ī, khauǁguibasab ge ǁguibatoao, mû, ob ge Samuela ge hā; ob ge Saula ǁîba ge ǃgûǃoa, ǁîbab nî tawedega.

¹¹ǃNubaib ge Samuela ge mî: Tare xū-ets go dī? Ob ge Saula ge mî: ǁAes ra tita xu ǀgaru, tsî sats, mîmâisa ǁaeb tsēdi dib ai hā tama hâ, tsî Filisteǁîn ge Mixmas tawa ǀhû hâ ǃkhaisa ta go mûo,

¹²o ta ge go mî: Nēsin ge Filisteǁîna ti tawa nî ǁgôaxa, Gilgals tawa tsî tita ge ǃKhūb di aisa ǁkhōsase ǀgoreǀî tama hâ; o ta ge ǁî-aitsama ǁgarisen tsî khauǁguibade goro ǁguiba.

¹³ǃNubaib ge Samuela Sauli ǃoa ge mî: Gâresets goro dī, ǃKhūb, sa Elob di mîmās, ǁîb ge mîmā tsisats go sâu tama i xui-ao; nēsib ge ǃKhūba Israeli ǂamats ūhâ gaosis âtsa ga ǁapoǁapo hâ ǀamos kōse.

¹⁴Xawe nēsis ge gaosis âtsa ǁapoǁapohe tide. ǃKhūb ge ao-e go ôabasen ǁîb di ǂgaob ǃoa, tsî ǃKhūb ge ǁîba go mîmā, ǁîb di ǁaes ǂamab nî aiǃgû-ao ǃkhaisa, sats go ǃKhūb go mîmā tsina ǃkhōǀgaipe tama i amaga.

¹⁵ǁGoasib ge Samuela khâi tsî Gilgalsa xu Gibea-Benjamins ǃoa ge ǃapa; tsî Sauli ge ǁaes, ǁîb tawa ge hōhesa ge ǃgôa, ǃnanikaidisi nî ī khoega.

¹⁶Tsî Sauli tsî ǁîb ôab, Jonatanni tsî ǁaes, ǁîb tawa ge hōhes ge Geba-Benjamins tawa ge hâ; xawe Filisteǁîn ge Mixmas tawa ge ǁgoe i.

¹⁷Tsî hîǀhuru-aogu ge Filisteǁîn di ǂnubisa xu ge ǂoa, ǃnona ǂguigu ǃnâ: ǀGui ǂguib ge Ofras ǃoa gau daobǀî ge oa, Sualǃhūb ǁga;

¹⁸tsî ǀgui ǂguib ge Bet-Horons ǃoa gau daobǀî ge ǂoa; tsî ǀgui ǂguib ge ǀkharib, ǃgoaǃnāb Seboims dib, ǃgaroǃhūb ǃoa ra ǂuibǀî ge ǂoa.

¹⁹Tsî ǀuriǂnau-ao-i xare-i ge Israeli ǃhūb hoaragab ǃnâ hōhe tama ge hâ i; Filisteǁîn ge: În Hebreǁîna gôab tsî ǁhâigôab tsîkha tā dībasen, ti mî xui-ao.

²⁰ǁNā-amagab ge Israeli hoaba Filisteǁîn ǃoa ge ǁgôa, mâ-i hoa-i nî ǁî-i ǃhūǃgaoxūs kas, ǁî-i di ǃkhāxūs kas, ǁî-i di ǃōs kas, ǁî-i di ǁhāxūs kas hoasa ǀāǀābahese.

²¹Tsîn ge ǁgûxa ǀāǀāxūna ǁhāxūdi ân tsî ǃkhāxūdi âna ge ūba hâ i, tsî ǃnonaǁgûxa ferkhegu ǃaroma, ǃōdi ǃaroma tsî ǃkhari-ūxūde nî dī-unuse.

²²Tsî i ge ǃkhammi di tsēs ai ge ī, gôab xareb tsî ǁhâigôab xareb ǁaes, Sauli tsî Jonatanni tsîkha tawa hâs di ǃomǁaeb ǃnâ hōhe tama hâ ge isa; xawe Sauli tawa tsî ǁîb di ôab Jonatanni tawa kha ge ge hōhe.

²³Tsî Filisteǁîn di ǂnubis ge Mixmas di ǂōdaos ǃoa ge doe.