Read Khoekhoegowab 1 Samueli 14 Bible Online

1 Samueli 14 - Khoekhoegowab bible

1 Samueli 14

¹Tsî i ge ǀguitsē ge ī, Jonatanni, Sauli ôab ǁnā ǀgôab, ǁîb di ǀāxūna ra tanib ǃoa ge mîsa: Hā î khom Filisteǁîn di toroǂnubis ǃoa ǃgâu, nau ǃnani hâsa. Xaweb ge ǁîsa ǁgûba ǂanǂan tama ge hâ i.

²Tsî Sauli ge Gibeas di ǀkhâuǀams tawa granathais, Migrons tawa hâs ǃgao ge ǁgoe; tsî ǁaes, ǁîb ǀkha hâs ge ǁaupe ǃnanikaidisi khoega ge i.

³Tsî Ahiab, Ahitub ôab, Ikabodi di ǃgâsab, Pinehab ôab, Elib ôab ge ge ǃKhūb di prister i Silos tawa, efoba ǂgaeǂgā hâse; xawe ǁaes ge ǀū ge i, Jonatanni go bē ǃkhaisa.

⁴Tsî i ge ǂō daodi, Jonatanni ge ǁîde-ū Filisteǁîn di toroǂnubis ǃoa ǃgûǃganutsâdi ǁaegu, ǃhaob di ǀāba nē ǀkhāb ai tsî ǃhaob di ǀāba nau ǀkhāb ai ge hâ i; tsî ǀguis ge Boses tsî naus ge Sene ti ge ǀon hâ i.

⁵ǀGuib ge ǀapasǀî ge ǁgoe i Mixmas ǃoa-ai tsî nauba ǃkhawagasǀî Gebas ǃoa-ai.

⁶Ob ge Jonatanna ǁnā ǀgôab ǀāxūn âba ra tanib ǃoa ge mî: Hā î khom nē ǃgaohe tama hân di toroǂnubis ǃoa ǃgâu; ǀnîsib ge ǃKhūba nî sîsenba da, ǃKhūb tawa i ǂhani-e a ǀkhai, ǂguin ǀkhas kas, ǀororon ǀkhas kas hoasab nî ore ǃkhaisa xui-ao.

⁷ǃNubaib ge ǀāxūn tani-aob âba ǁîb ǃoa ge mî: Sa ǂgaob ǃnâ hân hoana dī re; ǂnan, mû, tita ge nî hâǀkhā tsi, sa ǂgaob ī khami.

⁸Ob ge Jonatanna ge mî: Kō, ǃgâu khom ge nî ǁnā aogu ǃoa, tsî khom ge nî ǁîgu tawa ǂhaiǂhaisen.

⁹Mî gu kao sakhom ǃoa: ǃNōsase mâ, sakho tawa ge nî sīs kōse, o khom ge hâ khom a ǃkhais ai nî mâ tsî ǁîgu tawa ǃapasī tide.

¹⁰Xawe nēti gu ga mîo: ǃApahā kho re sige ǃoa, o khom ge nî ǃapasī, ǃKhūb ge ǁîga sakhom ǃomǁae go mā xui-ao; tsî nēs ge sakhoma saose nî ība.

¹¹Tsî ǁî ǀgamkha ge Filisteǁîn di toroǂnubis tawa ǂhaiǂhaiseno, o gu ge Filisteǁîga ge mî: Mû, Hebreǁîgu ge ǁnā āgu, ǁîgu ǃnâ gu go gaugausen hâ iga xu go ǂoaxa.

¹²ǃAruǀî gu ge toroǂnubis di aoga Jonatanni tsî ǀāxūn tani-aob âb tsîkha ǃeream tsî: Sige ǃoa ǂoaxa kho, î ge xū-e ǁkhāǁkhā kho, ti ge mî. Ob ge Jonatanna ǀāxūn tani-aob âb ǃoa: Ti khaoǃgâ ǃapa, ǃKhūb ge ǁîga Israeli ǃomǁae go mā xuige, ti ge mî.

¹³ǃNubaib ge Jonatanna ǃomkha âb ai tsî ǂaira âb ai ge ǃapa, tsî ǀāxūn tani-aob âba ǁîb khaoǃgâ; o gu ge Jonatanni di ais aiǃâ ge ǁnā, tsî ǀāxūn tani-aob âb ge ǁîga ǁîb khaoǃgâ ge ǃgam.

¹⁴Tsî nē ǂguro ǂnaub, ǁîb ǀkhab ge Jonatanna ǀāxūn tani-aob âb ǀkha ǀgamdisi nî i aoga ǂnaub ge ǃhūǃâs di ǃkhareb, ǀgui ǃnaob di gomakha ǃhūǃgao ǁkhāb ai ge ī.

¹⁵Tsî i ge ǀkhū-e ge hā ǂnubis ǃnâ, ǃaub ai tsî ǁaes hoas ǃnâ; toroǂnubis digu tsî hîǀhuru-aogu tsîgu ge ǁkhāti ge ǀkhū; ā, ǃhūb ge ge gongonǃnâhe, Elob di ǀkhū i ge i amaga.

¹⁶Tsî Sauli di ǃûi-aogu Gibeas, Benjaminni dis digu ge kō tsî mûo, ǂguib ra tsuni tsî ǃgûǃā tsî ǂnauhe ǃkhaisa;

¹⁷ob ge Saula ǁaes, ǁîb ǀkha hâs ǃoa ge mî: ǃGôatsâ î go mû, tarib âge bē hâ ǃkhaisa. O gu ge ǃgôa tsî ge mû, Jonatanni tsî ǀāxūn tani-aob âb tsîkha a ǀkhai ǃkhaisa.

¹⁸ǁGoasib ge Saula Ahiab ǃoa: Elob di ǂgaesa ūhā, ti ge mî; Elob di ǂgaes ge ǁnātsē Israeli ôan tawa hâ i xui-ao.

¹⁹Tsî i ge ge ī, Sauli ganupe pristeri ǀkha ra ǃhoa hîab ge ǂkhupib, Filisteǁîn di ǁgoeǃkhais ǃnâ hâba ǃaruǀîǀgui kai tsî ǂgui ǃkhaisa; ob ge Saula pristeri ǃoa: Sa ǃomma ǂgaedawa! ti ge mî.

²⁰Ob ge Sauli tsî ǁaes ǁîb ǀkha hâs hoasa ge ǂgaiǀhû, tsî gu ge ǃkhammi tawa ge sī, tsî mû, gôab nēb dib ge naub ǃoagu ge hâ i, tsî ǂkhupib ge kaise ge kai.

²¹Tsî gu ge ǁkhāti Hebreǁîga Filisteǁîgu ǀkha ge hâ i, huga i ge ī i khami, ǁîgu ǀkha ǁgoeǃkhais ǃoa ǁgoeǂnami hâ ǃkhaide xu ge ǃapa hâ iga; ǁîgu on ge Israelǁîgu, Sauli tsî Jonatanni tsîkha tawa hâga ge ǁaeǁaesen.

²²Tsî Israeli di aogu, Efraimmi ǃhommi ai ge gaugausengu hoagu ge ǁnâuo, Filisteǁîgu go ǁhâ ǃkhaisa, o gu ge ǁîga ǁkhāti ge ǃgôaǃgon, ǃkhammi ǃnâ.

²³Nētib ge ǃKhūba ǁnātsē Israela ge ore; tsî ǁgoeǃkhais digu ge Bet-Avens ǃoa ge doe.

²⁴Tsî Israeli aogu ge ǁnātsē ge tsau; Sauli ge ǁaesa nūba tsî ge mî: Ab ǁnā khoeba ǀâxarexuhe, ǃuis kōse ga ǂû-i xa ǂûba, ti khoegu tawa ta nî ǀkhaobasens kōse. ǁNā-amagas ge ǁaes hoasa ǂû-i xa tsâtsâ tama ge i.

²⁵Tsî ǂnubis ge ǀgomhaixa ǃkhais ǃnâ ge sī; tsî ǁnāpa i ge dani-e ge hâ i ǃaub ai.

²⁶Tsî ǁaes ge ǀgomhaixaǃkhais ǃnâ sīo, mû, ob ge daniba gere dâu; xawe khoeb xareb ge ǃommi âb ǀkha ǁîb di amsa tsâǀkhā tama ge i, ǁaes nūsa ge ǃao xui-ao.

²⁷Xawe Jonatanni ge ǁnâu tama ge i, matib ge ǁgûba ǁaesa nūba ǃkhaisa; ob ge hais, ǁîb ǃomǁae hâs di ǀamsa ǀhōǂui tsî ǁîsa danib ǃnâ ge ǃkhāǂgā; tsî ǃommi âbab ge ǁîb di ams ǃoa unuo, o ra ge ǁîb di mûra ge ǃnâ.

²⁸ǃNubaib ge ǀguib ǁaes diba ǃeream tsî ge mî: Sa îb ge ǁaesa ǁkhōse nūba tsî go mî: Ab ǀâxarexuhe hâ ǁnā khoeb, nētsē pere-i xa ga ǂûba. ǁNā-amagas ge ǁaesa go tsau.

²⁹ǃNubaib ge Jonatanna ge mî: Ti îb ge ǃhūba go gongonǃnâ; kō re ti mûra, mati ra go ǃnâ ǃkhaisa, ǂkharirose ta nē danib xa go tsâtsâ xui-ao.

³⁰Matikō ǃnā hâse i ga ī hâ i, ǁaes ga nētsē ǃnorasase ǂû kaihe hâ io, khākhoen âs di ǁkhâuǁnâxūn hîan go hōn xa; xawe nēsib ge ǂnaub Filisteǁîn diba kai tama go i.

³¹Tsîn ge ǁnātsē, Filisteǁîna ge ǂnau Mixmasa xu Ajalons kōse; os ge ǁaesa kaise ge tsau.

³²ǃNubais ge ǁaesa ǁkhâuǁnâxūnǀî ge ǂnan, tsîn ge gūn tsî goman tsî tsâun tsîn xa ū tsî ǁîna ǃhūb ai ge ǂā, tsî ǁaes ge ǁîna ǀaob ǀkha ge ǂû.

³³On ge ǁîsa Saula ǂhôa tsî ge mî: Mû, ǁaes ra ǃKhūb ǃoagu ǁore, ǀaob ǀkhan ra ǂûs ǀkha. Ob ge ǁîba ge mî: Sadu ge îǂhôaoǃnâse go sîsen; kai ǀui-e nētsē tita ǃoa gabahā.

³⁴ǃAruǀîb ge Saula ge mî: ǁAes ǃnâ ǀgaru î go ǁîna ǃoa mî: Ūhāba te mâ-i hoa-e ǁî-i di gomaba tsî mâ-i hoa-e ǁî-i di gūba, î du ǁîba nēpa ǂā, î du ǂû î du ǃKhūb ǃoagu tā ǁore, ǀaob ǀkha ǁîba ǂûs ǀkha. Os ge ǁaes hoasa mâ-i hoa-e ǁî-i di gomaba ǁî-i di ǃommi ǂûb ǀkha tsuxuba ūsī tsî ǁnāpa ge ǂā.

³⁵ǁGoasib ge Saula ǃKhūba altarsa ge ǂnubiba; nēs ge ǂguro altars, ǃKhūbab ge ǂnubibasa.

³⁶ǁNās khaoǃgâb ge Saula ge mî: A ge Filisteǁîna ǃgôaǃgon tsuxuba, î ge ǁîna ǀâǀhana, ǁgoas nî ǁgoas kōse, î ge ǁîgu di ǀgui aob xaweba tā ǃgau. O gu ge ǁîga: Sa mûǁae a ǃgâin hoana dī! ti ge mî, xawe pristeri ge: A ge nēpa Elob ǃoa ǀgū, ti ge mî.

³⁷ǃNubaib ge Saula Eloba ge dî: Saoǁgôa ta nî Filisteǁîna? Israeli ǃomǁae māts nî ǁîga? Xawe ǁîb ge ǁîba ǁnātsē ǃeream tama ge i.

³⁸ǃNubaib ge Saula ge mî: Hā nēpa, ǁaes di kaigo hoago, î go ǁnâuǃā tsî mû, mâsa xu-i nē ǁore-ai-e nētsē ī hâ ǃkhaisa.

³⁹ǃKhūb Israela ra oreb a ûitsama ǃkhais ao: Ti ôab Jonatanni ai i ga ī xaweb ge nîra ǁō. Tsî khoe-i xare-i ge ǁaesa xu ǃeream bi tama ge hâ i.

⁴⁰ǃAruǀîb ge Israeli hoaragab ǃoa ge mî: Sadu ge ǀgui ǀkhāb ai nî hâ tsî tita tsî ti ôab Jonatanni tsîkhom ge nau ǀkhāb ai nî hâ. ǁGoasis ge ǁaesa Sauli ǃoa: Sa mûǁae a ǃgâi-e dī, ti ge mî.

⁴¹Ob ge Saula ǃKhūb, Israeli Elob ǃoa ge mî: ǀHapio khoeba ǁgau, ti. ǃNubai kha ge Jonatanni tsî Sauli tsîkha ge hōhe tsî ǁaes ge ge ǃnora.

⁴²ǁGoasib ge Saula: ǀKhūsa ao, tita tsî ti ôab Jonatanni tsîkhom ǁaegu! ti ge mî. Ob ge Jonatanna ge hōhe.

⁴³Ob ge Saula Jonatanni ǃoa ge mî: ǂAnǂan te re tare xū-ets go dī ǃkhaisa. ǃNubaib ge Jonatanna ǂanǂan bi tsî ge mî: Tita ge ǂkharirose danib xa go tsâtsâ ǀkharus, ti ǃomǁae hâs di ǀams ǀkha: Mû, nē ta a, ǁō ta ge nî.

⁴⁴Ob ge Saula ge mî: Nēti ab Eloba dī-ū te, îb nēti dīǀaro te, Jonatantse, sats ge nî ǁō.

⁴⁵Xawe ǁaes ge Sauli ǃoa ge mî: Jonatanna kha nî ǁō, ǁîb nētikō kai oresa Israeli ǃnâ go dība? Tātsē ī tide ǃkhais; ǃKhūb a ûitsama ǃkhais ao, ǀgui ǀûb ǁîb danas dib xareb ge ǃhūb ai ǁnā tide! Elob ǀkhab ge ǁîsa nētsē go dī xui-ao. Nētis ge ǁaesa Jonatanna ge ore, ǁōb tidega.

⁴⁶Tsî Sauli ge Filisteǁîn khaoǃgâba xu ge hāǃapa, tsî Filisteǁîn ge ǁîn di ǃkhais ǃoa ge ǃgû.

⁴⁷Tsî Sauli ge gaosisa ge sîsenūtsoatsoa Israeli ǂama; tsîb ge ǁîs ǂnamipe hâ khākhoen âb hoana ge ǃkhamū, Moab ǃoagu, Amonni ôan ǃoagu, Edommi ǃoagu, Sobas di gao-aogu ǃoagu, Filisteǁîn ǃoagu tsî mâ ǃkhai-i, unusenǀîb ra-i hoa-eb ge gere ǁkhara.

⁴⁸Tsîb ge ǃgari-aose gere sîsen, tsîb ge Amalekǁîna ge ǂnau, tsîb ge Israela ge ore, ǁîba ra ǁnāǂamn hoan di ǃomǁaeba xu.

⁴⁹Tsî Sauli di ôagu ge Jonatanni, Jisvib tsî Malkisuab tsîga ge i; tsî ǀonra ǁîb di ǀgam ǀgôara dira ge nēra ge i: ǂGuroǃnaesabes dis ge Merab tsî ǂkhams dis ge Mixal ge i.

⁵⁰Tsî Sauli taras di ǀons ge Ahinoam ge i, Ahimaab di ôasa; tsî toroǂamkhoeb âb ǀons ge ge Abner i, Neri, Sauli ǁnaob ôaba.

⁵¹Tsî Kisi ge Sauli di î ge i, tsî Neri, Abneri îb ge Abieli di ôa ge i.

⁵²Tsî ǃgom toro-i ge Filisteǁîn ǃoagu hâ ge i Sauli di tsēdi hoadi kōse; ǁnā-amagab ge Saula mâ ǁē-aob hoab tsî mâ ǃgari-aob, hîab ge mûba ǁîb tawa ge ǀhaoǀhao.