Read Khoekhoegowab 1 Samueli 15 Bible Online

1 Samueli 15 - Khoekhoegowab bible

1 Samueli 15

¹ǃNubaib ge Samuela Sauli ǃoa ge mî: ǃKhūb ge tita ge sî, gao-aose ta satsa ǁaes âb ǂama, Israels ǂama nî ǂkhauǀkhāse, îts ǁnâi nēsi ǁnâu dommi ǃKhūb di mîdi diba.

²Nētib ra mî ǃKhūb ǂnubidi diba: Tita ge go ôaǃnâ Amaleki ge Israela dī-ū ǃkhai-i xa, matib ge ǁîba daob ai mâǃoa ǃkhaisa, Egipteba xub ge doeǂoa ǃnubai.

³ǃGû ǁnâi satsa îts Amaleka sī ǂnau, îts ūb hân hoana ǀâxare, îts tā ǁîba sâu, îts ǃgam aoba xu taras kōse, ǀgôana xu dai ran kōse, gomana xu gūn kōse, ǃnaina xu eseln kōse.

⁴Ob ge Saula ǁîsa ǁaesa ge ǂhôa, tsîb ge ǁîga ge ǃgôa Telaims tawa, ǀgamkaidisiǀoadisi ǀnūǃgû raga tsî disiǀoadisi aogu Judab diga.

⁵Tsî Sauli ge Amaleki ǃās kōse sīo, ob ge ǃgâǃhabi-aoga ge ǁgui ǃgoaǃnāb ǃnâ.

⁶Tsî Sauli ge Keniǁîna ge mîba kai: ǃGûbē, ǂgō, î du Amalekǁîna xu doebē, î ta sado tā ǁîn ǀkha hîkākā; sadu ge Israeli ôan hoan tawa ǀkhomxaǂgaosiba ge dī, Egipteba xun ge ǂoaxa ǃnubai. Nētin ge Keniǁîna Amalekǁîna xu ge ǂgō.

⁷ǃNubaib ge Saula Amalekǁîna ge ǂnau Havilasa xu, Surs tawats ra sīs kōse, Egipteb aiǃâ ǁgoesa,

⁸tsî Agagi, Amalekǁîn di gao-aoba ûitsamase ge ǃkhō; xawe ǁaes hoasab ge gôab di ǀāb ǀkha ge ǃgam.

⁹Xawe Sauli tsî ǁaes hoas ge Agaga ge sâu tsî hoan ǂamai ǃgâi gūn, goman, ǁîn ǃnaga a ǃgâin tsî ǁkhaon tsî hoan xa ǃgâin hoana; tsîn ge ǁîna ǀâxare ǂgao tama ge i, xawe mâ xū-i, ǃharaxūsase tsî xū tamase ī-i hoa-e, ǁî-en ge ge ǀâxare.

¹⁰ǃNubais ge ǃKhūb mîsa Samuela ge hāba, mî raǃâ:

¹¹ǃHausen ta ge tita hâ, Saula ta ge gao-aodī ǃkhaisa, ti khaoǃgâba xub ge oa, tsî ti mîdeb ge ǁapoǁapo tama i amaga. Ob ge Samuela tsûaǂgao tsî tsuxub hoaba ǃKhūb ǃoa gere ǂgai.

¹²ǁNās khaoǃgâb ge Samuela ǃnauǁgoaga ge khâi, Saulab nî ǃoaga; tsî Samueli ge ge ǂhôahe: Sauli ge Karmels tawa ge sī, ti tsî mû, ǂkhâǃnâhai-eb ge go ǂnûikhâibasen; ǁnās khaoǃgâb ge oa tsî ǃkharu tsî Gilgals ǃoa sī ge ǁgôa.

¹³Ob ge Samuela Sauli tawa ge sī, tsî Sauli ge ǁîb ǃoa ge mî: Îts ǃKhūba ǀkhaebahe! Tita ge ǃKhūb mîsa go ǁapoǁapo.

¹⁴ǁGoasib ge Samuela ge mî: Tsî tare dom-i gūn di-e kha nē ǁnâu ta ra-e tsî dom-i goman di-i hîa ta ra ǁnâu-e?

¹⁵Ob ge Saula ge mî: Amalekǁîna xun ge ǁîna go ūhā, ǁaes ge hoan xa ǃgâi gūn tsî goman tsîna go sâu xui-ao, ǃKhūb, sa Eloban nî ǁîna ǁguibase; xawe nauna da ge go ǀâxare.

¹⁶ǁGoasib ge Samuela Sauli ǃoa ge mî: ǀÛ î ta ǂanǂan tsi, ǃKhūb nē tsuxub ǃnâ tita ǃoa go ǃhoa ǃkhaisa. Ob ge: ǃHoa re, ti ge mî.

¹⁷Ob ge Samuela ge mî: Ama tama-e, sa mûǁaets a ǂkhari hîats ge Israeli ǃhaodi di dana kai ǃkhaisa, tsî ǃKhūb ge satsa Israeli ǂama gao-aose ǂkhauǀkhā ǃkhaisa?

¹⁸Tsî ǃKhūb ge daob ai sî tsi tsî ge mî: ǃGû îts ǁnā ǁore-aon, Amalekǁîna, ǀâxare, îts ǁîna ǃkhamū, ǁînats nî hîkākās kōse.

¹⁹Tarexats kha ǁnâi ǃKhūb di domma ǁnâu tama i tsî go ǁkhana ǁkhâuǁnâsǀî, tsî ǃKhūb mûǁae a ǂkhabana go dī?

²⁰ǃNubaib ge Saula Samueli ǃoa ge mî: Tita kom ǃKhūb di domma ǁnâu tsî go ǃgûo, ǁnā daob, ǃKhūb ge sî teb aio; tsî ta kom Agagi, Amalekǁîn di gao-aoba go ūhāo tsî Amalekǁîna go ǀâxareo;

²¹xawe ǁaes kom ǁkhâuǁnâs xa go ūo gūn tsî goman tsî ǀâxarehesan di ǃgâin xa, ǃKhūb, sa Eloban nî ǁîna ǁguibaga, Gilgals tawa.

²²Ob ge Samuela ge mî: ǃGâibaheb a ǁnâi ǃKhūba, khauǁguibadi tsî ǂāǁguibadi xa, ǃKhūb domma ǁnâuǀnams ǃgâ-ai? Mû, ǁnâuǀnams ge khauǁguibas ǃgâ-ai a ǃgâi, tsî ǃgaoǃgâsa bairagu di kaub ǃgâ-ai.

²³Mâǃoaxasib ge a ǃgaidīs di ǁore, tsî ǃnâudanaxasib ge a ǁgôa-eloǃoaba tsî īguǃoaba xui-ao. ǃKhūb di mîsats go aoxū, amagab ge ǁîba aoxū tsi hâ, gao-aots tidese.

²⁴ǃNubaib ge Saula Samueli ǃoa ge mî: Tita ge go ǁore, ǃKhūb di mîmās tsî sa mîde ta go ǃûǂam ǃkhais ǀkha, ǁaesa ǃao tsî dommi âna go ǁnâuǀnam xui-ao.

²⁵Nēsi ǁnâi ti ǁoreba ǀûba te re îts tita ǀkha oa re, î ta ǃKhūba ǀgoreǀî re.

²⁶Xawe Samueli ge Sauli ǃoa ge mî: Tita ge sats ǀkha oa tide; ǃKhūb di mîsats go aoxū amagab ge ǃKhūba satsa aoxū hâ, gao-aots tidese Israels ǂama.

²⁷Tsî Samueli ge unuseno, ǃgûbēb nîga, ob ge Saula anaǂamxūb âb di ǀamsa ge ǃkhō, tsîs ge ge ǀkhauǁnâsen.

²⁸ǃNubaib ge Samuela ǁîb ǃoa ge mî: ǃKhūb ge nētsē Israeli di gaosisa satsa xu go ǀkhauǁnâ tsî sa ǀgūkhoeb, sats xa a ǃgâiba go mā.

²⁹ǁKhātib ge ǁîb hîa Israeli di Danaoba ǂhumi tama hâ, tsîb ge ǃhausen tama hâ, khoe tamab a amaga, xū-i ǂama nî ǃhausenna.

³⁰Ob ge ge mî: Tita ge go ǁore; îts ǁnâi ǃgôa te re ti ǁaes di kaigu aiǃâ tsî Israeli aiǃâ îts tita ǀkha oa re, ǃKhūb, sa Eloba ta nî ǀgoreǀîse.

³¹ǁGoasib ge Samuela ge oa Sauli khaoǃgâ, tsî Sauli ge ǃKhūba ge ǀgoreǀî.

³²ǃNubaib ge Samuela ge mî: Agagi, Amalekǁîn di gao-aoba nēpa ūhāba te. Ob ge Agaga ǁkhoaǂgaose ǁîb ǃoa ge ǃgû; tsî Agagi ge ge mî: Amase, ǁōb di ausib ge go bē.

³³Xawe Samueli ge ge mî: Sa gôab ge tarade ǀgôao kais ǁkhās xases ge sa îsa nî ǀgôao, taradi ǃnâ. ǃNubaib ge Samuela Agaga ǃâdi ǃnâ ge ǁhāǃā ǃKhūb di ais aiǃâ Gilgals tawa.

³⁴ǁNās khaoǃgâb ge Samuela Ramas ǃoa ge ǃgû, tsî Sauli ge ommi âb ǃoa ge ǁaruǃapa Gibea-Sauls ǁga.

³⁵Tsî Samueli ge Saula ǃaruǀî mû tama ge i ǁōb âb di tsēs kōse, xaweb ge Samuela Sauli ǂama ǃoaba ge ūhâ i; tsî ǃKhūb ge ge ǃhausen, Saulab ge Israeli ǂama gao-aodī ǃkhaisa.