Read Khoekhoegowab 1 Samueli 16 Bible Online

1 Samueli 16 - Khoekhoegowab bible

1 Samueli 16

¹ǃNubaib ge ǃKhūba Samueli ǃoa ge mî: Mâ ǁaeb kōsets kha Saula nî ǃoaba, tita ge aoxūba, Israeli ǂamab gao-ao tidega? Sa ǁnâba ǀoaǀoa olib ǀkha îts ǃgû. Tita ge nîra sî tsi Isaib, Betlehemǁîb ǃoa, tita ge gao-ao-e go mûǂuibasen ǁîb di ôagu ǃnâ.

²Ob ge Samuela ge mî: Mati ta kha nî ǃgû? Sauli ge ǁîsa ǁnâu tsî nî ǃgam te. Ob ge ǃKhūba ge mî: Tsâu-e ūǃgû goman xa îts mî: Tita ge go hā, ǁguiba-e ta nî ǃKhūba ǁguibase.

³Tsîts ge Isaiba ǁguibas ǃoa nî ǁkhau o ta ge tita nî ǂanǂan tsi, tare xū-ets nî dī ǃkhaisa ots ge ǁnāb tita nî mîba tsiba gao-aose tita nî ǂkhauǀkhāba.

⁴Ob ge Samuela ǃKhūb ge ǃhoana dī tsî Betlehems tawa ge sī. ǃNubai gu ge ǃās di aoga ǀkhū rase ǁîba ǃoa tsî ge mî: ǂKhîs a sa hāsa?

⁵Ob ge ǁîba: ǂKhî a, ti ge mî. Tita ge go hā, ǃKhūba ta nî ǁguiba-e ǁguibaga. Khaisen î go tita ǀkha ǁguibas tawa hā. Tsîb ge Isaib tsî ǁîb di ôaga ge khai, tsîb ge ǁîga ǁguibas ǃoa ge ǁkhau.

⁶Tsî i ge ge ī, ǂgâxa gu ra hîab ge Eliaba kō tsî: Amase, ǁîb ge a ǃKhūb di, ǁîb di ǂkhauǀkhāsabe, ti ge ǂâi.

⁷Xawe ǃKhūb ge Samueli ǃoa ge mî: Tā īsib âba kōǀî tsî gaxub soros âb diba, tita ge ǁîba aoxū hâ xuige. Khoe-i ra mû khami ī tama ǃkhais ge; khoe-i ge mûdi aiǃâ hâna ra kōǀî, xawe ǃKhūb ra ǂgaoba kōǀî xui-ao.

⁸ǃNubaib ge Isaiba Abinadaba ǂgai tsî ǁîba Samuela ge ǃgû-īǀkhā kai. Xaweb ge: ǁÎbab ge ǃKhūba ǁkhāti ǁhûiǂuibasen tama hâ, ti ge mî.

⁹Ob ge Isaiba Simeaba ge ǃgû-īǀkhā kai, xaweb ge: ǁÎbab ge ǃKhūba ǁkhāti ǁhûiǂuibasen tama hâ, ti ge mî.

¹⁰Nētib ge Isaiba hû ǀgôagu âba Samueli ais aiǃâ ge ǃgû-ī kai; xawe Samueli ge Isaib ǃoa: ǃKhūb ge ǁîga ǁhûiǂuibasen tama hâ, ti ge mî.

¹¹ǁGoasib ge Samuela Isaib ǃoa ge mî: ǀGôagu hoaga kha nēga? Ob ge: ǂKhammi ge ganupe ǃgau hâ, tsî mû, ǁîb ra gūna ǃûi, ti ge mî. Ob ge Samuela Isaib ǃoa ge mî: Sî îts ūhā kai bi, ǂnûǁae ge tide, ǁîb nî hās kōse xuige.

¹²Ob ge sî tsî ǁîba ge ūǂgâxa; tsîb ge ǀapaǃnâ ge i, îsa mûra â-ib, tsî îsa soros â-iba; ob ge ǃKhūba ge mî: Khâi îts ǂkhauǀkhā bi, nēb ge a ǁî xuige.

¹³Ob ge Samuela oli-i ǁnâba ū tsî Daviba ǃgâsagu ǁaegu ge ǂkhauǀkhā. Ob ge Daviba ǁnā tsēsa xu tsî ǃaruǀî ǃKhūb di Gagab xa ge hāǂamhe. ǁNās khaoǃgâb ge Samuela khâi tsî Ramas ǃoa ge ǃgû.

¹⁴Tsî ǃKhūb di Gagab ge Saula xu ge ǂgō; tsî ǂkhaba gaga-i, ǃKhūba xu ge hā-i ge ǁîba gere ǃhuriǃhuri.

¹⁵O gu ge Sauli di ǃgāga ǁîb ǃoa ge mî: Kō, ǂkhaba gaga-i Elob di-i ge satsa ra ǃhuriǃhuri-e.

¹⁶Îts sida ǀhonkhoetsa sa ǃgāda, sa ais aiǃâ mâda mîba re, î da ao-i harpsa ra ǀkhō-e ôa, o i ge nî ī, ǂkhaba gagas Elob dis ga sa ai hâo, tsî ǁîb ga ǃommi ǀkha ǀkhō-o, ots ge nî ǃgâi.

¹⁷ǃNubaib ge Saula ǃgāgu âb ǃoa ge mî: Kōba te re aob, ǃgâise a ǀkhō ǁkhāba î du ǁîba tita tawa ūhā.

¹⁸ǃNubaib ge ǃgāgu di ǀguiba ǃeream tsî ge mî: Mû, tita ge Isaib, Betlehemǁîb di ôaba ge mû, ǀkhō ǁkhāba, tsîb ge a ǃgari ǁē-ao tsî a toro-ao tsî a ǁnâuǃāxa xūn ǃnâ tsî a îsa khoe, tsî ǃKhūb ge ǁîb ǀkha hâ.

¹⁹Ob ge Saula sîsabega ge sî Isaib ǃoa tsî ge mî: Sa ôab Davib, gūn tawa hâba tita ǃoa sî re.

²⁰ǁGoasib ge Isaiba esela ge ū pereb ǀkha tsî ǁhōba ǂauxûib ǀkha tsî piriro-e, tsîb ge ǁî xūna ǁîb ôab Davib ǀkha Sauli ǃoa ge sî.

²¹Nētib ge Daviba Sauli tawa hā tsî ais âb aiǃâ ge mâ; tsîb ge ǁîba kaise ge ǀnam, tsîb ge ge ǁîb di ǀāxūn tani-ao kai.

²²ǁNās khaoǃgâb ge Saula Isaib ǃoa sî tsî ge mîba kai bi: Ab Daviba ti ais aiǃâ mâhâhâ, ǀkhommab ti mûǁae go hō xuige.

²³Tsî i ge ge ī, Elob di gagas xab Saula ge hāǂamheo, ob ge Daviba harpsa ū tsî ǃommi âb ǀkha gere ǀkhō; os ge Sauli di ǀomsa sâ tsî ǃgâise gere tsâ, tsî ǂkhaba gagas ge ǁîba xu gere ǂgō.