Read Khoekhoegowab 1 Samueli 18 Bible Online

1 Samueli 18 - Khoekhoegowab bible

1 Samueli 18

¹Tsî i ge ge ī, Sauli ǀkhab ge ǃhoatoao, os ge Jonatanni di ǀomsa Davib di ǀoms ǀkha ge ǃgaeǁaesen; ob ge Jonatanna ǁîb di ǀoms ǂhanis khami ge ǀnam bi.

²Ob ge Saula ǁnā tsēs ǁkhās ai ge ū bi, tsîb ge ǁgûb oms ǃoa ǁarusa mā-am bi tama ge hâ i.

³Tsî kha ge Jonatanni tsî Davib tsîkha ǃgaeǀhao-e ge dī, ǁîb di ǀoms ǂûs khamib ge ǀnam bi hâ i amaga.

⁴Ob ge Jonatanna anaǂamsarab âb, anab hâba, ǂgaeǂui tsî Daviba ge mā bi tsî nau saran âb ona, ā, gôab âb kōse tsî khās âb kōse tsî ǃgaesenni âb kōse.

⁵Tsî Davib ge Sauli ge sî bi ǃkhai-i hoa-i ǃoa gere ǃgûǂoa; tsî ǂanǃgâsenxaseb ge gere tanisen, xui-aob ge Saula toro-aogu ǂama ge mâi bi, tsîb ge ǁaes hoas mûǁae ǃgâi ge i tsî ǁkhāti Sauli di ǃgāgu mûǁae.

⁶Tsî i ge ge ī, hā gu geo tsî Davib ge Filisteǁîn ǂnausa xu oao, o di ge tarade Israeli ǃādi hoade xu ge ǂoa ǁnaetsanas tsî ǂnās tsîra ǀkha, Saula di nî ǃgûǃoase, tromeldi tsî dâb ǀkha tsî ǀkhōxūn tsîn ǀkha.

⁷Tsî taradi ge ǀkhō rase ǃereamgu tsî ge mî: Sauli ge ǀoadisigu âba go ǂnau, xawe Davib ge disiǀoadisigu âba go ǂnau.

⁸Ob ge Saula ge ǁaixa, tsî nē mîs ge ǁîb mûǁae tsū ge i, tsîb ge ge mî: Daviba di ge disiǀoadisiga go mā, xawe tita di ge ǀoadisigu ǀguiga go mā; tsî amase, gaosis ge ǁkhāti nîra ǁîb di kai.

⁹Ob ge Saula Daviba mûs ǃnâ ge ūhâ i, ǁnā tsēsa xu tsî aiǃâb ǃoa.

¹⁰Tsî i ge sao ra tsē ge ī, ǂkhaba gagas xab ra Saula Eloba xu hāǂamhe ǃkhaisa, ob ge ommi di ǁaegub ǃnâ ge ǂkhupi, tsî Davib ge ǃommi âb ǀkha ǁapaxa xūsa gere ǀhuru, tsēkorobeb ra dī khami; tsî ǁhâigôab ge Sauli ǃomǁae ge hâ i.

¹¹Ob ge Saula ǁhâigôaba ǁhâi tsî: Î ta Daviba ǂnubiǂgoab tawa ǁhâiǁapo, ti ge mî. Xawe Davib ge ǀgam ǃnāra kōse ais âba xu ge ǂgō.

¹²Tsî Sauli ge Daviba ge ǃao, ǃKhūb ǁîb ǀkha hâ xui-ao, tsî Saula xub ge ǁîba ge ǂgō hâ i.

¹³ǁNā-amagab ge Saula ǁîba xu dībē tsî ǀoadisigu di ǂamkhoese ge ǂnûi bi; tsîb ge ǁaes di ais aiǃâ ǂoa tsî gere ǂgâ.

¹⁴Tsî Davib ge ǂanǃgâsenxase gere tanisen ǁîb di daogu hoagu ai; tsî ǃKhūb ge ǁîb ǀkha ge hâ i.

¹⁵Tsî Sauli ge mûo, kaise ǂanǃgâsenxaseb ra tanisen ǃkhaisa, ob ge ais âba ge sau.

¹⁶Xawe Israeli tsî Judab hoab ge Daviba ge ǀnam i, ǁîn di ais aiǃâb ra ǂoa tsî ǂgâ xui-ao.

¹⁷ǁNā-amagab ge Saula Davib ǃoa ge mî: Kō, ti ôas kais, Merabsa ta ge satsa tarase nî mā, îts ǁnâi ǃgariǀgôase ība te, îts ǃKhūb di toroga ǃkham, Sauli ge: Ab ti ǃomma tā ǁîb ǃoagu hâ; îb Filisteǁîn di ǃomma ǁîb ǃoagu hâ! ti mî xui-ao.

¹⁸Xawe Davib ge Sauli ǃoa ge mî: Tari ta tita tsî tareba ti ûiba tsî ti îb ommi dina Israeli ǃnâ, o ta nî gao-aob di ǀuiǀgôa kai?

¹⁹Tsî i ge ge ī, ǁnā ǁaeb, Merabs, Sauli di ôas, ǁîb ai Daviba ge māhes ais ge ǁîsa Adrieli, Meholaǁîba tarase māhe ǃkhaisa.

²⁰Tsî Mixals, Sauli di ôas, ge Daviba ge ǁâ; tsî Sauli ge ǂanǂanheo, os ge ǁî ǃkhaisa ǂhanu ge i ǁîb mûǁae.

²¹Ob ge Saula ge mî: Tita ge ǁîsa nî mā bi, ǁnoa kaiba bis nîga, îb Filisteǁîn di ǃomma ǁîb ǃoagu hâ. ǁNā-amagab ge Saula Davib ǃoa: Naus ǀkhats ge nētsē nî ti ǀuiǀgôa kai, ti ge mî.

²²Tsî Sauli ge ǁîb di ǃgāga ge mîmā: Davib ǀkha ǂganǃgâsase ǃhoa î go mî: Kō, gao-aob ge sats xa a ǃgâibahe, tsî ǁîb di ǃgāgu hoagu ge satsa ǀnam, xuige ǁnâi gao-aob di ǀuiǀgôa kai re.

²³O gu ge Sauli di ǃgāga nē mîde Davib ǂgaera ǃnâ ge ǃhoa. ǃNubaib ge Daviba ge mî: Supu ǃkhaisa kha sago mûǁae, gao-aob di ǀuiǀgôa kaisa? ǀGâsa tsî ǃharaxūhesa khoeta kom titao!

²⁴O gu ge Sauli di ǃgāga ǁîsa ǁîba mîba tsî: Nēti ī mîdeb ge Daviba go ǃhoa, ti ge mî.

²⁵ǁGoasib ge Saula ge mî: Nēti go ge Daviba nî mîba: Gao-aob ge ǃkhoeǂgâsabeǁui-e ǂgao tama hâ, tsîb ge Filisteǁîgu di ǀguikaidisi aikhōga ǂgao hâ, gao-aob di khākhoen nî ǀkhaohese. Sauli ge Davibab nî Filisteǁîgu di ǃomma xu ǁnā kai ti ge ǂâi xui-ao.

²⁶O gu ge ǃgāgu âba nē mîde Daviba ge ǂanǂan. Tsîs ge ǁî ǃkhais gao-aob di ǀuiǀgôa kaib nîsa Davib mûǁae ǂhanu ge i; xawe tsēdi ge ganupe ǀoa tama ge hâ i.

²⁷ǃNubaib ge Daviba ge khâi, tsîb ge ǁîb tsî aogu âba ǃgû tsî Filisteǁîgu ǃnâ ǀgamkaidisi khoega ge ǂnau; tsî Davib ge ǁîgu di aikhōga ge ūhā, tsî gu ge gao-aoba ǀoa hâse ge ǁgui-aiǃâhe, gao-aob di ǀuiǀgôa kaib nîga. ǃNubaib ge Saula ǁîb di ôas Mixalsa tarase ge mā bi.

²⁸Tsî Sauli ge mû tsî ge ǂanǃā, ǃKhūb Davib ǀkha hâsa; tsî Mixals, Sauli di ôas ge ǁîba ge ǁâ hâ i.

²⁹ǁGoasib ge Saula ǃaruǀîǀgui Daviba ge ǃao. Tsî Sauli ge Daviba khākhoese ge ība, ǁîb di tsēdi hoadi kōse.

³⁰Tsî Filisteǁî gaosagu gere ǂnoaǂuio, o i ge ǂoagu ge ǃādi hoadi ai ge ī, Davib ge Sauli ǃgāgu hoagu ǃgâ-ai gā-ai isa, ǀons âb ge kaise ǃgôahes kōse.