Read Khoekhoegowab 1 Samueli 19 Bible Online

1 Samueli 19 - Khoekhoegowab bible

1 Samueli 19

¹ǁNā-amagab ge Saula ǁîb ôab, Jonatanni ǃoa tsî ǁîb ǃgāgu hoagu ǃoa ge ǃhoa, Davibab nî ǃgam ti, xawe Jonatanni, Sauli ôab ge Davib xa kaise ge ǃgâibahe.

²Ob ge Jonatanna Daviba ǂhôa tsî ge mî: Ti îb ge satsa ra ǃgam ǂgao. Îts ǁnâi ǁgoas ai ǂanbasen îts ǂgânǃgâs ǃnâ hâ îts gaugausen.

³O ta ge tita ǂoa tsî nî ǃaub ǃnâ ti îb xōǀkhā sats nî hâ ǃkhais ai mâ, tsî ta ge sats xa ti îb ǀkha nî ǃhoa, tsî ta ge nî mû, mâ xū-i ǃaromas a ǃkhaisa, tsî ta ge ǁîsa nîra ǂhôa tsi.

⁴Nētib ge Jonatanna Davib xa ǃgâina ge ǃhoa ǁîb îb Sauli ǀkha; tsîb ge ǁîb ǃoa ge mî: Îts gao-aotsa sa ǃgāb Davib ǃoagu tā ǁore, sa ǃoagub ǁore tama hâ tsî ǁîb di dīgu sa aiǃâ kaise a ǃgâi amaga.

⁵ǁÎb ge ǀoms âba ǁîb ǃomǁae ū tsî Filisteǁîba ge ǂnau, tsî ǃKhūb ge kai ǃgâiǃgâ-e Israeli hoaba ge dī-ū, sats ge ǁîsa mû tsî ge ǃgâiaǂgao; tarexats kha ǁnâi ǀhapio ǀaob ǃoagu nî ǁore Daviba ǀhapiose ǃgams ǀkha?

⁶Ob ge Saula Jonatanni di domma ge ǁnâuǀnam; tsî Sauli ge ge nū ǃKhūb a ûitsama ǃkhais aob ge ǃgamhe tide, ti.

⁷Ob ge Jonatanna Daviba ge ǂgai; tsî Jonatanni ge ǁîba nē mîdi hoade ge ǂanǂan. Tsî Jonatanni ge Daviba Sauli ǃoa ge ūsī, ob ge ǁîb di ais aiǃâ ge hâ, ǁari tsî aetsēs khami.

⁸Tsî torob ge ǁkhawa ge hâ. Ob ge Daviba ǂoa tsî Filisteǁîga ge ǃkhamū, tsîb ge ǁîga kai ǂnau-i ǀkha ge ǂnau, tsî gu ge ais âb aiǃâ ge ǁhâ.

⁹Ob ge Saula ǂkhaba gagas ǃKhūb dis xa ǁkhawa ge hāǂamhe, tsîb ge oms âb ǃnâ ge ǂnôa i tsî ǁhâigôab âb ge ǁîb ǃomǁae ge hâ i, tsî Davib ge ǁapaxa xūba ge ǂnau.

¹⁰Ob ge Saula ge ôa-am, Davibab nî ǁhâigôab âb ǀkha ǂnubiǂgoab tawa ǁhâiǁapose, xawe ǁîb ge Sauli di ais aiǃâba xu ge ǂgō, ob ge ǁhâigôaba ǂnubiǂgoab ǃnâ ge ǂgâ. ǁGoasib ge Daviba ǁhâ tsî ǁnā tsuxub ǁkhāb ǃnâ ge ûi.

¹¹Ob ge Saula sîsabega ge sî Davib ommi ǃoa, ǃûi bi gu nîse tsî ǁgoas ai gu nî ǃgam bise. ǁÎsas ge Mixals, ǁîb di tarasa Daviba ǂanǂan tsî ge mî: Sa ǀomsats ga nē tsuxub ǃnâ ǃûi tama io, ots ge ǁari nî ǃgamhe.

¹²Tsî Mixals ge Daviba mûǂuidaosa-ū ge ǁgôa kai; ob ge ǃgû tsî ǃhū tsî ge ûi.

¹³Tsî Mixals ge ī-e ū tsî ǁî-e kharob ǃnâ ge ǁgui, tsîs ge pirikhō-e ǂkhapidanas â-i ai ǁgui tsî sara-i ǀkha ǁî-e ge ǃgū-ai.

¹⁴Tsî Sauli ge sîsabega sîo, Daviba gu nî ūse, os ge ǁîsa: ǁÎb ge ǀaesen hâ, ti ge mî.

¹⁵ǃNubaib ge Saula sîsabega ge sî, Daviba gu nî kōse, mî rase: Kharob ai ǁîba ūǂoaxa tita ǃoa, îb ǃgamhe.

¹⁶Tsî sîsabegu ge sīo, mû, o i ge ī-e kharob ǃnâ hâ tsî pirikhō-i ge ǂkhapidanas â-i ai ge hâ i.

¹⁷ǃNubaib ge Saula Mixals ǃoa ge mî: Tare xū-i ǃaromas kha ǁnāti go gā te tsî ti khākhoeba go ǃgû kai, ob go ûi? Os ge Mixalsa Sauli ǃoa ge mî: ǁÎb ge tita ǁga: A ta ǃgû tare xū-i ǃaroma ta nî ǃgam si? ti ge mî.

¹⁸Nētib ge Daviba ǃhū tsî ge ûi, tsîb ge Samueli ǁga Ramas tawa ge sī, tsîb ge ǁîba Sauli ge dī-ū bin hoana ge ǂanǂan. Tsî ǁîb tsî Samueli tsîkha ge ǃgû tsî Najots tawa ge hâ.

¹⁹Tsîn ge Saula ǂhôa tsî: Mû, Davib ge Najots tawa hâ, Ramas ǀgūse, ti ge mî.

²⁰ǁGoasib ge Saula sîsabega ge sîsī, Daviba gu nî ūhāse; ǁîgu ge ǀhûs kēbo-aogu, hîa ra kēbogu disa ge mû tsî Samuela ǁîgu ǂama ǂnûihe hâǃâ ǁnāpa mâse; o gu ge Sauli sîsabega Elob Gagab xa ge hāǂamhe, tsî gu ge ǁkhāti ge kēbo.

²¹Tsî Sauli ge ǂhôaheo, ob ge ǀnî sîsabega ge sî, tsî ǁîgu on ge ge kēbo; ǃnubaib ge Saula ǃnonaǁî sîsabega ge sî, tsî ǁîgu on ge ge kēbo.

²²ǁNās khaoǃgâb ge ǁkhāti ǁî-aitsama Ramas ǃoa ge ǁgôa, tsîb ge ǁnā kai tsaus, Sexus tawa ge sī, tsîb ge dî tsî: Mapa kha hâ Samueli tsî Davib tsîkha? ti ge mî. ǃNubaib ge: Mû, ǁîkha ge Najots, Ramas ǀgūse ǁgoes tawa hâ, ti ge mîbahe.

²³Ob ge ǁnāǀî Najots, Ramas ǀgūse ǁgoes ǃoa ge ǃgû; tsî ǁnā Gagab ǁkhāb ge ǁkhāti ǁîb ai hā, ob ge ǃgûgauǃâ ge kēbo, Najots, Ramas ǀgūse ǁgoes tawab ge sīs kōse.

²⁴Tsîb ge ǁkhāti saran âba ge ǂgaeǂui, tsîb ge ǁkhāti ge kēbo Samueli di ais aiǃâ, tsîb ge ǀōǀkhā hâse ge ǁgoe ǁnā tsēs hoasa tsî ǁnā tsuxub hoaba. ǁNā-amagan ge: Sauli ona kha kēbo-aogu ǁaegu hâ? ti ge mî.