Read Khoekhoegowab 1 Samueli 2 Bible Online

1 Samueli 2 - Khoekhoegowab bible

1 Samueli 2

¹ǃNubais ge Hannasa ǀgore tsî ge mî: Ti ǂgaob ge ǃKhūb ǃnâ ra dâ; ti ǁnâb ge ǃKhūb ǃnâ ǀgapiǀgapihe hâ; harases ge khowahe hâ ti amsa ti khākhoen ǂama; sa ǃgâiǃōb ǃnâ ta ra dâ xui-ao.

²ǀNîb ge ǃanu tama hâ, ǃKhūb ǀguib; ǀnîb ge hâ tama hâ, sats ǀguits, tsî ǀnîb ge ǃhaose ī tama hâ sida Elob khami.

³Tā nētikōse kaise ǀgapise ǃhoa; î-i tā karosa xū-e sa amsa xu ǂoa; ǃKhūb ge a ǂandi di Elo, tsî dīgu âb ge ǂhanuse dīhe hâ.

⁴Khās ǀgaisagu dis ge khôahe hâ; tsî ǃnôa gen, ǁîn ge ǀgaib ǀkha ǃgaesen hâ.

⁵ǁÂ ge hâ in ge pereb ǃaroma gere ǃgaesen, tsî ǃâ ge hâ in ge ti ī tama hâ; ǁora tamas ge hûna ge ǁora tsî ǀgôaxa ge is ge ǀgaioǃnâ.

⁶ǃKhūb ra ǃgam tsî ra ûi-ûi; ǁîb ra ǀamoǀaeb ǃoa ǁgôa kai tsî ǁnāpa xu ǂoaxa kai.

⁷ǃKhūb ra ǀgâ kai tsî ǃkhū kai; ǁîb ra ǃgamǃgam tsî ǁkhāti ǀgapiǀgapi.

⁸ǁÎb ra ǂkhariba ǃkhōkhâi tsaraba xu, tsî ǂgoaba xub ra ǂhâ hâba ǀgapiǀgapi, gaosagu ǀkhab nî ǂnû kai bise tsî ǂnû-aiǃnaos ǃgôasib disab nî ǀumi kai bise; ǃgaoǃgaodi ǃhūbaib didi ge a ǃKhūb di, ǁîb ge ǃhūbaiba ǁîdi ai ǂnûi xui-ao.

⁹ǁÎb ge ǀkhomsaben âb di ǂaide nîra sâu, xawe eloxoresan ge ǃkhaenab ǃnâ nîra kā; ǀgaiba xu tamas ge aore khoeb a ǁkhāsa xui-ao.

¹⁰ǃKhūb ǀkha ra ǂnoagub, ǁîb ge nîra ǂkhūǂkhūhe; ǁîb ge ǁîn ǂama ǀhomma xu nîra ǃguru: ǃKhūb ge ǃhūbaib di ǀkhâuǀamde nîra ǂhanuǂhanu tsî gao-aob âba ǀgaiba nîra mā tsî ǂkhauǀkhāsabeb âb ǁnâba nîra ǀgapiǀgapi.

¹¹ǁNās khaoǃgâb ge Elkanaba Ramas ǃoa ge ǁaru oms âb ǃoa; xawe ǀgôab ge ǃKhūba gere ǃoaba prister Elib di ais aiǃâ.

¹²Tsî Elib di ôakha ge ǁgauoǃnâ ǀgôa ge i; ǁîkha ge ǃKhūba ǂan tama ge hâ i.

¹³Tsî dommi ǁnā pristerkha dib ge ǁaes ǃoa nēti ge ī i: Khoe-i ga ǁguiba-e ǁguibao, ob ge pristeri di ǃgāba ǁgan-i ra sâihe hîa ǃnonaǁgûxa ǃkhāxū-e ǃomǁae ūhâse gere hā.

¹⁴Tsîb ge kastrols ǃnâs kas, ketels ǃnâs kas, amǃnâǃores ǃnâs kas, sūs ǃnâs kas hoasa gere ǃkhāǂgā; ǃkhāxūb ra ǂoaxa-ū-i hoa-i, ǁnā-eb ge pristera gere ūbasen. ǁNāti kha ge Israelǁîn, Silos tawa ge sīn hoan tawa gere dī.

¹⁵Tsî kauban ra ǂhubis aiǃâb ge ǁkhāti pristeri di ǃgāba hā tsî ǁnā aob, hîa ra ǁguibab ǃoa ge mî: ǁGan-i xa mā, î-i pristera ambahe; sâihe hâ ǁgan-eb ge satsa xu ū tide tsî ora-i ǀgui-e nî ū.

¹⁶Tsî ǁnā aob ga ǁîb ǃoa: Kauban ge nētsē hoaragase nî ǂhubi, îts ǁnâi ūbasen, sa ǀoms ra tura khami, ti a mîo, ob ge ǁîb ǃoa gere mî: Hî-î, xawets ge nēsi ǁî-e nî mā, tsî ǁnā tamas ka io, o ta ge ǀgaib ǀkha ǁî-e nî ū.

¹⁷Nētib ge ǁoreb ǁnā ǂkham khoekha diba kaise ge kai i ǃKhūb di ais aiǃâ; khoen ge ǃKhūb di ǂûǁguibasa ǃharaxū xui-ao.

¹⁸Tsî Samueli ge ǃKhūb di ais aiǃâ gere ǃoaba, ǂkham khoese, linesarab ǁkhaib diba ǃgaesen hâǃâ.

¹⁹Tsî ǁgûs ge ǂkhari ǂamsararo-e ge dība bi, tsîs ge kurikorobe ǁîba gere ūhāba bi, aob âs ǀkhas gere hāo, kurikorobe ǁguibasa nî ǁguibase.

²⁰Tsî Elib ge Elkanab tsî ǁîb di taras tsîra ǀkhae tsî ge mî: Ab ǃKhūba suriba mā tsi nē tarasa xu ǁnā ǀgores hîas ge ǃKhūba xu ǀgoreǁnâs di amǃnâs ai. Tsî ra ge ǁîra di ǃkhais ǃoa ge ǁaru.

²¹Tsî ǃKhūb ge Hannasa ge sari, os ge ǀgamǀkhā tsî ǃnona ǀgôagu tsî ǀgam ǀgôara tsîna ge ǁora; tsî ǀgôab Samueli ge ǃKhūb tawa ge kai.

²²Tsî Elib ge kaise ge kaira; tsîb ge ǀgôakha âb ra Israeli tawa dīn hoana ge ǁnâu, tsî mati kha ge ǁnā taradi, tentoms ǀhûs dis di dao-ams tawa ra ǀhûdi ǀkha ǁom ǃkhaisa.

²³Ob ge ǁîkha ǃoa ge mî: Tare xū-i ǃaroma kho kha nēn hoana ra dī? O ta kha tita nē ǂkhabadīǃkhaidi, sakho didi hoade ra ǁnâu nē ǁaes hoasa xu?

²⁴Tā dī, ti ôakho, ǃgâi tama gommi ge nēb, hîa ta ra ǁnâuba; sakho ge ǁîkho, ǃKhūb di ǁaesa ra ǃûǂam kaikho.

²⁵Khoe-i ga khoe-e ǁore-ūo, o gu ge eloga ǁî-e ra ǀgoraǃgâ; xawe khoe-i ga ǃKhūb ǃoagu ǁoreo, tari-e nî ǁî-e ǀgoreba? Xawe kha ge ǁgûb di domma ǁnâuǀnam tama ge i, ǃKhūb ge ǁîkha ǃgam ǂgao hâ i xui-ao.

²⁶Tsî ǀgôab Samueli ge ǃaruǀîǀgui kai tsî ge ǀnamǀnamsa, ǃKhūb tawas kas, khoen tawas kas hoasa.

²⁷Tsî i ge Elob ao-e Elib tawa hā tsî ǁîb ǃoa ge mî: Nētib ra ǃKhūba mî: Tita ǃgāsase ǂhaiǂhaisen tama ta hâ sa îb di ommi tawa, Egipteb ǃnân hâ hîa Faraob di ommi ǃnâ?

²⁸Tsî tita ge ǁîba Israeli di ǃhaodi hoade xu pristerse ge ǁhûiǂuibasen, ti altars aib nî ǁguibaga, ǀanǀanxūnab nî ǂhubiga, efobab nî ti ais aiǃâ anaga; tsî ta ge sa îb di omma Israeli di ǀaeǁguibadi hoade ge mā.

²⁹Tarexa go kha ra ǃharaxūmûdi ǀkha kō ti ǂāǁguibasǀî tsî ti ǂûǁguibasǀî, ommi ǃnâ ta ge mîmāse; tsî tarexats kha satsa ǀgôakha âtsa tita xa ra ǃgôa, o go ge ra kaukaisen, ti ǁaes Israels di ǂûǁguibadi di ǂguron ǀkha?

³⁰ǁNā-amagab ge ǃKhūb, Israeli di Eloba ra mî: Tita ge ǃgāsase ge mî: Sa ommi tsî sa îb di ommi ge ti ais aiǃâ nî ǃgû ǀamosib kōse. Xawe nēsib ra ǃKhūba ǃhoa: ǁÎsa as tita xu ǃnū! Tita ra ǃgôan, ǁîna ta ge tita nîra ǃgôa, xawe tita ra ǃharaxūn, ǁîn ge supuse nîra ūhâhe.

³¹Mû, tsēdi ge nîra hā, o ta ge tita sa ǁôaba nîra ǁhāǁnâ, tsî sa îb ommi di ǁôaba, kaira ao-i xare-i sa ommi ǃnâ hâ tides kōse.

³²Tsî sats ge ǂōǂōsib Elob ǁanǃkhais diba nîra ǃgapalî ǁnā ǃgâib, Israelab ga dī-ū hâb hoab di amǃnâs ai; tsî kaira ao-i ge ǁnātsē tātsē sa ommi ǃnâ hâ tide.

³³Tsî ǁnā aob, sab hîa ta sa altarsa xu ǃgaoǁnâ tideb, ǁîb ge nî hâ, sa mûrab nî hapuga, tsî sa ǂgaobab nî ǃoa kaiga; tsî sa ommi di ǂguib hoab ge nîra ǁō, ao kai gu kas khaoǃgâ.

³⁴Tsî nēs ge saose nîra ība tsi, sa ǀgam ǀgôakha Hofnib tsî Pinehab tsîkha ai nîra hāsa: ǀGui tsēs ǁkhās ai kha ge hoakha nîra ǁō.

³⁵Tsî tita ge îǂhôa pristera nî ǂkhaiǂkhaibasen, ǁîb ge ti ǂgaob ǃnâ tsî ti ǀoms ǃnâ i ī khami nîra dī; ǁîba ta ge tita hâhâ ra omma nîra ǂnubiba, tsî ǁîb ge hugaǀgui ti ǂkhauǀkhāsabeb di ais aiǃâ nîra ǃgû.

³⁶Tsî i ge nîra ī, mâ-i hoa-i, sa ommi din xa ga ǃgau-i hā tsî nî ǁîb aiǃâ ǃhonǁgoa ǃkhaisa, mariro-i ǂama tsî pereǃâro-i ǂama tsî nî mî: ǂNûiǂgā te re mâ pristersi ǃoaba-i hoa-i ǃnâ, î ta pereǃâro-e ǂû re.