Read Khoekhoegowab 1 Samueli 20 Bible Online

1 Samueli 20 - Khoekhoegowab bible

1 Samueli 20

¹ǃNubaib ge Daviba Najots, Ramas ǀgūse ǁgoesa xu ǁhâ tsî hā tsî Jonatanni di ais aiǃâ ge mî: Tare-e ta dī hâ tsî mâsa ti dīsāsa, sa îb di ais aiǃâ, ob ra ti ûiba ôa?

²Ob ge ǁîba ge mîǀî bi: Tātsē ī tide ǃkhais, sats ge ǁō tide. Kō, ti îb ge kai ǃkhai-i kas, ǂkhari ǃkhairo-i kas hoasa dī tama hâ, titab ga aibe ǁî-e ǂhaiǂhaiba tama io; tare xū-i ǃaromab kha ti îba nē ǃkhaisa tita xu nî gaugau; ti ī tama ǃkhais.

³ǃNubaib ge Daviba ǃaruǀî nū tsî ge mî: Sa îb ge îsase a ǂan, ǀkhomma ta ge sa mûǁae a hō ǃkhaisa; ǁnā-amagab ge: Ab Jonatanna ǁîsa tā ǂan, îb tā ǂhansen, ti ge mî; xawe amase, ǃKhūb a ûitsama ǃkhais ao tsî sa ǀoms a ûitsama ǃkhais ao: ǁAupe ǀgui dāǃharos ǀguis ge hâ, tita tsî ǁōb tsîkhom ǁaegu.

⁴Ob ge Jonatanna Davib ǃoa ge mî: Sa ǀoms ra mî xū-i, ǁî-e ta ge nî dība tsi.

⁵Ob ge Daviba Jonatanni ǃoa ge mî: Mû, ǁarib ge a ǂkham ǁkhâ, o ta ge ǂanǂansase gao-aob ǀkha ǂnû tsî nî ǂû; ǁnâi xū te re, î ta ǃnonaǁî ǃuis kōse ǃgarob ai gaugausen.

⁶Tsî sa îb ga amase ǁkhui teo, ots ge nî mî: Davib ge kaise go ǀkhoma te, Betlehems, ǁîb di ǃās ǃoab ga ǃkhoe ti, ǁnāpas ge kurikorobe ǁguibas ǃhaos hoas disa nîra hâ xui-ao.

⁷O mîb kao ǁîs a ǃgâi ti, o ta ge sa ǃgāta a ǂkhî; xawe ǁaixaǃarib kao, ǁnâi ǂan, ǂkhabab ǁîb tawa ǂâibasenǁapoǁapohe hâ ǃkhaisa.

⁸Dī ǁnâi ǀkhomxaǂgaosiba sa ǃgāta tawa, ǃKhūb di ǃgaeǀhao-i ǃnâts ge sa ǃgāta sats ǀkha ge ūǂgâxa xuige; xawe dīsādi ga ti ǃnâ hâo, satsa ǁnâi ǃgam te re, tarexats kha ǁnâi sa îb ǃoa nî ūsī te?

⁹ǃNubaib ge Jonatanna ge mî: Tātsē sa ǀkha ī tide ǃkhais, xawe amase ta ga hōǃâo, nē ǂkhabab ti îb tawa ǂâibasenǁapoǁapohe hâ ǃkhaisa, ǁîb xats nî hāǂamhe ǃkhaisa, o ǁnâi ǁî ǃkhaisa ǂanǂan tsi ta tide?

¹⁰Ob ge Daviba Jonatanni ǃoa ge mî: Tari-e nî ǂanǂan te, sa îb ga satsa karosa xū-e ǃereamo?

¹¹ǁGoasib ge Jonatanna Davib ǃoa: Hā î khom ǃaub ǃoa ǂoa! ti ge mî; o kha ge ǁî ǀgamkha ǃgarob ǁga ge ǂoa.

¹²Ob ge Jonatanna Davib ǃoa ge mî: ǃKhūb, Israeli Elob ao: Ti îba ta ga ôaǃnâo, nē ǁaeb ǁkhāb ai, ǁaris kas, aetsēs kas hoasa, tsî mû, Davitsa i ga ǃgâiba io, tsî ta ga sa ǃoa sî tama io tsî sa ǂgaes ǃnâ ǁî ǃkhaisa ǂhaiǂhai tama io,

¹³ab ǁnâi ǃKhūba Jonatanni tawa nēti dī, îb nēti dīǀaro! Ti îb ga ǂkhabab sa ǃoagu hâb xa ǃgâibaheo, o ta ge tita sa ǂgaes ǃnâ ǁîsa nî ǂhaiǂhai, o ta ge nî xū tsi, ǂkhîb ǀkhats nî ǃgûse; îb ǃKhūba hâǀkhā tsi, ti îb ǀkhab ge hâ is ǁkhās khami.

¹⁴Tsîts kha ǁnâi satsa, ganupe ta ga ûio, tita tawats dī tide ǃKhūb di ǃgâidība, î ta ga tā ǁō, ti?

¹⁵Tsîts ge ǁkhāti sa ǃgâidība ti omsa xu ǃgaoǁnâ tide ǀamosib kōse, tsîts ge ǁkhāti dī tide, ǃKhūb ga Davib di khākhoen xa mâ-i hoa-e ǃhūbaiba xu ǃgaoǁnâ hâ io.

¹⁶Nētib ge Jonatanna Davib di oms ǀkha ǃgaeǀhao-e ge dī: Ab ǃKhūba ǁîsa ǂgaoǀkhā Davib khākhoen di ǃomǁaeba xu, ti.

¹⁷Tsî Jonatanni ge Daviba ǃaruǀî ge nū kai, ǁîbab ǀnam hâ amaga; ǀoms âb di ǀnammi ǀkhab ge ǀnam bi hâ i xui-ao.

¹⁸ǁNās khaoǃgâb ge Jonatanna ǁîb ǃoa ge mî: ǁAri a ǂkham ǁkhâ ǃnubaits ge nî ǁkhuihe, sa ǂnûǃkhais nî ǀkhaiǃnâse hōhe xui-ao.

¹⁹Tsî ǃnona tsēdets ga hâtoao, ǃhaese ǁnâi ǁgôaxa, îts ǁnā ǃkhais, ǁîs tawats ge nē dīs di tsēs ai gaugausen hâ is ǃoa hā, îts Esel ti ǀon hâ ǀuis tawa hâ.

²⁰O ta ge tita ǃnona ǂāga ǁîs xōǀkhā nî ǁkhâu, ǁkhâutsâs ǁkhās khami.

²¹Tsî mû, o ta ge ǀgôaba nî sî tsî: ǃGû îts ǂāga ôa! ti nî mî; ǀgôab ǃoa ta ga ǁgâiǂuisase mîo: Mû, ǂāgu ge satsa xu nē ǀkhāb ai hâ; ǁîga ǁnâi ū îts hā, ǂkhîb satsa hâba xuige tsî tsū xū-i a ǀkhai, ǃKhūb a ûitsama ǃkhais ao.

²²Xawe ǀgôab ǃoa ta ga nēti mîo: Mû, ǂāgu ge satsa xu aiǃâb ǃoa ǁgoe, ǁnâi ǃgû, ǃKhūb ge go ǃgû kai tsi xuige.

²³Tsî ǁnā ǃkhais, tita tsî sats tsîkhom ǁîs xa goro ǃhoas xasa, mû, ǃKhūba ab tita tsî sats tsîkhom ǁaegu hâ ǀamosib kōse.

²⁴ǃNubaib ge Daviba ǃgarob ǃnâ ge gaugausen; tsî ǂkham ǁkhâb ge hāo, ob ge gao-aoba ǂûn ǀkha ge ǂnôa i, ǂûb nîse.

²⁵Tsî gao-aob ge ǁîb di ǂnûǃkhais ai ǂnôa io, nē ǃnās ai nau ǃnādi ais ǁkhās khami ǂnûǃkhais, ǂnubiǂgoab tawa hâs ai, ob ge Jonatanna ge khâi tsî Abneri ge Sauli xōǀkhā ge ǂnû, tsî Davib di ǃkhais ge ǀkhaiǃnâse ge hōhe.

²⁶Tsî Sauli ge ǁnātsē xū-i xare-e khom tama ge i, nētib ge ǂâi xui-ao; xū-i xab go hāǂamhe, ob ge ǃanu tama hâ; amase ǃanu tamab hâ.

²⁷Tsî i ge sao ra tsēs ai ge ī, ǀgamǁî tsēs ǂkham ǁkhâb dis ai, Davib di ǃkhais ge ǀkhaiǃnâse hōhe ǃnubaib ge Saula ǁîb ôab Jonatanni ǃoa ge mî: Tarexasa Isaib ôab ǁaris, aetsēsa xu ǂûs tawa hā tamasa?

²⁸Ob ge Jonatanna Saula ge ǃeream: Davib ge kaise go ǀkhoma te, Betlehems ǃoab ga ǃgû, ti.

²⁹Tsîb ge ge mî: A ta ǃgû re, sida di ǃhaos ge ǁguiba-e ūhâ ǃās ǃnâ, tsî ti ǃgâsab ǂûb ge go ǁkhau te; tsî ǀkhomma ta ga sa mûǁae hō hâ io, î ta ǁnâi xūhe, î ta ti ǃgâsaga sī mû re. Nē ǃkhais ǃaromab ge gao-aots di tāb tawa hā tama hâ.

³⁰Ob ge Sauli di ǁaiba ge ǂhubi Jonatanniǀî, tsîb ge ǁîb ǃoa ge mî: Sats ǂkhabamâǃoaxas di ôatse! ǂAn tama ta ǁnâi hâ, Isaib ôabats sa taotaosasib ase ūǂuibasen hâ ǃkhaisa tsî ǀōǀkhāsib sa îs dib di taotaosasib ase?

³¹Isaib ôab ǃhūbaib ai nî ûi tsēdi hoadi kōsets kom sats kao, sa gaosis kao ǁapoǁapohe tideo. Xuige ǁnâi sîsī îts tita ǁga ūhā kai bi, ǁōb di ôab a xuige.

³²ǁGoasib ge Jonatanna Sauli, ǁîb îba ǃeream tsî ǁîb ǃoa ge mî: Tare xū-i ǃaromab kha ǁnâi nî ǃgamhe? Tare xū-eb go dī?

³³ǃNubaib ge Saula ǁhâigôaba ge ǁhâi ǁîbǀî, ǁhâiǃganu bib nîga. Nētib ge Jonatanna ge hōǃâ, ǁîb îb ge ǂâibasenǃari hâ i ǃkhaisa, Davibab nî ǃgam ǃkhaisa.

³⁴ǁNā-amagab ge Jonatanna ǁaib âb di ǀgamsib ǃnâ tāba xu ge khâi; tsîb ge ǀgamǁî tsēs ǂkham ǁkhâb dis ai pere-i xare-e ǂû tama ge hâ i, Davib xab ra ǂhansen amaga, ǁgûb ge ǁîba ǁnāti go taotao xui-ao.

³⁵Tsî i ge ge ī ǁgoas ai, ob ge Jonatanna ǃaub ǃoa ge ǃgû, Davib xa go mîmâihe ǁaeb ai; tsî ǂkham ǀgôab ge ǁîb ǀkha ge hâ i.

³⁶Ob ge ǀgôab âb ǃoa ge mî: ǃKhoe îts ǁnā ǂāgu tita nî ǁkhâuga ôa. Ob ge ǀgôaba ge ǃkhoe, tsîb ge ǂā-e ge ǁkhâu, ǁîbab ge ǁkhâu-īǀkhāe.

³⁷Tsî ǀgôab ge Jonatanni ge ǂāba ǁkhâuǀî ǃkhais tawa sīo, ob ge Jonatanna ǀgôaba ǃhaoǃgon tsî ge mî: ǂĀba satsa xu aiǃâb ǃoa hâ tamab hâ?

³⁸ǁKhawab ge Jonatanna ǀgôaba ge ǃhaoǃgon: ǃNoe î ǃhae îts tā ǃnōsase mâ! Ob ge ǀgôab Jonatanni diba ǂāba ūkhâi tsî ǀhonkhoeb âb tawa ǁkhawa ge hā.

³⁹Xawe ǀgôab ge xū-e ge ǀū i, Davib tsî Jonatanni tsîkha ǀguikha ge ǃkhais xa ge ǂan i.

⁴⁰ǃNubaib ge Jonatanna sîsenūdan âba ǀgôab âba mā tsî ǁîb ǃoa: ǃGû îts ǁîna ǃās ǃnâ sī ūǂgā, ti ge mî.

⁴¹Tsî ǀgôab ge ǃgûo, ob ge Daviba ǃkhawagasǀîsa xu khâi tsî ais âb ai ge ǁnāǁgoe, tsîb ge ǃnona ǃnādi kōse ge ǃgamǃgâ; tsî kha ge ge ǁoagu, tsî kha ge ge ābagu, Davib ge ǃgarise ās kōse.

⁴²ǁGoasib ge Jonatanna Davib ǁga ge mî: ǃGû re ǂkhîb ǃnâ; sa ǀgamkhom ge ǃKhūb di ǀons ǃnâ nū tsî: Ab ǃKhūba hâ tita tsî sats tsîkhom ǁaegu tsî ti surib tsî sa surib tsîn ǁaegu, ti a mîn ge nî hâ ǀamosib kōse.