Read Khoekhoegowab 1 Samueli 21 Bible Online

1 Samueli 21 - Khoekhoegowab bible

1 Samueli 21

¹ǁNās khaoǃgâb ge khâi tsî ge ǃgû; tsî Jonatanni ge ǃās ǃnâ ge sī.

²ǃNubaib ge Daviba Nos tawa ge sī pristeri Ahimelexi ǁga; tsî Ahimelexi ge Daviba ǀkhū rase ǃgûǃoa tsî ge mîǀî bi: Tarexats ǀguri hâ tsî tarexats khoe-i ǀkha hâ tama hâ?

³Ob ge Daviba pristeri Ahimelexi ǃoa ge mî: Gao-aob ge dīǃkhai-e mîmā te tsî go mîǀî te: Khoe-i xare-e a-i tā ǂan nē ǃkhai-i, ǁî-i ǃaroma ta go sî tsi tsî ǁî-e ta ge mîmā tsi-i xa; o ta ge ǀgôaga ǂanǂansa khoeb di hâǃkhaisa go ǂanǂan.

⁴Tsî nēsi tare xū-ets ūhâ sa ǃomǁae? Koro perega ti ǃomǁae mā te, ǀnî xū-i hōhe ka-i hoa-e.

⁵Ob ge pristera Daviba ǃeream tsî ge mî: Nau pere-i xare-i ge ti ǃomǁae hâ tama hâ, tsî ǃanu pereb ǀguib ge hâ; xawe ǀgôagu ga tarade xu ūdawasen hâo!

⁶Ob ge Daviba pristera ǃeream tsî ǁîb ǃoa ge mî: Taradi ge amase sige xu ūdawahe go hâ i, ǃgûǂoa ta ga ǃnās hoasa i ra īs ǁkhās khami. Tsî xūn ǂkham khoegu din ge a ǃanu; tsî pereb ge ǁaupe a nau pere, nētsēb nî ǀasaba soadi ǃnâ khaihe amaga.

⁷ǃNubaib ge pristera ǃanu pereb xa ge mā bi; ǀnî pere-i ge ǁnāpa hâ tama ge hâ i xui-ao, ǁgauperegu ǀguigu, hîa ra ǃKhūb di ais aiǃâba xu ūǁnâhe ǁga gu, ǀgamsa pereb nî ǁguihega, ǁîgu ra ūbēhe tsēs ai.

⁸Tsî khoeb, Sauli ǃgāgu dib ge ǁnātsē ge hâ i, ǃKhūb di ais aiǃâ, Doeg ti ǀon hâb, Edomǁîb, Sauli ǃûi-aogu di ǂamsaba.

⁹Tsî Davib ge Ahimelexi ǃoa ge mî: Hâb a nēpa sa ǃomǁae, ǁhâigôab kas, ǀnî gôab kas hoasa? Tita ge ti gôab kas, ǀnî ǀāxūn âtan kas hoasa ti ǃomǁae ū tama hâ, gao-aob di dīǃkhais a ǃnoesa amaga.

¹⁰Ob ge pristera ge mî: Goliati, Filisteǁîb, sats ge terpentinhaixa ǃgoaǃnāb ǃnâ a ǃgamheb di gôab, mû, ǁîb ge hâ, sara-i ǃnâ ǃgamihe hâǃâ efob ǃgâb ai; ǁîbats ga ū ǂgao-o, ū ǁnâi re, ǀnîb ge nēpa a ǀkhai, ǁîb ǀguib. Ob ge Daviba: ǁÎb khami īb ge a ǀkhai, ǁîba mā te re, ti ge mî.

¹¹Tsî Davib ge khâi tsî ǁnātsē ge ǃhū Sauli di ais aiǃâba xu; tsîb ge Axib, Gats di gao-aob tawa ge sī.

¹²O gu ge Axib ǃgāga ǁîb xa ge mî: Nēba kha Davib, ǃhūb di gao-ao tamaba? ǁÎb xa ǁnae taman ge hâ i ǂnā rase: Sauli ge ǀoadisiga go ǂnau, tsî Davib ge disiǀoadisiga go ǂnau ti.

¹³Ob ge Daviba nē mîde ǂgaob ǃnâ ge ǁgui; tsîb ge kaise ge ǃao Axib, Gats gao-aob di ais aiǃâ.

¹⁴ǁNā-amagab ge īsib âba ǁîgu mûdi aiǃâ ge ǀkharaǀkhara, tsîb ge ge ǃkhaukhoese dīsen ǁîgu ǃomǁae; ob ge ǁāb di dao-amsa ge xora-ai, tsîb ge tsāb âba ǁîb di ǀhō-ammi ǃnâ ge ǂnâ kai.

¹⁵ǃNubaib ge Axiba ǃgāgu âb ǃoa ge mî: Kō, sago ge ra mû, nē khoeb ǃkhau hâ ǃkhaisa; tare xū-i ǃaroma go kha ǁîba ti tawa go ūhā?

¹⁶Tôasi ta hâ ǃkhausan xa, o go nēba go ūhā, ti aiǃâb nî ǃkhauga? Nēba ti ommi ǃnâ sīb nî?