Read Khoekhoegowab 1 Samueli 22 Bible Online

1 Samueli 22 - Khoekhoegowab bible

1 Samueli 22

¹ǃNubaib ge Daviba ǁnāpa xu ǃgû tsî ǁhoab Adulammi ǃnâ ge ǁhaisī. Tsî ǃgâsagu âb ge ǁîba ge ǁnâu tsî ǁgûb ommi hoaba, on ge ǁnāǀî ǁîb ǃoa ge ǁgôa.

²Tsî mâ khoeb, ǂōǂōhe hâb hoab, tsî mâ khoeb, surude ǂganao-e ūhâb hoab, tsî mâ khoeb, ǀoms âb ǃoa hâb hoab ge ǁîb tawa ge ǀhao, tsîb ge ǁîba ge ǁîn di ǂamkhoe kai; ǁîb tawa gu ge hakakaidisi khoega hâ is kōse.

³Tsî Davib ge ǁnāpa xu Mispes Moabǁîn dis ǃoa ge ǃgû; tsîb ge Moabǁîn di gao-aob ǃoa ge mî: A ra ti îb tsî îs tsîra sadu tawa ǂoaxa re, ǂan ta nîs kōse, tare-eb nî Eloba dī-ū te ǃkhaisa.

⁴Ob ge ǁîra Moabǁîn gao-aob di ais aiǃâ ge ūhā, o ra ge ǁîb tawa ge hâ, Davib ge ǁaposa ǃkhais ǃnâ hâ i tsēdi hoadi kōse.

⁵Xawe kēbo-aob Gadi ge Davib ǃoa ge mî: Tā ǁaposa ǃkhais ǃnâ hâ, îts ǃgû îts Judaǃhūb ǃnâ hâ. Ob ge Daviba ǃgû tsî ǀgomhaixa ǃkhais Herets ǃnâ ge sī.

⁶Tsî Sauli ge ge ǁnâu, Davib tsî ǁnā aogu, ǁîb ǀkha hâgu on ge ǂansa ǃkhaisa. Tsî Sauli ge ǃnoms ai haidi ǃgao ge ǂnôa i Gibeas tawa, tsî ǁhâigôab âb ge ǃomǁaeb âb ǃnâ hâ, tsî ǁîb di ǃgāgu hoagu ge ǁîb tawa ge mâ i.

⁷ǃNubaib ge Saula ǁîb di ǃgāgu, ǁîb tawa mâgu ǃoa ge mî: ǁNâu re Benjaminni ôago, xareb kha Isaib ôaba sago hoago ǃhanagu tsî ǂauxûiǂûǃhanaga nî mā? Xareb kha sago hoago ǀoadisigu di danakhoese tsî kaidisigu di danakhoese nî mâi?

⁸O go ge hoatsama ti ǃoagu ǃgaeǀhaosen hâ tsî ǀguib xareb âgo ge ti ǂgaes ǃnâ ǂhaiǂhai tama hâ, ti ôab ge Isaib ǀkha ǃgaeǁae-e dī ǃkhaisa; tsî ǀguib xareb ge sago ǃnâ hâ tama hâ, tita xa ra tsûaǂgaob tsî ti ǂgaes ǃnâ ra ǁîsa ǂhaiǂhaiba; ti ôab ge ǃgāb âtaba ti ǃoagu ǁnoaǁgui-aose ge ǂkhaiǂkhaikhâi, nētsē i ī khami.

⁹ǁGoasib ge Doegi, Edomǁîb, Sauli ǃgāgu tawa mâba ǃeream tsî ge mî: Tita ge Isaib ôab ra Nobs tawa sī ǃkhaisa ge mû Ahimelexi, Ahitub ôab tawa.

¹⁰ǁÎb ge ǃKhūba ǁîba ge dîba tsî daob ǂûna ge mā bi; tsîb ge ǁkhāti Goliati, Filisteǁîb di gôaba ge mā bi.

¹¹ǃNubaib ge gao-aoba ge sî, pristeri Ahimelexi, Ahitub ôabab nî ǂgai kaise tsî ǁîb îb ommi hoaragaba, ǁnā pristergu, Nobs tawa hâga; o gu ge hoatsama ge hā gao-aob tawa.

¹²Ob ge Saula ge mî: ǁNâu re, sats Ahitub ôatse! Ob ge: Mû, nē ta a, ti ǃkhūkhoetse, ti ge mî.

¹³Ob ge Saula ǁîb ǃoa ge mî: Tare xū-i ǃaromasa sakho ti ǃoagu ge ǃgaeǀhaosensa, sats tsî Isaib ôab tsîkho, ots pereb tsî gôab tsîkha ǁîba mā tsî Eloba ǁîba ge dîba, ǁnoaǁgui-aoseb nî ti ǃoagu khâise, nētsē i ī khami?

¹⁴Ob ge Ahimelexa gao-aoba ǃeream tsî ge mî: Tsî tariba a ǁnâi îǂhôa sa ǃgāgu ǃnâ, Davib ī khami, gao-aob di ǀuiǀgôab tsî sa ǃûi-aogu di ǀguib tsî sa ommi ǃnâ ǃgôahesaba?

¹⁵Nētsēs ǀguisa kha, ǁîba ta Eloba ra dîbatsoatsoasa? Tātsē! Tāts gao-aotsa sa ǃgāta xū-e ǁguiǂam tsî ti îb di ommi hoaragaba; sa ǃgāta ge nē xūn hoan xa xū-i xare-e go ǂan tama hâ i, ǂkhari-i kas, kai-i kas hoasa.

¹⁶Xawe gao-aob ge ge mî: ǁŌts ge nî, Ahimelexse, sats tsî sa îb ommi digo hoago.

¹⁷Ob ge gao-aoba ǃkhoe-aogu, ǁîb tawa mâgu ǃoa ge mî: Mâǀgū î go ǃKhūb di pristerga ǃgam, ǁîgu di ǃommi ǁkhāti Davib ǀkha hâ xuige tsî ǁîb ra ǃhū ǃkhaisa gu a ǂan xawe ti ǂgaes ǃnâ ǂhaiǂhai tama hâ xuige. Xawe gao-aob ǃgāgu ge ǁîgu ǃomma ǀhōǂui ǂgao tama ge i, ǃKhūb pristerga gu nî ǂnû-aise.

¹⁸ǃNubaib ge gao-aoba Doegi ǃoa ge mî: Satsa ǃoa mâ îts pristerga ǃgam. Ob ge Doegi, Edomǁîba ǃoa tsî pristerga ge ǃgam, tsîb ge ǁnātsē ǁkhaisadisikoroǀa aogu, lineǁkhaib saraba anasen hâga ge ǃgam.

¹⁹Tsîb ge ǁkhāti Nobs, pristergu di ǃāsa gôab di ǀāb ǀkha ge ǂnau, aoba xu taras kōse, ǀgôana xu dairan kōse, ā goman tsî eseln tsî gūn onab ge ge ǂnau gôab di ǀāb ǀkha.

²⁰Xawe ǀguib Ahimelexi, Ahitub ôab di ôagu dib, Abjatar ti ǀon hâb ge ge ûi; tsîb ge ǁîba Daviba ge ǁhâsao.

²¹Tsî Abjatari ge Daviba ge ǂhôa, Sauli ge ǃKhūb di pristerga ǃgam ǃkhaisa.

²²ǃNubaib ge Daviba Abjatari ǃoa ge mî: ǂAn ta ge ge ǁnātsē, Doegi, Edomǁîb ge ǁnāpa hâ i, ob nî ǁîba ǁî xūna Saula ǂanǂansase ǂanǂan ǃkhaisa; tita ge ǀhapixata sa îb ommi di ǀomdi hoadi tawa.

²³Tita ǀkha hâ îts tā ǃao; ti ǀomsa ga ôa-i ge sa ǀomsa ra ôa-e; ots ge tita tawa sâu sase nîra hâ.