Read Khoekhoegowab 1 Samueli 24 Bible Online

1 Samueli 24 - Khoekhoegowab bible

1 Samueli 24

¹Tsî Davib ge ǁnāpa xu doeǃapa tsî Engedib di ǁaposa ǃkhaidi ǃnâ ge hâ.

²Tsî i ge ge ī, Sauli ge Filisteǁîn khaoǃgâba xu hā ǃnubain ge ǁîba ǂanǂan tsî: Mû, Davib ge ǃgaroǃhūb, Engedib ǃnâ hâ, ti ge mî.

³ǁGoasib ge Saula Israeli hoaragaba xu ǃnonaǀoadisi ǃkhōǂuihesa aoga ū tsî ge ǃgû, Davib tsî ǁîb di aogab nî ôase ǁKhâiseǃhaob ai.

⁴Tsîb ge daob amǃgâ hâ gūǃharadi tawa ge sī, tsî ǁnāpab ge ǁhoaba hâ; ob ge Saula ǁîb ǃnâ ge ǂgâ, ǂaira âbab nî ǃgū-aise. Tsî Davib tsî ǁîb di aogu tsîgu ge ǁhoab di ǃnāb ǃnâ ǂgâna ge ǂnôa i.

⁵ǃNubai gu ge Davib di aoga ǁîb ǃoa ge mî: Mû, nēs ge ǁnā tsēs, ǃKhūb ge ǁîs xa sa ǃoa mîsa: Kō, tita ge sa khākhoeba ǃomǁaeb âts ǃnâ nîra mā, ots ge ǁîba nîra dī-ū, sa mûǁae i a ǃgâi khami. Ob ge Daviba khâi tsî ǂause Sauli anaǂamxūb ǂao-e ge ǃgaoǁnâ.

⁶Xawe i ge ǁnās khaoǃgâ ge ī, Davib ge ǂgaoǂans âb xa ǂhanihe ǃkhaisa, Sauli saraǂao-eb go ǃgaoǁnâ amaga.

⁷Ob ge ǁîb di khoegu ǃoa ge mî: Ab ǃKhūba ǁîsa xu sâu te, î ta ǁî ǃkhaisa tā dī ti ǀhonkhoeb tawa, ǃKhūb di ǂkhauǀkhāsabeb tawa, î ta ti ǃomma ǁîbǀî tā ǀhōǂui; ǃKhūb di ǂkhauǀkhāsabeb a amaga.

⁸Tsî Davib ge khoegu âba mîdi ǀkha ǁkhaedawa tsî ǁîga mā-am tama ge i, Sauli ǃoagu gu nî khâi ǃkhaisa. Tsî Sauli ge ǁhoaba xu khâi tsî daob âba ge ǃgû.

⁹ǁNās khaoǃgâb ge Daviba ǁkhāti khâi tsî ǁhoaba xu ǂoa tsî Saula ǃhaoǃgon tsî ge mî: Ti danakhoe gao-aotse! Ob ge Saula ge kōnǃgâ, tsî Davib ge ais âb ǀkha ǃhūb ai ǁnāǁgoe tsî ge ǃgamǃgâ.

¹⁰Tsî Davib ge Sauli ǃoa ge mî: Tarexats ra khoen di mîde ǃgâ: Mû, Davib ra sa ǂkhababa ôa? ti ra mîna.

¹¹Kō, nētsē ra ge sa mûra go mû, ǃKhūb nētsē satsa ti ǃomǁae go mā ǃkhaisa nē ǁhoab ǃnâ; tsîn ge a ta ǃgam tsi, ti go mî, xawe ta ge tita satsa go sâu tsî: Tita ge ti ǃomma ǀhōǂui tide ti ǀhonkhoetsǀî, ǃKhūb di ǂkhauǀkhāsabets a amaga, ti go mî.

¹²Kō re, ti îtse, kō re ti ǃomǁae sa anaǂamsarab di ǂao-e! Sa anaǂamsarab di ǂao-e ta go ǃgaoǁnâ ǃnubai ta ge ǃgam tsi tama hâ, xuige ǂanǃā îts mû, ti ǃomǁae i ǂkhaba-i xare-i tsî ǃûǂam-i xare-e hâ tama tsî sa ǃoagu ta ǁore tama hâ ǃkhaisa; xawets ge satsa ti ǀomsa ra sauruǃgon, ǁîsats nî ūbēse.

¹³ǃKhūb ge tita tsî sats tsîkhom ǁaegu nîra ǀgoraǃgâ, tsî ǃKhūb ge sa tawa nîra ǀkhaoba te, xawe ti ǃommi ge sa ǃoagu hâ tide.

¹⁴ǂKhoamîs abogu dis ra mî khami: Eloxoresana xus ra eloxoresasisa ǀkhī; xawe ti ǃommi ge sa ǃoagu hâ tide.

¹⁵Tari-ets, Israeli gao-aotsa go ǃgûǂoaba? Tari-ets ra sauruǃgon? ǁŌ hâ ari-e? ǀGui ǃaedaro-i ǀgui-e?

¹⁶Îb ǃKhūba ǂhanuǂhanu-aose ī îb ǀgoraǃgâ tita tsî sats tsîkhom ǁaegu, îb kōkō îb ti ǂnoaguǃkhai-e ǂnoaguba te îb ǀgora te sa ǃomma xu.

¹⁷Tsî i ge ge ī, Davib ge nē mîdi hoade Sauli ǃoa ǃhoatoao, ob ge Saula ge mî: Sa domma nēba, ti ôa Davitse? Tsîb ge Saula dommi âba ūkhâi tsî ge ā.

¹⁸Tsîb ge Davib ǃoa ge mî: Sats ge tita xa a ǂhanu-ai; sats ge ǃgâiba tita go dīdawa-am, tsî tita satsa ǂkhababa go dīdawa-am xui-ao.

¹⁹Sats ge nētsē go ǁgau te, ǃgâibats go dī-ū te ǃkhaisa, ǃKhūb ge tita sa ǃomǁae go mā, xawets ǃgam te tama hâ xui-ao.

²⁰Khoe-i ga khākhoeb â-e hō-o, xare i kha ǃgâi daob ai ǁîba nî ǃgû kai? ǁNā-amaga ab ǃKhūba ǃgâiba dīdawa-am tsi ǁnā xūn, nētsēts go dī-ū ten ǃaroma.

²¹Tsî nēsi mû, tita ge a ǂan, amasets nî gao-ao kai tsî Israeli di gaosis sa ǃomǁaeb ǃnâ nî mâhō ǃkhaisa.

²²Îts ǁnâi nūba te ǃKhūb tawa, ti suribats ti khaoǃgâ ǃhūǃnomasi tidesa tsî ti ǀonsats ti îb di omma xu ǀari tidesa.

²³ǃNubaib ge Daviba Saula ge nūba. Tsî Sauli ge ommi âb ǃoa ge ǁaru, xawe Davib tsî ǁîb di khoegu tsîgu ge ǁaposa ǃkhaidi ǃoa ge ǃapa.