Read Khoekhoegowab 1 Samueli 25 Bible Online

1 Samueli 25 - Khoekhoegowab bible

1 Samueli 25

¹Tsî Samueli ge ge ǁō; tsî Israeli hoab ge ǀhao tsî ǃgaesa ge hî ǁîb ǂama tsîn ge ǁîba ǁîb di ommi ǃnâ ge ǁkhō Ramas tawa. Tsî Davib ge khâi tsî ge doeǁgôa ǃgaroǃhūb Paranni ǃoa.

²Tsî aob ge ge hâ i Maons tawa, tsî dīxūn âb ge Karmels tawa ge hâ i; tsî nē aob ge kaise ge kai i, tsîb ge ǃnonaǀoadisi gūn tsî ǀguiǀoadisi pirin tsîna ge ūhâ i; tsîb ge gūn âba gere ǂkhom Karmels tawa.

³Tsî ǀons aob dis ge ge Nabal i, tsî ǀons ǁîb di taras dis ge Abigail ge i; tsî taras ge ǃgâi ǁnâuǃāb â-i tsî îsa īsib â-i tara ge i, xawe aob ge karosa tsî tsūdīgu â-i ao ge i, tsîb ge Kalebǁî ge i.

⁴Tsî Davib ge ǃgaroǃhūb ǃnâ ǁnâuo, Nabali gūn âba ra ǂkhom ǃkhaisa,

⁵ob ge Daviba disi ǂkham khoega ge sî; tsî Davib ge ǂkham khoegu ǃoa ge mî: ǃGûǃapa go re Karmels ǃoa, tsî Nabali tawa go ga sīo, o go ge ǁîba ti ǀons ǃnâ ǃgâihâsib âb xa nî dî;

⁶tsî go ge ǁnā ǃgâibahe raba ǃoa nî mî: ǂKhîba ab hâǀkhā tsi, tsî sa ommi ǀkha ab ǂkhîba hâ, tsî ūts hân hoana an ǂkhî!

⁷Tsî nēsi, tita ge go ǁnâu, gūǂkhomaogats ūhâ ǃkhaisa; kō, sa ǃûi-aogu hîats ūhâgu ge sige ǀkha ge hâ i, sige ge ǁîga tsū xū-e dī-ū tama hâ, tsî gu ge ǁkhāti xū-e ǁkhui tama ge hâ i, Karmels tawa gu ge hâ i tsēdi hoade.

⁸Sa ǂkham khoega dî, o gu ge nî ǂanǂan tsi; î ge ǁnâi siǂkham khoege sa mûǁae ǀkhomma hō, ǃgâitsēs ai ge go hā xuige; îts ǁnâi sa ǃgāge tsî sa ôab Daviba mā re, sa ǃommi ga hō xū-i hoa-e.

⁹Tsî Davib di ǂkham khoegu ge hā tsî Davib di ǀons ǃnâ ǁnā mîdi hoade Nabali ǃoa ǃhoao, o gu ge ge ǃnō.

¹⁰Ob ge Nabala Davib di ǃgāga ǃeream tsî ge mî: Tariba Daviba tsî tariba Isaib ôaba? ǂGuigu ge nētsē ǁnā ǃgāgu hîa ra xoresenga, mâb hoaba ǁîb di ǀhonkhoeba xu.

¹¹Tita ǁnâi ti pere-i tsî ti ǁgam-i tsî ǁgan-i hîa ta ǂkhomaoga go ǂāba-e ū tsî nî ǁî-e khoega mā, ǀū ta aga, mapa xu gu hâsa?

¹²ǃNubai gu ge Davib di ǂkham khoega ǁîgu di daob ǃoa ge unusen; tsî gu ge oa tsî sī tsî saogubes ai ge ǂhôa bi nē mîdi hoade.

¹³Ob ge Daviba ǁîb di khoegu ǃoa ge mî: Ab mâb hoaba gôab âba ǃgae. ǃNubaib ge mâb hoaba gôab âba ge ǃgae, tsî Davib on ge gôab âba ge ǃgae; tsî gu ge Davib khaoǃgâ hakakaidisi nî ī khoega ge ǃgûǃapa, tsî ǀgamkaidisigu ge xūn tawa ge hâ.

¹⁴Xawe ǂkham khoegu di ǀguib ge Abigails, Nabali tarasa ǂhôa tsî ge mî: Mû, Davib ge ǃgaroǃhūba xu sîsabega go sî, sada ǀhonkhoeba gu nî ǀkhaese, xaweb ge ǁîga go ǀao.

¹⁵Khoegu ge kaise ǃgâi khoese ība da ge i xawe; tsî da ge ǁkhāti tsū xū-e dī-ūhe tama ge hâ i, tsî da ge xū-e ǁkhui tama ge hâ i, ǁîb ǀkha da ge hâǁae tsēdi hoade, ǃgarob ai da hâ hîa.

¹⁶ǁÎgu ge ǂnubiǂgoase ge hâǂnamipe da hâ i tsuxuba tsî tsēa, ǁîgu ǀkha da ge hâ i tsēdi hoade, gūna ra ǃûiǃâ.

¹⁷ǂAnǃā ǁnâi îs mû, tare-es nî dī ǃkhaisa; ǂkhabab ge sada ǀhonkhoeb tsî ǁîb di ommi hoaragaba ǂâibahe hâ xuige; tsî ǁîb ge a Beliali ôa, khoe-i ge ǁîb ǀkha ǃhoa ǁoa.

¹⁸ǃNubais ge Abigailsa ǃhae tsî ge ū ǀgamkaidisi perega tsî ǀgam ǁhōkha ǂauxûib ǀkha tsî koro ǁāǁāhe hâ gūga tsî koro ǀguirogu ǁnaruǀkhāhe hâ ǃhorob ǀkha tsî ǀguikaidisi ǂâun peregu tsî ǀgamkaidisi ǀnomaǂûn narudi tsîna tsî ǁîna eseln ai ge ǃgae.

¹⁹Tsîs ge ǂkham khoegu âs ǃoa ge mî: Ti ais aiǃâ ǃgû, mû, tita ge sago khaoǃgâ nî sī. Xawe ǁîs di aob Nabalas ge ǁîsa ǂanǂan tama ge i.

²⁰Tsî i ge ge ī, eseli ais ra ǃgapi hîas ge ǂganǃgâsa ǃkhais ǃhommi dis tawa sī ǃkhaisa, tsî mû, o gu ge Davib tsî ǁîb di khoegu tsîga ǁîsa ge ǁgôaxaǃoa, tsîs ge ǁîgu ǀkha ge ǀhû.

²¹Tsî Davib ge ge mî: Amase ta ge ǁause nēb ǃgaroǃhūb ǃnâ ūhâ xūn hoana gere sâu; o i ge ūb hâ xūn hoan xa xū-i xare-e ge ǁkhuihe tama hâ i; xawe ǁîb ge ǂkhababa ǃgâib ama go dīdawa-am te.

²²Ab ǁnâi Eloba Davib di khākhoen tawa dī nēti îb ǁnāti dīǀaro, ǁîb ūhân hoan xa ta ga ǁaris kōse ǃgauo, ǁî-i ǂnubiǂgoab ai ra ǀkham-e.

²³Tsî Abigails ge Daviba mûo, os ge ǃnoesase esela xu ge ǁgôaxa; tsîs ge Davib di ais aiǃâ ǁîs di ais ai ǁnāǁgoe tsî ǃhūb ai ge ǃgamǃgâ.

²⁴Tsîs ge ǂaira âb tawa ǁnā tsî ge mî: Ti ǃkhūkhoetse, as dīsāsa ti re, î ta sa ǃgāta sa ǂgaera aiǃâ ǃhoa îts sa ǃgāta di mîde ǁnâu.

²⁵Ti ǃkhūkhoetse, tā sa ǂgaoba nē Beliali khoeb ai ǂnûi, Nabali ai; ǀons âb ī khamib ge ǁîba ī, ǁîb di ǀons ge a Nabal, tsî gâresib ge ǁîb ǀkha hâ; tsî tita sa ǃgāta ge ti ǃkhūkhoets di ǂkham khoegu hîats ge sîga mû tama go hâ i.

²⁶Tsî nēsi, ti ǃkhūkhoetse, ǃKhūb a ûitsama tsî sa ǀoms a ûitsama ǃkhais aob ge ǃKhūba ǁnāb, satsa go ǂhaniba, ǀaoǂnâxūs ǀkha ǁnāpa sīsa, sa ǃommi nî ore tsiga; tsî nēsi an sa khākhoen tsî ǀhonkhoetsǀî ǂkhababa ra ôana Nabali khami ī kaihe.

²⁷Tsî nēsi, mû, nēb ge ǀkhaeb, sa ǃgāta ti ǀhonkhoetsa go ūhābaba ǁnā ǂkham khoegu, ti ǀhonkhoets di dāǃharode ra saogab nî māhese.

²⁸Sa ǃgāta ǁnâi ǃûǂamsa ǀûba re, ǃKhūb ge ǂanǂansase ti ǀhonkhoetsa ǁaposa omma nîra dība, ti ǀhonkhoets ra ǃKhūb di toroga ǃkham, tsî ǂkhaba-i xare-i sa ǃnâ hâts a tsēde xu hōhe tama ge hâ i xui-ao.

²⁹Khoe-i ga khâio, satsa i nî ǃgôaǃgon tsî sa ǀomsa i nî ôaga, as ǁnâi ti ǀhonkhoets di ǀomsa ǃgaeǁaehe hâ ûitsaman di ǀgamiros ǃnâ ǃKhūb, sa Elob tawa; xawe ǀomdi sa khākhoen dideb ge ǃgoaǃkhais jaboxūs disa xu nî ǂnoaǂui.

³⁰Tsî i ge nîra ī, ǃKhūb ga ti ǀhonkhoetsa dī-ūo ǁnā ǃgâib, sats ǂamab ge ǃhoab hoab ǃoa, tsî mîmā tsib kao, Israeli ǂamats nî aiǃgû-ao kai ǃkhaisa,

³¹os ge ǁîsa ti ǀhonkhoetsa ǁnope xūse tsî ǁgonǁgonǂgaos ǂgaob dise ība tide, ǀhapiǃkhai-i osets ge ǀaoǂnâxū tama tsî ti ǀhonkhoets ge ǁî-aitsama oresen tama hâ, ti; tsî ǃKhūb ga ti ǀhonkhoetsa ǃgâidī-ūo, îts ǁnâi sa ǃgāta xa ǂâi re.

³²ǃNubaib ge Daviba Abigails ǃoa ge mî: Ab ǃkhōǀkhāhe ǃKhūb, Israeli Elob, nētsē sasa tita go sîǃoaba.

³³Îs ǃkhōǀkhāhe sa ǀapesa, îs sasa ǃkhōǀkhāhe, nētsē tita ǀaoǂnâxūsa xu go ǁkhaedawasa, ti ǃommi ore te tidega.

³⁴Amase, ǃKhūb, Israeli Elob, ǂkhabase ta nî dī-ū sisa go ǂkhā teb a ûitsama ǃkhais ao: Sas ga ǃhae tsî ǃgûǃoa te tama hâ io, o i ge ga Nabali din xa ǂnubiǂgoab ai ra ǀkham-e ǃgau tama ga hâ, ǁgoas kōse.

³⁵ǃNubaib ge Daviba ǁîs di ǃomǁaeba xu ǁîbas go ūhāba xūna ū tsî ǁîs ǃoa ge mî: ǃGû re ǂkhîb ǀkha sa ommi ǃoa; mû, tita ge sa domma go ǁnâuhō tsî sa aisa go ǃkhōǃoa.

³⁶Tsî Abigails ge Nabali tawa sīo, mû, ob ge ǂûǁae-e ge ūhâ i ommi âb ǃnâ, gao-aob ǂûǁae-i xase, tsî Nabali di ǂgaob ge ǁî-i xa ǃgâiaǂgao tsî kaise ākhanu ge hâ i; ǁnā-amagas ge mî-i xare-es ge ǃhoaba bi tama hâ isa, ǂkhari-i kas, kai-i kas hoasa, ǁgoas ge ǁgoas kōse.

³⁷Tsî i ge ǁgoas ai ge ī, ǂauxûib ge Nabala xu ǂoao, os ge taras âba nē mîde ge ǂanǂan bi. ǃNubaib ge ǂgaob âba ǁîb di ǃnāb ǃnâ ge ǁō, tsîb ge ǀui-i ase ge ī.

³⁸Tsî i ge disi nî ī tsēde ǁnās khaoǃgâ ge ī, ǃKhūb ge Nabala ǂnau ǃkhaisa, ob ge ge ǁō.

³⁹Tsî Davib ge ǁnâuo Nabali ǁō hâ ǃkhaisa, ob ge ge mî: Ab ǃkhōǀkhāhe ǁnā ǃKhūb, ti ǃharaxūb di ǂnoaguba Nabali ǃomma xu go ǂnoaguba teb tsî ǁîb di ǃgāta ǂkhababa xu go ǁkhaedawaba; tsî ǃKhūb ge ǂkhabab Nabali diba ǁîb di danas ai go hā kai. Tsî Davib ge sî tsî Abigailsa ge ǂgan kai, îb ǁîsa tarase ūga.

⁴⁰Tsî Davib di ǃgāgu ge Abigails ǁga sīo Karmels tawa, o gu ge ǁîsa ǃhoa-ū tsî ge mî: Davib ge sige sa ǃoa go sî, taraseb nî sasa ūga.

⁴¹ǃNubais ge khâima tsî ais âs ǀkha ǃhūb ai ǁnāǁgoe tsî ge mî: Mû, sa ǃgāta a ta ǃoabasabese ī ti ǀhonkhoets di ǃgāgu ǂaide nî ǁāse.

⁴²Tsî Abigails ge ǃhae tsî ge khâi, tsîs ge eseli ai ge ǃgapi ǁîs di koro ǃgādi, ǁîs di dāǃharode ra saodi ǀkha; tsîs ge Davib di sîsabega ge sao, tsîs ge ge ǁîb di tara kai.

⁴³Tsî Ahinoams, Jesreels disab ge Daviba ǁkhāti ge ū; nēti ra ge ǁîǀgamra ǁkhāti ge ǁîb di tara kai.

⁴⁴Sauli ge ǁîb di ôas Mixals, Davib di tarasa Paltib, Lajis ôab, Galims diba mā xui-ao.