Read Khoekhoegowab 1 Samueli 26 Bible Online

1 Samueli 26 - Khoekhoegowab bible

1 Samueli 26

¹Tsî Sifǁîn ge Sauli ǁga ge hā Gibeas tawa, mî raǃâ: Daviba gaugausen tamab hâ ǃnoms Haxilas dis ai, ǃgaroǃhūb ǃoa-ai?

²ǃNubaib ge Saula khâi tsî ǃgaroǃhūb Sifi ǃoa ge ǁgôa tsî ǃnonaǀoadisi khoegu, Israela xu ǃkhōǂuihe hâga ǁîb ǀkha, Daviba gu nî ôase, ǃgaroǃhūb Sifi ǃnâ.

³Tsî Sauli ge ǃnoms Haxilas dis, ǃgaroǃhūb ǃoa-ai daob amǃgâ hâs ai ge ǁgoe; xawe Davib ge ǃgaroǃhūb ǃnâ hâ tsî ge mû, Sauli ǁîb khaoǃgâ ǃgaroǃhūb ǃoa ra hā ǃkhaisa.

⁴Davib ge ǃkhē-aoga sîǂui tsî ǁnâuǃā, Sauli amase ra hā ǃkhaisa xui-ao.

⁵Ob ge Daviba khâi tsî ge sī ǁnā ǃkhais, Sauli ge ǁîs ai ǁgoe is tawa, tsî Davib ge ǁnā ǃkhais, Sauli ǁîs ai Abneri, Neri ôab, toroǂamsab âb ǀkha ǁgoesa ge kō. Tsî Sauli ge kunidi mâǃkhais tawa ge ǁgoe, tsî ǁaes ge ǁîba ge ǁgoeǂnamipe.

⁶ǁGoasib ge Daviba ǃeream tsî Ahimelexi, Hetiǁîb, tsî Abisaib, Serujas ôab, Joab di ǃgâsab ǀkha ǃhoa tsî ge mî: Tariba tita ǀkha Sauli ǃoa ǁgoeǃkhais ǃnâ nî ǁgôa? Ob ge Abisaiba: Tita ge nî ǃgûǁgôaǀkhā tsi, ti ge mî.

⁷Nēti kha ge Davib tsî Abisaib tsîkha tsuxuba ǁaes tawa ge sī; tsî mû, Sauli ge kunidi mâǃkhais ǃnâ ge ǁomǁgoe i, tsî ǁhâigôab âb ge ǁîb di danaǂam ǃhūb ǃnâ ǃkhāǂgāhe ge hâ i, tsî Abneri tsî ǁaes ge ǁîb ǂnamipe ge ǁgoe i.

⁸ǃNubaib ge Abisaiba Davib ǃoa ge mî: Elob ge nētsē khākhoeb âtsa sa ǃomǁae go māǁnâ; î ta ǁnâi nēsi ǁhâigôab ǀkha ǀgui ǃnās ama ǃhūb ǃnâ ǃkhāǁgui bi, ǁîsa ta ǀgamǁî ǃnāsa dī tidese.

⁹Xawe Davib ge Abisaib ǃoa ge mî: Tā hîǀhuru bi; tari-e ǁî-i di ǃomma ǃKhūb ǂkhauǀkhāsabeb ai ǁgui tsî nî ǀhapiose hâ-e?

¹⁰ǃAruǀîb ge Daviba ge mî: ǃKhūb a ûitsama ǃkhais ao; ǃKhūb ǁîba nîra ǂnaus kas, tsēs âb, ǁōb nîs ga hās kas, ǃkhammi ǃnâ ǂgâ tsîb ga kās hoasa,

¹¹xawe ta tā ībahe, ti ǃomma ta nî ǃKhūb ǂkhauǀkhāsabeb ai ǁgui ǃkhaisa; îts ǁnâi ǁhâigôab, danaǂam mâba ū tsî ǁgamxapas tsîra î khom ǃgû.

¹²Ob ge Daviba ǁhâigôab tsî ǁgamxapas tsîra Sauli danaǂamsa xu ū, tsî kha ge ge ǃgû; tsî khoe-i xare-i ge ǁîsa mû tama tsî khoe-i xare-i ge ǁîsa hōǃâ tama tsî khoe-i xare-i ge ǃnoaǂkhai tama ge hâ i, hoatsama gu ge ǁom hâ i xui-ao; ǃgam ǂoms ge ǁîgu ai ǃKhūba xu ǁnā hâ i amaga.

¹³Tsî Davib ge nauǃnani ǃgâuo, ob ge ǃhommi di ǂaob ai ǃnūseba xu ge mâ, hara ǃkhai-i ge ǁîgu ǁaegu hâ is kōse.

¹⁴Ob ge Daviba ǁaes ǃoa ge ǃhao tsî Abneri, Neri ôab ǃoa tsî ge mî: ǃEreamts kha tide, Abnertse? ǃNubaib ge Abnera ǃeream tsî: Taritsa sats, gao-aob ǃoa ra ǃhaotsa? ti ge mî.

¹⁵ǁGoasib ge Daviba Abneri ǃoa ge mî: Ao tamatsa kha ǁnâi satsa? Tsî tari-e sats khami ī, Israeli ǃnâ? Tarexats kha ǁnâi sa ǀhonkhoeb, gao-aob ǂama ǃûi tama hâ? ǀGuib ǁaes dib kom go sī hâ io, gao-aob, sa ǀhonkhoebab nî hîkākāseo.

¹⁶Nē ǃkhais hîats go dīs ge ǃgâi tama hâ; ǃKhūb a ûitsama ǃkhais ao go ge sago, ǀhonkhoeb âgo, gao-aoba ǃûi tama hâgo a ǁōb di ôa. Tsî nēsi kō mapa ra gao-aob di ǁhâigôab tsî ǁgamxapas tsîra, danaǂam go mâ ira hâ ǃkhaisa.

¹⁷Tsî Sauli ge Davib di domma ǂanǃā tsî ge mî: Sa domma nēba, ti ôa Davitse? Ob ge Daviba ge mî: Ti dommi ge a ǁî, ti ǀhonkhoe gao-aotse.

¹⁸Ob ge ǁîba ǃaruǀî ge mî: Tare xū-i ǃaromats kha ti ǀhonkhoetsa sa ǃgāta nēti ra ǃgôaǃgon? Tare xū-e ta kha ǁnâi go dī? Tsî mâ ǂkhaba-e kha ti ǃomǁae hâ?

¹⁹Tsî nēsi, îts ǁnâi ti ǀhonkhoe gao-aotsa ǁnâu sa ǃgāta di mîde. ǃKhūb ga ti ǃoagu ǂgāǃnâ tsio, ab ǁîba ǂûǁguibasa ǃkhao! Xawe khoen ôan ga io, on ge ǃKhūb di ais aiǃâ ǀâxarexuhe hâ, nētsēn ra ǂhāxu te amaga, ǃKhūb di ǀumisa ta ǂae-aiǁapo ǁkhā tamas kōse: ǃGû îts ǀkhara eloga ǃoaba, ti mî tsî.

²⁰Tsî nēsi ti ǀaoba ab tā ǃhūb ai ǁnā, ǃKhūb di ais aiǃâba xu ǃnū hâǃâ: Israeli di gao-aots ge go ǃgûǂoa ǀgui ǃaeda-i ǀgui-ets nî ôase, ǃhomgu aits ra ǃhao-e ǃau khami.

²¹ǃNubaib ge Saula ge mî: Tita ge go ǁore, oa re ti ôa Davitse, tita ge ǃaruǀî ǂkhaba-i xare-e dī-ū tsi tide, ti ǀoms go nētsē sa mûǁae ǃgomǀgausa i xui-ao; mû, tita ge gârese go dī, tsî ta ge kaise go ǁhapu.

²²ǃNubaib ge Daviba ǃeream tsî ge mî: Mû, nēb ge hâ gao-aots di ǁhâigôaba; ab ǁnâi ǂkham khoegu di ǀguiba ǃgâuxa îb ū bi.

²³Tsî ǃKhūba ab mâb hoaba mādawa-am ǁîb di ǂhanu-aisib tsî ǁîb di ǂgomǂgomsasiba; ǃKhūb ge satsa nētsē ti ǃomǁae go mâ hâ i, xawe tita ge ti ǃomma ǀhōǂgui ǂgao tama go i ǃKhūb ǂkhauǀkhāsabetsǀî.

²⁴Tsî kō, sa ǀoms nētsē ti mûǁae ǀgapiǃgôasa go is ǁkhās xase as ti ǀomsa ǃKhūb mûǁae ǀgapiǃgôasase ī, îb ǁîba tita ore ǂōǂōsib hoaba xu.

²⁵ǃNubaib ge Saula Davib ǃoa ge mî: ǀKhaehets ge hâ ti ôa Davitse! Sats ge ǁîsa amase nîra dī, tsîts ge ǁkhāti amase nîra dan. ǃNubaib ge Daviba ǁîb di daoba ge ǃgû, tsî Sauli ge ǁîb di ǃkhais ǃoa ge oa.