Read Khoekhoegowab 1 Samueli 27 Bible Online

1 Samueli 27 - Khoekhoegowab bible

1 Samueli 27

¹Tsî Davib ge ǂgaob âb ǃnâ ge mî: Nēsi ta ge ǀguitsē Sauli di ǃomǁae nî ǁō. ǃGâi-i xare-i ge nēpa a ǀkhai, î ta ǃhaese Filisteǁîn di ǃhūb ǃnâ ûisī, ob ge Saula tita xa nî ǂkhabuǂâi, ǃaruǀîb nî tita Israeli di ǀkharib hoab ǃnâ ôasa, o ta ge ǁîb ǃomǁaeba xu nî ûiǂoa.

²ǁGoasib ge Daviba khâi tsî ge ǃgûǃgâu, ǁîb tsî ǃnanikaidisi khoegu, ǁîb ǀkha hâgu tsîga Axib, Maoxi ôab, Gats di gao-aob ǃoa.

³Tsî Davib ge Axib ǀkha ge hâ Gats tawa, ǁîb tsî ǁîb di aogu, mâb hoaba ommi âb ǀkha; Daviba ǁîb di ǀgam tarara ǀkha: Ahinoams Jesreelǁîs tsî Abigails, Nabali taras, Karmelǁîs tsîra.

⁴Tsî Sauli ge ǂhôaheo, Davib Gats ǃoa go ǃhū ǃkhaisa, ob ge ǃaruǀî ǁîba ôa tama ge i.

⁵Tsî Davib ge Axib ǃoa ge mî: ǀKhomma ta ga sa mûǁae hō-o, î ta ǁnâi ǃkhai-e māhe ǃhūb ǃādi di ǀguis ǃnâ, î ta ǁnāpa ǁan; kō, tarexa ta sa ǃgāta sa ǀkha gao-aosi ǃās ǃnâ nî ǁan?

⁶ǃNubaib ge Axiba ǁnātsē Siklagsa ge mā bi; ǁnā-amagas ge Siklagsa Judab gao-aogu di ge i nētsēs kōse.

⁷Tsî tsēdi, Davib Filisteǃhūb ǃnâ ge ǁan hâ idi ge ǀgui kurib tsî haka ǁkhâga ge i.

⁸Tsî Davib ge khoegu âb ǀkha ge ǃapa, tsî gu ge Gesurǁîn, Girsǁîn tsî Amalekǁîn tsîna ge hāǂam, ǁîn hugasa xu ǃhūb di ǁansabe ge i xui-ao, Surs ǃoats ra ǃgû khami tsî Egipteǃhūb kōse.

⁹Tsî Davib ge ǁnā ǃhūba ge ǂnau, tsîb ge ao-i kas, tara-i kas hoasa ûi kai tama ge i; ǁkhātib ge gūn, goman, eseln, kameln tsî saran tsîna ū tsî oa tsî Axib ǃoa ǁkhawa ge hā.

¹⁰Ob ge Axiba ge mî: Mapa go nētsē go ǃhapi? Ob ge Daviba ge mî: Judab ǃkhawagas ǀkhāb ai tsî Jeraxmeelǁîn ǃkhawagas ǀkhāb ai tsî Keniǁîn ǃkhawagas ǀkhāb ai.

¹¹Tsî Davib ge ao-i kas, tara-i kas hoasa ûi kai tama ge hâ i, Gats tawab nî ūsīse, mî rase, în tā ǀnîsi sige xa ǂhôa tsî: Nētib ge Daviba go dī-ū da, ti. Tsî nētib ge dommi âba go ī i, Filisteǁîn di ǃhūb ǃnâb ge ǁan hâ i tsēdi hoade.

¹²Tsî Axib ge Daviba ǂgomǃgâ tsî ge mî: ǀŌkaisenni ge ǁîb di ǁaes tawa Israeli ǃnâ, ǁnā-amagab ge ǀamos kōse ti ǃgāse nî hâ.