Read Khoekhoegowab 1 Samueli 28 Bible Online

1 Samueli 28 - Khoekhoegowab bible

1 Samueli 28

¹Tsî i ge ǁnā tsēdi ǃnâ ge ī, Filisteǁîn ge toroǂnubidi âna ǀhaoǀhao ǃkhaisa, Israelan nî ǃkhamūga. Ob ge Axiba Davib ǃoa ge mî: Sats ge nî ǂanǁapo, ǂnubis ǃnâts satsa tita ǀkha nî ǂoa ǃkhaisa, sats tsî sa khoegu tsîgo.

²Ob ge Daviba Axib ǃoa ge mî: ǁNā-amagats ge nî ǂan sa ǃgāta nî dī ǃkhaisa. Ob ge Axiba Davib ǃoa ge mî: ǁNā-amaga ta ge satsa ti danas di ǃûi-aose nî ǂnûi, mâ ǁaeb hoaba.

³Tsî Samueli ge ge ǁō hâ i, tsî Israeli hoaragab ge ǁîb ǂama ǃgaesa ge hî, tsîn ge Ramas, ǁîb di ǃās ǃnâ ǁîba ge ǁkhō. Tsî Sauli ge aimûǀgaru-aon tsî ǁgâuaǁkhāǁkhāsaben tsîna ǃhūba xu ge dībē hâ i.

⁴Tsî Filisteǁîn ge hā tsî ǀhû tsî ge ǁgoe Sunems tawa; tsî Sauli ge Israeli hoaba ǀhaoǀhao tsî Gilboab ai ge ǁgoe.

⁵Tsî Sauli ge Filisteǁîn di ǂnubisa mûo, ob ge ge ǃao, tsî ǂgaob âb ge kaise ge ǀkhū.

⁶Tsî Sauli ge ǃKhūba ge dî, xawe ǃKhūb ge ǁîba ǃeream tama ge i, ǁhapodi ǀkhas kas, Urims ǀkhas kas, kēbo-aogu ǀkhas kas hoasa.

⁷ǃNubaib ge Saula ǃgāgu âb ǃoa ge mî: Tara-e ôaba te re, aimûǀgarugaga-e ūhâ-e, î ta ǁîs tawa sī, î ta ǁîsa dî re. O gu ge ǃgāgu âba ǁîb ǃoa ge mî: Mû, Endors tawas ge taras aimûǀgarugagasa ūhâsa hâ.

⁸Ob ge Saula ǀkharaǀkharasen tsî ǀkhara sarana ǂgaeǂgā tsî ge ǃgû tsî ǀgam khoekha ǁîb ǀkha, tsî gu ge tsuxuba taras tawa ge sī; tsîb ge: Aimûǀgaruba te re aimûǀgarugagasa xu, îs ǂoaxa kaiba te re ǁîb hîa ta nî mîba siba, ti ge mî.

⁹ǃNubais ge tarasa ǁîb ǃoa ge mî: Mû, sats ge a ǂan, Sauli ge dī ǃkhaisa; matib aimûǀgaru-aon tsî ǁgâuaǁkhāǁkhāsaben tsîna nē ǃhūba xu ge ǃhūǃnoma ǃkhaisa; tarexats kha ǁnâi ti ǀomsa ǁnoa-e ra ǁguiba, ǃgam tets nîga?

¹⁰Ob ge Saula ǃKhūb tawa ǁîsa nūba tsî ge mî: ǃKhūb a ûitsama ǃkhais aos ge nē ǃkhais ǂama ǁkhara-i xare-i xa hāǂamhe tide.

¹¹ǃNubais ge tarasa ge mî: Tari-e ta nî ǂoaxa kaiba tsi? Ob ge ǁîba: Samuela ǂoaxa kaiba te re! ti ge mî.

¹²Tsî taras ge Samuela mûo, os ge tarasa Sauli ǀkha ǃhoa tsî ge mî: Tarexats kha ǁnâi go gā te? Saults kom satsao.

¹³Ob ge gao-aoba ǁîs ǃoa ge mî: Tā ǃao, tare-es ra mû? ǁGoasis ge tarasa: Tita ge elogu ǃhūba xu ra ǂoaxa ǃkhaisa ra mû, ti ge mî.

¹⁴Ob ge ǁîba ge mî: Matib īsib âba ī? Os ge: Kaira aob ra ǂoaxa, anaǂamsaraba anasen hâba, ti ge mî. Tsî Sauli ge hōǃâo, Samueli a ǃkhaisa, ob ge ais âb ǀkha ǃhūb ai ǁnāǁgoe tsî ge ǃhonǁgoa.

¹⁵Tsî Samueli ge Sauli ǃoa ge mî: Tarexats ra sâoǃnâ kai te, ǂoaxa kai tes ǀkha? Ob ge Saula ge mî: Tita ge kaise ǂōǂōhe hâ, Filisteǁîn ra ǃkhamū te, tsî Elob ge tita xu ge ǂgō tsî ǃaruǀî ǃeream te tama hâ, kēbo-aogu di ǃoabasa xus kas, ǁhapode xus kas hoasa xui-ao; ǁnā-amaga ta ge satsa go ǂgai; ǂanǂan tets nîga, tare-e ta nî dī ǃkhaisa.

¹⁶ǃNubaib ge Samuela ge mî: Tare xū-i ǃaromats kha tita ra dî, ǃKhūb satsa xu ǂgō tsî ge sa khākhoe kai xawe?

¹⁷ǃKhūb ge ǁîb ǂûba ge dībasen ti ǃoabasa xub ge mî khami xui-ao; tsîb ge gaosisa sa ǃomma xu ge ǀkhauǁnâ, tsîb ge ǁîsa sa ǀgūkhoeb Daviba ge mā.

¹⁸Sats ge ǃKhūb di domma ǁnâu tama tsî ǀgamsib ǁîb ǁaib diba Amalekǁînǀî dīǂui tama ī ǃkhais ǃaromab ge ǃKhūba nē ǃkhaisa nētsēs ai go dī.

¹⁹Tsî ǃKhūb ge sats ǀkha Israeli ona Filisteǁîn ǃomǁae nîra mā tsî ǁarits ge sats tsî sa ôagu tsîgo tita tawa nî hâ; ǁkhātib ge ǃKhūba Israeli di toroǂnubisa Filisteǁîn ǃomǁae nî mā.

²⁰ǃNubaib ge Saula ǃnoesase ǃhūb ai ge ǁnā, gaxub as kōse, tsîb ge kaise ge ǃao Samueli di mîdi xa; ǁkhāti i ge ǀgai-i xare-e ǁîb ǃnâ hâ tama ge i, tsēs hoas tsî tsuxub hoabab pere-i xare-e ge ǂû tama hâ i xui-ao.

²¹Os ge tarasa Sauli ǃoa hā tsî ge mû, kaiseb ǃhuri hâ ǃkhaisa; os ge ǁîb ǃoa ge mî: Mû, sa ǃgāta ge sa domma go ǁnâu, tsî ta ge ti ǀomsa ti ǃomǁae go ū, tsî ta ge sa mîdi, titats go ǃhoaǀîde go ǁnâu.

²²ǁNâi sats ona ǁnâu sa ǃgāta di domma, î ta pereǃâro-e mâi-aiǃâ tsi, îts ǂû re, îb ǀgaiba hâ sats ǃnâ, daob aits ga ǃgûo.

²³Xaweb ge ǁîba ǂkhā tsî ge mî: Tita ge ǂû tide. Xawe ǁîb di ǃgāgu tsî taras tsîn ge ǁîba ge ǁkhauhâhâ. Ob ge dommi âna ǁnâu tsî khâi ǃhūba xu tsî kharob ai ge ǂnû.

²⁴Tsî taras ge kau hâ tsâu-e ommi ǃnâ ge ūhâ i, os ge ǃhaese ǁî-e ge ǂā, tsîs ge tsampere-i xa ū tsî ǁî-e ǀhomam tsî ǁî-i xa ǀkhuruoǃnâ peredana ge ǁgan.

²⁵Tsîs ge ǁîna Sauli tsî ǁîb di ǃgāgu aiǃâ ge ūhā, o gu ge ge ǂû; ǁnās khaoǃgâ gu ge khâi tsî ǁnā tsuxub ǁkhāb ǃnâ ge ǃgûbē.