Read Khoekhoegowab 1 Samueli 29 Bible Online

1 Samueli 29 - Khoekhoegowab bible

1 Samueli 29

¹Tsî Filisteǁîn ge ǂnubidi ân hoana Afeks tawa ge ǀhaoǀhao; tsî Israelǁîn ge ǁnā ǀaus Jesreels ǀgūse hâs tawa ge ǁgoe i.

²Tsî Filisteǁîn di gaosagu ge ge doeǀgū kaidisigu ase tsî ǀoadisigu ase; xawe Davib tsî ǁîb di khoegu tsîgu ge Axib ǀkha khaoǃgûs ǀkha ge ǃgû.

³ǃNubai gu ge Filisteǁîn di ǂamsaga ge mî: Tare-e gu nî dī nē Hebreǁîga? Ob ge Axiba Filisteǁîn di ǂamsagu ǃoa ge mî: Nēba kha Davi tamaba, Sauli, Israeli gao-aob di ǃgāb, tsēdi tsî kuriga xu ǀnai tita ǀkha ge hâ iba? Tsî tita ǁîb ǃnâ ǁnāǁgôab ge tsēsa xu nētsēs kōse xū-e hō tama hâba?

⁴Xawe Filisteǁîn di ǂamsagu ge ǁîb ǂama kaise ge ǁaixa tsî ǁîb ǃoa ge mî: Ab khoeba oa îb ǁîb di ǃkhais, sats ge ǁîba ǂnûis ǃoa oa; îb tā sage ǀkha ǁgôa ǃkhammi ǁga, îb tā ǃkhammi ǃnâ sage di mâǃoasabe kai: Mâ xū-i ǀkhab kha ǀhonkhoeb âb ǃoa ǃgâise nî ǁgausen? Nē khoegu di danadi ǀkha tamasa?

⁵Nēba kha ǁnā Davi tamaba, ǁîb xa di ge ǂnā rase ǃereamgu tsî: Sauli ge ǁîb di ǀoadisiga go ǂnau, xawe Davib ge ǁîb di disiǀoadisiga go ǂnau, ti gere mîba?

⁶Ob ge Axiba Daviba ǂgai, tsî ǁîb ǃoa ge mî: ǃKhūb a ûitsama ǃkhais aots ge satsa a ǂhauǃnâ tsî sa ǂoas tsî sa ǂgâs, tita ǀkhats ra toroǂnubis ǃnâ dīs ge ti mûǁae a ǃgâi, ǂkhaba-i xare-e ta ge sa ǃnâ, tita tawats ge hā tsēsa xu nētsēs kōse hō tama hâ, xawets ge gaosagu mûǁae ǃgâi tama hâ.

⁷Oa ǁnâi îts ǂkhîb ǃnâ ǃgû, îts tā Filisteǁîn mûǁae a tsū xū-e dī.

⁸Ob ge Daviba Axib ǃoa ge mî: Tsî tare xū-e ta kha ǁnâi dī hâ, tsî tare xū-ets kha ǁnâi sa ǃgāta ǃnâ hō hâ, sa ais aiǃâ ta ge hâ i tsēsa xu nētsēs kōse, o ta ǃgû tsî ti ǀhonkhoets, gao-aots di khākhoena ǃkhamū tide?

⁹Ob ge Axiba ǃeream tsî Davib ǃoa ge mî: ǂAn ta a, amasets ge satsa ti mûǁae a ǃgâi, Elob di ǀhomǃgā-i xase; xawe Filisteǁîn di ǂamsagu ge: Îb sige ǀkha ǃkhammi ǁga tā ǃgûǃapa, ti ge mî.

¹⁰Tsî nēsi, ǁari ǃnauǁgoaga khâi, tsî go ga ǃnâbaheo, î go ǁnâi ǃgû.

¹¹ǃNubaib ge Daviba ǃnauǁgoaga ge khâi, ǁîb tsî ǁîb di khoegu tsîga, ǁgoaga ǃgû tsî gu nî Filisteǁîn di ǃhūb ǃoa oase; xawe Filisteǁîn ge Jesreels ǃoa ge ǃapa.