Read Khoekhoegowab 1 Samueli 30 Bible Online

1 Samueli 30 - Khoekhoegowab bible

1 Samueli 30

¹Tsî i ge ge ī, Davib tsî ǁîb di khoegu ge ǁnā ǃnonaǁî tsēs ai Siklags tawa sī ǃnubain ge Amalekǁîna ǃkhawagas ǃnâ tsî Siklags ǃnâ ǂgâxa tsî Siklagsa ǂnau tsî ǀaes ǀkha khauǃkhū ǃkhaisa.

²Tsî gu ge taradi, ǁîs ǃnâ hâde ǃkhōsase ūǃgû, xawe gu ge khoe-i xare-e ǃgam tama ge hâ i, ǂkham-e xu hoan xa kai-i kōse, tsî gu ge ūbēs ǀguisa hî tsî ǁîgu di daoba ge ǃgû.

³Tsî Davib tsî khoegu âb ge ǃās tawa sīo, mû, os ge ǀaes ǀkha khauǃkhūhe hâ; tsî taradi âgu, ǀgôagu âgu tsî ǀgôadi âgu ge ǃkhōsase ūǃgûhe ge hâ i.

⁴ǁGoasi gu ge Davib tsî ǁaes, ǁîb ǀkha hâs tsîna dommi âna ūkhâi tsî ge ā, āǀgai-i xare-i ge ǃaruǀî ǁîn ǃnâ hâ tama is kōse.

⁵Tsî Davib di ǀgam tarara ge ǁkhāti ǃkhōsase ge ūǃgûhe hâ i, Ahinoams, Jesreelǁîs, tsî Abigails, Nabali taras, Karmelǁîs tsîra.

⁶Tsî Davib ge kaise ge ǃao, ǁaes ge ǁîban nî ǀuiǁhom, ti ǃhoa xui-ao, ǁaes hoas di ǀomdi ge au-auhe hâ i amaga, mâb hoaba ǁîb di ôagu tsî ǁîb di ôadi ǂama; xawe Davib ge ǃKhūb, ǁîb Elob ǃnâ ge ǀgaiǀgaisen.

⁷Tsî Davib ge prister Abjatari, Ahimelexi ôab ǃoa ge mî: Efoba nēpa ūhāba te re! Ob ge Abjatara efoba ge ūhā, Davib tawa.

⁸ǁGoasib ge Daviba ǃKhūba dî tsî ge mî: Nē ǂnubisa ǃgôaǃgon si ta nî? Saoǁae si ta nî? Ob ge ǁîb ǃoa: ǃGôaǃgon si, ǂanǂansasets ge ǁîna nîra saoǁae, ǂanǂansasets ge ǁîna nîra ore xuige, ti ge mî.

⁹Ob ge Daviba ge ǃgû, ǁîb ǂûb tsî ǃnanikaidisi khoegu ǁîb ǀkha hâgu tsîga; tsî ǃārob Besori tawa gu ge sīo, o gu ge aoga ge mâ.

¹⁰Tsî Davib ge ǁîga ge ǃgôaǃgon, ǁîb tsî ǁnā hakakaidisi khoegu tsîga; tsî ǀgamkaidisi khoegu ge ge mâ, hîa tsau hâga, Besori ǃāroba gu ǃgâu ǁoa ge is kōse.

¹¹Tsî gu ge Egipteǁî khoeba ǃaub ai hō tsî Davib ǃoa ge ūhā bi, tsî gu ge ǁîba pereba ge mā, ob ge ge ǂû, tsî gu ge ǁgam-e ge āsi bi.

¹²Tsî gu ge ǁkhāti ǀnomahais ǂûn di naru-i xa ge mā bi tsî ǀgam narura ǂâuǂûn xa; ob ge ǂû tsî gagas âb ge ǁkhawa ǁîb ǃnâ ge hā; ǃnona tsēdi tsî ǃnona tsuxugu kōseb pere-i xa ǂû tama tsî ǁgam-i xa ā tama ge hâ i xui-ao.

¹³Ob ge Daviba ǁîb ǃoa ge mî: Tarib ditsa satsa? Tsî mapa xuts hâ? Ob ge Egipteǁî ǂkham khoeba ge mî: Tita ge Amalekǁî-aob di ǃgāta, tsî ti ǀhonkhoeb ge go ǁnāxū te, ǃnona tsēdi aiǃâ ta go ǀaesen amaga.

¹⁴Sige ge Keretǁîna xu ǃkhawagasǀî ge ǂnû-ai tsî Judab di-i ǃnâ tsî Kaleb ǃkhawagasǀî, tsî da ge Siklagsa ǀaes ǀkha ge khauǃkhū.

¹⁵ǃNubaib ge Daviba ǁîb ǃoa ge mî: ǂGaeǂguiǁgôa te ǁkhāts a satsa ǁnā ǂnubis ǃoa? Ob ge ge mî: Nūba te re Elob tawa, ǃgam tets tide ǃkhaisa, tsî ti ǀhonkhoeb ǃomǁaets māǁnâ te tide ǃkhaisa, o ta ge nî ǂgaeǂguiǁgôa tsi ǁnā ǂnubis ǃoa.

¹⁶Ob ge ǁîba ge ǂgaeǂguiǁgôa; tsî mû, ǁîn ge ǀgarusase ge ǁgoe i ǃhūb hoaragab ai, ǂû rase tsî ā rase tsî ǂnā rase ǁnā kai ǁkhâuǁnâs hîan ge ūs ǃaroma, Filisteǁîn di ǃhūba xu tsî Judab ǃhūba xu.

¹⁷Tsî Davib ge ǁîna ge ǂnau ǁgoaǀapaba xu sao ra tsēs di ǃuis kōse; tsî ǀnî khoe-i ǁîn di-i ge ûi tama ge i, hakakaidisi ǂkham khoegu, ǃnain ai ǃgapi tsî ge ǃhūgu ǀguigu ose.

¹⁸Nētib ge Daviba Amalekǁîn ge ū xūn hoana ge ore; ǁkhātib ge Daviba ǁîb di ǀgam tarara ge ore.

¹⁹Tsî ǁîn xa i ge ǀgui-i xare-e ge ǁkhuihe tama hâ i, hoan xa ǂkhari-e xu hoan xa kai-i kōse; tsî ǀgôadi tsî ǀgôagu kōse; tsî ǁkhâuǁnâs on xa, ǁînan ge ūǀhana xūn hoana: Davib ge ǁîn hoana ǁkhawa ge ūhā.

²⁰Tsî Davib ge ǁkhāti gūn tsî goman tsîn hoana ge ū; tsîn ge ǁîna ǀgoan aiǃâ doeǁga tsî: Nēs ge ǁkhâuǁnâs Davib disa, ti ge mî.

²¹Tsî Davib ge ǀgamkaidisi khoegu tawa sīo, ǁnā ǀhupu ge hâ igu, Daviba gu ge sao ǁoa is kōse tsî ǃārob Besori tawa gu ge ǁnāxū ga; o gu ge ǁîga ǁîba ge ǃgûǃoa, tsî Davib ge ǁaesa ge dāǀgū, tsîb ge ǃgâi hâsib xa ge dî gu.

²²ǁGoasib ge Davib ǀkha ge ǃgû hâ i khoegu ǃnâ hâ ǂkhaba khoeb tsî Beliali khoeb hoaba ǃeream tsî ge mî: Sage ǀkha gu ge ǃgû tama hâ i ǃkhais ǃaroma ge ge ǁîga ǁnā ǁkhâuǁnâs, sage go hōs xa mā tide, mâb hoaba ab taras âb tsî ǀgôan âba ū, î gu ǁîna ǂgaeǂguibē î gu ǃgû.

²³Xawe Davib ge ge mî: Tā nēti dī, ti ǃgâsago, ǃKhūb sage go mān ǀkha; tsî ǁîb ge sage go sâu, tsîb ge ǁnā ǂnubis, sage go ǃoasa, sage ǃomǁae go mā.

²⁴Tari-e nî sago ǁnâu nē ǃkhais ǃnâ? ǁNāgu, ǃkhammi ǃnâ ge ǃgûǁgôagu di amǃnâs īs ǁkhās xaseb ge ǁkhāti amǃnâs xūn tawa hâ go igu disa nî ī; ǀguitikōse go ge nî ǀgoragu.

²⁵Tsî ǁîs ge ǁnā tsēsa xu tsî ǃaruǀî ǁnāti ge ī: ǂNûiǂgāse tsî ǂhanuseb ge ǁî ǃkhaisa Israeli ǃnâ ge ǂnûi xui-ao, nētsēs kōse.

²⁶Tsî Davib ge Siklags tawa sīo, ob ge Judab di kaigu, ǁîb di ǀhōsaga ǁkhâuǁnâs xa ge sîba, mî raǃâ: Mû, nēb ge ǀkhaeb sago diba, ǃKhūb khākhoen di ǁkhâuǁnâs xa:

²⁷ǁÎgu Bet-Els digu ǃoa tsî Ramots digu ǃoa ǃkhawagasǀî tsî Jatirs digu ǃoa.

²⁸Tsî Aroers digu ǃoa tsî Sifmots digu ǃoa tsî Estemoas digu ǃoa,

²⁹tsî Rakals digu ǃoa tsî ǁnāgu, Jeraxmeelǁîn di ǃādi ǃnâ hâgu ǃoa tsî Keniǁîn di ǃādi ǃnâ hâgu ǃoa,

³⁰tsî Hormas digu ǃoa tsî Bor-Asanni digu ǃoa tsî Ataxs digu ǃoa,

³¹tsî Hebrons digu ǃoa, tsî ǁnā ǃkhaidi, Davib ge ǃgûmaǃnâdi hoadi ǃoa, ǁîb tsî ǁîb di khoegu tsîga.