Read Khoekhoegowab 1 Samueli 31 Bible Online

1 Samueli 31 - Khoekhoegowab bible

1 Samueli 31

¹Tsî Filisteǁîn ge Israela ge ǃkhamū, o gu ge Israeli aoga Filisteǁîn di ais aiǃâ ǁhâ, tsî ge ǂnauǁguihe Gilboaǃhommi ai.

²Tsî Filisteǁîn ge Sauli tsî ǁîb ôagu tsîga ge ǃgôaǃgon, tsî Filisteǁîgu ge Sauli ôagu, Jonatanni, Abinadab tsî Malkisuab tsîga ge ǃgam.

³Tsî ǃkhammi ge Sauli ǃoagu kaise ge karosa; tsî ǁkhâu-aogu ge ǁîba ge hō, ob ge kaise ge tsuihe.

⁴ǃNubaib ge Saula ǀāxūtani-aob âb ǃoa ge mî: Gôab âtsa ǂgaeǂui îts ǃkhāǃan te, î gu tā nē ǃgaohe tama hâga hā tsî ǃkhāǃan te tsî ǃhō te. Xawe ǀāxūtani-aob âb ge dī ǂgao tama ge i, kaiseb ra ǃao amaga. ǁGoasib ge Saula gôab âba ū tsî ǁîb ai ge ǁnāǁnāsen.

⁵Tsî ǁîb di ǀāxūtani-aob ge mûo, Sauli go ǁō ǃkhaisa, ob ge ǁkhāti gôab âb ai ǁnāǁnāsen tsî ge ǁō ǁîb ǀkha.

⁶Nēti gu ge Sauli tsî ǁîb ǃnona ǀgôagu tsî ǁîb ǀāxūtani-aob tsî ǁîb di khoegu hoagu tsîga ǁnātsē ge ǀguiǁō.

⁷Tsî Israeli di aogu, ǃgoaǃnāb nau ǀkhāb ai hâgu tsî Jordanǃāb nē ǃnanib ai hâgu ge mûo, Israeli di khoegu ge ǃhū ǃkhaisa, tsî Sauli tsî ǁîb di ôagu ǁō hâ ǃkhaisa, o gu ge ǃādi âga ǁnāxū tsî ge ǁhâ. On ge Filisteǁîna hā tsî ǁîdi ǃnâ ge ǁan.

⁸Tsî i ge sao ra tsē ge ī, Filisteǁîn ge hāo, ǃgamhe hâgan nî ǁkhâuǁnâse, on ge Sauli tsî ǁîb di ôagu tsîga Gilboaǃhommi ai ǁgoese ge hō.

⁹Tsîn ge danas âba ge ǁhāǁnâ, tsîn ge ǀāxūn âba ǂgaeǂui, tsî ǁîna Filisteǁîn di ǃhūb ǃnâ ge sîma, ǂhôan nîse ǁî ǃkhaisa ǁîn elogu di omgu ǃnâ tsî ǁaes ǃnâ.

¹⁰Tsîn ge ǀāxūn âba Astarots di ommi ǃnâ ge ǁgui; tsî soros âban ge Bet-Seans di ǂnubiǂgoab tawa ge ǂnaumâi.

¹¹Tsî Jabes, Gileadi dis ǁansaben ge Filisteǁîn ge Sauli ǀkha dīna ǁnâuo,

¹²o gu ge ǃkham ǁkhā aogu hoaga khâi tsî tsuxub hoaba ǃgû tsî ge ū, Bet-Seans di ǂnubiǂgoaba xu Sauli soros tsî ǁîb ôagu di sorodi tsîde; tsîn ge Jabes tawa sī tsî ǁnāpa ǁîga ge khauǃkhū.

¹³Tsîn ge ǁîgu di ǂkhōga ū tsî ǁîga Jabes tawa hâ haidi ǃgao ge ǁkhō; tsîn ge hû tsēde ǂûtama ge hâ.