Read Khoekhoegowab 1 Samueli 4 Bible Online

1 Samueli 4 - Khoekhoegowab bible

1 Samueli 4

¹Tsî Israeli ge Filisteǁîna nî ǃkhamūse ǂoa tsî ge ǁgoe Eben-Esers tawa, xawe Filisteǁîn ge Afeks tawa ge ǁgoe.

²Tsî Filisteǁîn ge ǃkhammi ǁga ge ǂhomisen, Israelan nî ǃoaga; tsî ǃkhammi ge kaio, ob ge Israela ge ǂnauhe Filisteǁîn di ais aiǃâ; ǃkhammi ǃnân ge ǃaub ai hakaǀoadisi nî ī khoega ǂnau xui-ao.

³Tsî ǁaes ge ǁkhawa ǁgoeǃkhais ǃnâ ǀhao, o gu ge Israeli di kaiga ge mî: Tare xū-i ǃaromasa ǃKhūb go nētsē Filisteǁîn di ais aiǃâ ǂnau kai dasa? A da Silosa xu ǂgaes ǃKhūb di ǃgaeǀhaos disa sada tawa ū, îs ǁîsa sada ǁaegu hā, îs ore da sada khākhoen di ǃomǁaeba xu.

⁴Os ge ǁaesa Silos ǃoa ge sî tsîn ge ǁnāpa xu ǃKhūb ǂnubidi dib, xerukha ǁaegu ǁan hâb di ǃgaeǀhaos di ǂgaesa ge ūhā; tsî ǀgam ǀgôakha Elib dikha, Hofnib tsî Pinehab tsîkha ge ǁnāpa ge hâ, Elob di ǃgaeǀhaos di ǂgaes ǀkha.

⁵Tsî i ge ge ī, ǃKhūb di ǃgaeǀhaos di ǂgaes ge ǁgoeǃkhais ǃnâ hāo, ob ge Israeli hoaba kai dâb ǀkha ge dâ, ǃhūb ge ǀganas kōse.

⁶Tsî Filisteǁîn ge dâb di domma ǁnâuo, on ge ge mî: Tarebe domma nē kai dâb diba Hebreǁîn di ǁgoeǃkhais ǃnâ? ǃNubain ge ge ǁnâuǃā, ǃKhūb di ǂgaes go ǁgoeǃkhais ǃnâ hā ǃkhaisa.

⁷ǁNā-amagan ge Filisteǁîna ge ǃao: Elob ge ǁgoeǃkhais ǃnâ go hā, tin ge mî xui-ao. Tsîn ge ge mî: Tsūba da, nēti ī xū-i ge ǁari tsî aetsē ī tama hâ i xui-ao!

⁸Tsūba da, tari-e nî ore da, nē ǂkhaisa elogu di ǃomǁaeba xu? Nēgu ge ǁnā elogu, Egipteǁîna ǁnora-aigu hoagu ǀkha ge ǁnoraga, ǃgaroǃhūb ǃnâ.

⁹ǀGaisa, î go ǁnâi aose ī, Filisteǁîgo, î go tā ǀnîsi Hebreǁîna ǃoaba, ǁîn sago gere ǃoaba xase, ǁnâi aose ī î go ǃkham!

¹⁰ǃNubai gu ge Filisteǁîga ge ǃkham, tsî Israeli ge ge ǂnauhe, on ge ge ǁhâ, mâ-i hoa-e ǁî-i di tentoms ǃoa; tsî ǂnauǁguis ge ge kai i, Israeli xa gu ge ǃnonadisiǀoadisi ǀnūǃgû-aoga a ǁnās kōse.

¹¹Tsî Elob di ǂgaes ge ge ūhe, tsî ǀgam ǀgôakha Elib dikha, Hofnib tsî Pinehab tsîkha ge ge ǁō.

¹²ǃNubaib ge Benjaminǁîba toroǂnubide xu ǃkhoe tsî ǁnā tsēs ǁkhās ai Silos tawa ge sī; tsî saran âb ge ge ǀkhauhe hâ i, tsî ǃhūb ge danas âb ai ge hâ i.

¹³Tsî hāb geo, mû ob ge Eliba ǂnû-aiǃnao-i ai ge ǂnôa i, daob amǃgâ ra kōse; ǂgaob âb ra ǀkhū Elob di ǂgaes ǂama xui-ao. Tsî ǁnā aob ge hāo, ǃās ǃnâb nî ǁîsa ǂhôase, os ge ǃās hoasa ge buru.

¹⁴Tsî Elib ge ǃnurus di domma ǁnâuo, ob ge ge mî: Tarebe dom-e nē ǂkhupib di-e? Ob ge aoba ǃhaese hā tsî Eliba ǁîsa ge ǂhôa.

¹⁵Tsî Elib ge khoesedisiǁkhaisaǀa kurixa ge i, tsî mûra âb ge ge ǀkhama hâ i, mû ǁoab ge is kōse.

¹⁶Tsî ǁnā aob ge Elib ǃoa ge mî: Tita ge ǁî ta, toroǂnubide xu go hā ta, tsî ta ge nētsē toroǂnubide xu go ǁhâ. Ob ge ǁîba: Tare xū-e go ī, ti ôa? ti ge dî.

¹⁷Ob ge ǁîb ǂhôasa go ūhāba ǃeream tsî ge mî: Israeli ge go ǁhai Filisteǁîn di ais aiǃâ, tsî kai ǂnauǁguis ge ǁkhāti ǁaes ǃnâ go ī; ǁnās xōǀkhā kha ge sa ǀgam ǀgôakha Hofnib tsî Pinehab tsîkha go ǁō, tsî Elob di ǂgaes ge go ūhe.

¹⁸Tsî i ge ge ī, Elob di ǂgaes xab ge ǂhôao, ob ge ǃgâs ǂama ǂnû-aiǃnaosa xu ge ǁnā, ǁāb di ǃnammi ai, tsîb ge ǃaosa khôa tsî ge ǁō, aob a kaira tsî a ǃgom xui-ao; tsîb ge ǁîba Israela hakadisi kuriga gere ǂhanuǂhanu.

¹⁹Tsî ǀuiǀgôas âb, Pinehab di taras ge ǀgamǀkhā tsî ǁora nîse ge ī i; tsî ǁîs ge ǂhôasa ǁnâuo, Elob di ǂgaes go ūhe ǃkhaisa, tsî ǀuisab âs go ǁōsa tsî ǁîs di aob ona, os ge ǃgamǃgâ tsî ge ǁora, tsûgu âs xas ge ge hāǂamhe xui-ao.

²⁰Tsî ǁōǁaeb âs ge hāo, o di ge ǁnā taradi ǁîs tawa mâde ge mî: Tā ǃao, ǀgôabas go ǁora xuige, xawes ge ǃeream tama tsî ǁîsa ǂgaob ǃnâ ū tama ge i.

²¹Tsîs ge ǀgôaroba Ikabod ti ge ǂgai mî rase: ǃGôasib ge Israela xu go ūbēhe, Elob di ǂgaes ǃkhōsase go ūǃgûhe ǃkhais ǃaroma tsî ǀuiǁgûb âs tsî aob âs dis ǃaroma.

²²Os ge: ǃGôasib ge Israela xu go bē, Elob di ǂgaes ge go ūhe amaga, ti ge mî.