Read Khoekhoegowab 1 Samueli 5 Bible Online

1 Samueli 5 - Khoekhoegowab bible

1 Samueli 5

¹Tsî Filisteǁîn ge Elob di ǂgaesa ū tsî ǁîsa Eben-Esersa xu Asdods ǃoa ge ūsī.

²Tsî Filisteǁîn ge Elob di ǂgaesa ū tsî ǁîsa Dagonni di ommi ǃnâ ūǂgā tsî Dagonni xōǀkhā ge mâi.

³Tsî Asdods din ge sao ra tsē ǃnauǁgoaga khâio, mû, ob ge Dagonna ais âb ai ǃhūb ai ge ǁnāǁgoe i, ǃKhūb di ǂgaes aiǃâ. On ge Dagonna ū tsî ǁkhawa ǃkhais âb ai ge mâi.

⁴Tsî sao ra tsēn ge ǃnauǁgoaga khâio, ob ge Dagonna ais âb ai ǃhūb ai ge ǁnāǁgoe i, ǃKhūb di ǂgaes aiǃâ, tsî Dagonni di danas tsî ǃomǃnākha âb ge ǁāb di dā-aiǃkhais ai ge ǁgoe i, ǁhāǁnâhe hâse; Dagonni soros ǀguis ge ǁîb ai ge ǃgau hâ i.

⁵ǁNā-amaga gu ge Dagonni pristergu tsî Dagonni ommi ǃnâ ra hân hoana ǁîb di dā-aiǃkhais ai dā tama hâ Asdods tawa, nētsēs kōse.

⁶Tsî ǃKhūb di ǃommi ge Asdods din ai ge ǃgom i tsî ǁîna ge hîkākā; tsîb ge ǁîna tsuigu ǀkha ge ǂnau, Asdods tsî ǁîs di ǀkharigu dina.

⁷Tsî Asdods di aogu ge mû, ǁnāti i ge ī ǃkhaisa, o gu ge ge mî: As ǂgaes Israeli Elob disa tā sida tawa hâ, ǃommi âb ge sida ǂama tsî Dagonni, sida di elob ǂama a ǃgom amaga.

⁸ǁNā-amaga gu ge sî tsî Filisteǁîn di gao-aogu hoaga ǁîgu tawa ǀhaoǀhao tsî ge mî: Tare-e da kha nî dī Israeli Elob di ǂgaes ǀkha? O gu ge ǁîga ge mî: As Israeli Elob di ǂgaesa Gats ǃoa ūsīhe. On ge Israeli Elob di ǂgaesa ge tanisī.

⁹Tsî i ge ge ī, ǁîsan ge tanisīo, ob ge ǃKhūb di ǃomma ǁnā ǃās ǃoagu ge hā, ama kai ǃhurib ǀkha, tsîb ge ǁnā ǃās di khoena ge ǂnau ǂkhari-e xu kai-i kōse, o gu ge tsuiga khoen ai ge ǁhai.

¹⁰ǃNubain ge Elob di ǂgaesa Ekrons ǃoa ge sî; tsî i ge ge ī, Elob di ǂgaes ge Ekrons tawa sīo, on ge Ekronǁîna ǂgai tsî ge mî: Tita ǃoan ge Israeli Elob di ǂgaesa go ūhā, tita tsî ti ǁaesan nî ǃgamse.

¹¹On ge sî tsî Filisteǁîn di gaosagu hoaga ǀhaoǀhao tsî ge mî: Israeli Elob di ǂgaesa sî îs ǁîs di ǃkhais ǂhunumas ai oasī, îs tita tsî ti ǁaesa tā ǃgam; ǁōǁōsa ǃhurib ge ǃās hoaragas ǃnâ hâ, tsî Elob di ǃommi ge kaise ge ǃgom i.

¹²Tsî ǁnā khoen hîa ge ǁō tama hâ in ge tsuigu ǀkha ge ǂnauhe, ǃās di ǃaub ge ǀhommi ǃoa ǃapas kōse.